IPL එකට අලුතින් කණ්ඩායම් දෙකක් වෙනුවට එකක්

625

ඉන්දීය ප්‍රිමියර් ලීග් තරගාවලිය සඳහා නව කණ්ඩායම් දෙකක් ඇතුළත් කිරීමට ඉන්දීය ක්‍රිකට් ආයතනය පසුගිය මාසයේ දී තීරණය කළා. කෙසේ වෙතත් ඉන්දීය ක්‍රිකට් ආරංචි මාර්ග පවසා ඇත්තේ තරගාවලිය සඳහා එක් කණ්ඩායමක් පමණක් එක්වනු ඇති බවයි.

ඉන්දීය ක්‍රිකට් ආයතනයේ වාර්ෂික මහා සභා රැස්වීම පසුගිය දෙසැම්බර් මාසයේ දී අහමදාබාද්හිදී පැවැත්වුනා. එහි දී එම ආයතනය නව කණ්ඩායම් දෙකක් ඉන්දීය ප්‍රිමියර් ලීග් තරගාවලිය සඳහා එක් කිරීමට අනුමැතිය ලබා දී තිබුණා. කෙසේ වෙතත් පවතින තත්ත්වය සහ ඉදිරියේ දී ඇති විය හැකි තත්ත්වයන් පිළිබඳව සැලකිල්ලට ගනිමින් එක් කණ්ඩායමක් පමණක් තරගාවලිය සඳහා එක් කිරීමට ක්‍රිකට් ආයතනය තීරණය කර ඇති බව වාර්තා වෙනවා.

තරගාවලියට එක් කණ්ඩායමක් පමණක් හඳුන්වා දීමෙන් පසුව එක්වන 10 වැනි කණ්ඩායම සඳහා වඩා හොඳ වටිනාකමක් ලබා ගැනීමට මණ්ඩලය අපේක්ෂා කරනවා. එකවර කණ්ඩායම් දෙකටම ලංසු කැඳවීමෙන් පවත්නා වෙළඳපොළ තත්ත්වයන්හි වටිනාකම පහළ යා හැකි බව ඔවුන්ගේ මතයයි.

ඒ වගේම කණ්ඩායම් දෙකක් ඇතුළත් කිරීමත් එක්ක වැඩි වන තරග සංඛ්‍යාව ඉන්දීය ක්‍රිකට් ආයතනයට විශාල ගැටලුවක් වෙලා තිබුණා. කාර්‍යබහුල ජාත්‍යන්තර ක්‍රිකට් කැලැන්ඩරයත් එක්ක මේ තරග සියල්ල පවත්වන්න තරගාවලියේ ආකෘතිය වෙනස් කළ යුතු වීම එයට හේතුවයි. 

තරගාවලියේ ආකෘතිය වෙනස් කළහොත් තරගාවලිය සඳහා වත්මන් සත්කාරකත්වය දරන ආයතනවලට යම් ගැටලුකාරී තත්ත්වයක් ඇතිවිය හැකි වීම ක්‍රිකට් ආයතනයේ අවධානයට යොමුව තිබෙනවා. 

තවත් ක්‍රිකට් පුවත්:

තරගාවලිය සඳහා කණ්ඩායම් 9ක් පමණක් සහභාගී වන්නේ නම් තරග සංඛ්‍යාව 74ක් දක්වා අඩුවන අතර පවතින කාලසීමාව අනුව එය පැවැත්විය හැකි මට්ටමක පවතින බව ක්‍රිකට් ආයතනයේ මතය වී තිබේ. 

ජාත්‍යන්තර ක්‍රිකට් කවුන්සලය විසින් මේ වන විට ඉදිරි වසර දෙක සඳහා වන අනාගත සංචාර වැඩසටහන හෙවත් Future Tours Program (FTP) සකස් කරමින් සිටින අතර ඉන්දීය ප්‍රිමියර් ලීග් තරගාවලිය අවම වශයෙන් මාසයක කාලයකින් දීර්ඝ කිරීමට ඉන්දීය ක්‍රිකට් ආයතනය ඉල්ලීමක් කර තිබෙනවා. 

නව කණ්ඩායම සඳහා වන ලංසු තැබීම මෙම වසරේ අවසන් කාර්තුවේ දී සිදු කිරීමට නියමිතව ඇත.

මේ අතර පසුගිය ඉන්දීය ප්‍රිමියර් ලීග් තරගාවලි සඳහා සහභාගී වුන Deccan Chargers කණ්ඩායම සහ Kochi Tuskers කණ්ඩායමට තහනමක් පනවලා තිබුණා. ඒ කණ්ඩායම් ගැන අවසන් තීරණයක් ගැනීමටත් නියමිත බව වාර්තා වෙනවා.

නව කණ්ඩායමට සත්කාරකයන් සොයා ගැනීම සඳහා වන ටෙන්ඩර් කැඳවීම එළඹෙන මාර්තු මාසයේ දී අවසන් කිරීමටත් නියමිතයි.

2023 ලෝක කුසලාන තරගාවලිය මීට පෙර පෙබරවාරි – මාර්තු කාලය තුල පැවැත්වීමට නියමිතව තිබුනත් පසුව එය ඔක්තෝබර් – නොවැම්බර් මාසයට කල් දැමීමට ජාත්‍යන්තර ක්‍රිකට් ආයතනය තීරණය කළා.

ඒ නිසා එම වසරේ ඉන්දීය ප්‍රිමියර් ලීග් තරගාවලිය පවත්වන්න වඩාත් විශාල කවුළුවක් පවතිනු ඇති බව ඉන්දීය ක්‍රිකට් ආයතනයේ මතයයි.

කෙසේ වෙතත් ඉන්දීය ප්‍රිමියර් ලීග් තරගාවලියට එක්වෙන නව කණ්ඩායම් දෙක නියෝජනය කරන ප්‍රාන්ත දෙක ඉන්දීය ක්‍රිකට් ආයතනය තවමත් නම් කරලා නැහැ. 

මේ මාධ්‍ය වාර්තා ගැන ඉන්දීය ක්‍රිකට් ආයතනය ඔවුන්ගේ අවසන් තීරණය තවමත් නිල වශයෙන් ප්‍රකාශ කර නැහැ.

Hindustan Times ඇසුරිනි 

>> තවත් ක්‍රිකට් පුවත් සඳහා පිවිසෙන්න <<