இமேஷா துலானியின் கன்னி T20I சதத்தால் பாகிஸ்தானை வீழ்த்தியது இலங்கை

இமேஷா துலானியின் கன்னி T20I சதத்தின் உதவியால் தம்புள்ளை சர்வதேச கிரிக்கெட் மைதானத்தில் இன்று (31) நடைபெற்ற, பாகிஸ்தானுக்கு எதிரான மூன்று போட்டிகள் கொண்ட சர்வதேச T20 தொடரின் முதல் போட்டியில், இலங்கை மகளிர் அணி 6 விக்கெட்டுகள் வித்தியாசத்தில் அபார வெற்றி பெற்றது.

இது சர்வதேச மகளிர் T20 கிரிக்கெட் வரலாற்றில் இலங்கை அணியின் மிக அதிகபட்ச வெற்றிகரமான சேஸிங் ஆகவும் பதிவானது.

இப்போட்டியில் நாணய சுழற்சியில் வென்ற இலங்கை அணியின் தலைவி சமரி அத்தபத்து முதலில் பந்துவீச்சைத் தேர்வு செய்து, பாகிஸ்தான் அணியை துடுப்பெடுத்தாட அழைத்தார்.

இதன்படி, முதலில் துடுப்பெடுத்தாடிய பாகிஸ்தான் மகளிர் அணி, நிர்ணயிக்கப்பட்ட 20 ஓவர்களில் 7 விக்கெட் இழப்பிற்கு 176 ஓட்டங்கள் என்ற வலுவான இலக்கை நிர்ணயித்தது. அந்த அணியின் ஆரம்ப துடுப்பாட்ட வீராங்கனை ஷவால் சுல்பிகார் 41 பந்துகளில் 10 பவுண்டரிகள் மற்றும் ஒரு சிக்ஸருடன் 63 ஓட்டங்களையும், முனீபா அலி 9 பவுண்டரிகளுடன் 41 ஓட்டங்களையும்  அதிகபட்சமாக குவித்தனர்.

இலங்கை அணி சார்பில் கவிஷா தில்ஹாரி 4 ஓவர்களில் 36 ஓட்டங்களுக்கு 2 விக்கெட்டுகளைக் கைப்பற்றினார்.

• பாகிஸ்தானுக்கு எதிரான ஒருநாள் தொடரை கைப்பற்றி இலங்கை மகளிர் அணி சாதனை 
• பாகிஸ்தானுக்கு எதிரான T20I தொடருக்கான இலங்கை மகளிர் குழாம் அறிவிப்பு
• விஷ்மி – ஹர்ஷிதாவின் அபார சதங்களால் பாகிஸ்தானை வீழ்த்தியது இலங்கை

இதனைத் தொடர்ந்து 177 ஓட்டங்கள் என்ற இமாலய இலக்குடன் களமிறங்கிய இலங்கை அணிக்கு, சமரி அத்தபத்து மற்றும் இமேஷா துலானி ஜோடி அதிரடியான ஆரம்பத்தை அளித்தது. இந்த ஜோடி முதல் விக்கெட்டுக்கு 43 பந்துகளில் 78 ஓட்டங்களைக் குவித்தது. தனது வழக்கமான அதிரடி ஆட்டத்தை வெளிப்படுத்திய சமரி அத்தபத்து, 5 பவுண்டரிகள் மற்றும் 2 சிக்ஸர்களுடன் 22 பந்துகளில் 39 ஓட்டங்கள் எடுத்து ஆட்டமிழந்தார்.

அதனைத் தொடர்ந்து இலங்கை அணி சீரான இடைவெளியில் விக்கெட்டுகளை அடுத்தடுத்து இழந்தபோதிலும், இமேஷா துலானியின் பொறுப்பான ஆட்டத்தால் போட்டியைத் தன் கட்டுப்பாட்டிலேயே வைத்திருந்தது. மிகச்சிறப்பான ஆட்டத்தை வெளிப்படுத்திய துலானி, சர்வதேச T20 போட்டிகளில் தனது முதல் சதத்தைப் பதிவு செய்து வரலாற்று சாதனை படைத்தார். சமரி அத்தபத்துவிற்குப் பிறகு சர்வதேச T20 போட்டிகளில் சதமடித்த 2ஆவது இலங்கை வீராங்கனையாக இடம்பிடித்தார்.

துலானி 64 பந்துகளில் 17 பவுண்டரிகள் மற்றும் ஒரு சிக்ஸருடன் 101 ஓட்டங்ள் எடுத்து இறுதிவரை ஆட்டமிழக்காமல் களத்தில் இருந்தார். இறுதியில் இலங்கை மகளிர் அணி 6 விக்கெட்டுகள் வித்தியாசத்தில் வெற்றி பெற்று தொடரில் 1-0 என முன்னிலை பெற்றுள்ளது.

இவ்விரு அணிகளுக்கும் இடையிலான 2ஆவது T20I போட்டி 02ஆம் திகதி இதே மைதானத்தில் நடைபெறவுள்ளது.

>>மேலும் கிரிக்கெட் செய்திகளைப் படிக்க<<