LPL 2026 தொடர்; முதல் இறுதிப் போட்டிக்கு தெரிவான ஜப்னா கிங்ஸ்

லங்கா பிரீமியர் லீக் (LPL) 2026 தொடரின் முதலாவது கொலிபையர் (Qualifier 1) போட்டியில் கோல் கெலன்ட்ஸ் அணியை 14 ஓட்டங்களால் வீழ்த்தி ஜப்னா கிங்ஸ் அணியானது, LPL  2026 தொடரின் இறுதிப்போட்டிக்கு தெரிவாகிய முதல் அணியாக மாறியிருக்கின்றது.  

>>பாகிஸ்தான் கிரிக்கெட் அணிக்கு புதிய துடுப்பாட்டப் பயிற்சியாளர்

கொழும்பு ஆர். பிரேமதாச மைதானத்தில் இன்று (05) மாலை நடைபெற்ற இந்த பரபரப்பான கொலிபையர் ஆட்டத்தில் நாணய சுழற்சியில் வென்ற கோல் கெலன்ட்ஸ் அணி முதலில் பந்துவீச்சை தேர்வு செய்தது.

அதன்படி முதலில் துடுப்பாடிய ஜப்னா கிங்ஸ் நிர்ணயிக்கப்பட்ட 20 ஓவர்களில் 2 விக்கெட்டுக்களை மட்டுமே இழந்து 242 ஓட்டங்கள் என்ற பிரம்மாண்ட ஓட்டங்களை அடைந்தது. இது LPL தொடர் வரலாற்றில் ஒரு அணியின் அதிகபட்ச மொத்த ஓட்டங்களாகப் பதிவானது. ஜப்னா அணியின் ஆரம்ப வீரர் கமில் மிஷார அதிரடியாக விளையாடி 55 பந்துகளில் 10 பௌண்டரிகள் மற்றும் 7 சிக்ஸர்களுடன் ஆட்டமிழக்காமல் 108 ஓட்டங்கள் குவித்து தன்னுடைய முதல் T20 சதத்தைப் பதிவு செய்தார். இவருக்கு உறுதுணையாக கவாஜா நபாய் 32 பந்துகளில் 54 ஓட்டங்களும், தவ்ஹீத் ரிதோய் வெறும் 21 பந்துகளில் 5 சிக்ஸர்களுடன் ஆட்டமிழக்காமல் 54 ஓட்டங்களும் விளாசினார்.

கோல் அணியின் பந்துவீச்சாளர்களில் ஆகிப் ஜாவேத் மட்டும் ஒரு விக்கெட்டைக் கைப்பற்றினார்.

243 ஓட்டங்கள் என்ற கடின இலக்கை நோக்கி களமிறங்கிய கோல் கெலண்ட்ஸ் அணி தொடக்கம் முதலே அதிரடி ஆட்டத்தை வெளிப்படுத்தியது. சேம் ஹார்பர் 21 பந்துகளில் 44 ஓட்டங்களும், சரித் அசலங்க 27 ஓட்டங்கள் பெற்று சிறந்த ஆரம்பம் தந்த போதும், மத்திய வரிசைக்கு மொஹமட் சிராஸ் நெருக்கடி உருவாக்கினார்.  இறுதியில் கோல் அணியினால் 20 ஓவர்களில் 8 விக்கெட் இழப்பிற்கு 228 ஓட்டங்கள் மட்டுமே எடுக்க முடிந்தது.

>>இலங்கைக்கு எதிரான டெஸ்ட் தொடரில் இருந்து நீங்கும் ஜஸ்பிரிட் பும்ரா

கோல் துடுப்பாட்டத்தில் மத்திய வரிசையில் சாமிக்க கருணாரட்ன 39 ரன்களும், அணித்தலைவர் தசுன் ஷானக்க 34 ஓட்டங்களும் எடுத்து அணியை வெற்றிப் பாதைக்குக் கொண்டு செல்லப் போராடியிருந்தனர்.

ஜப்னா கிங்ஸ் அணியின் பந்துவீச்சில் மொஹமட் சிராஸ் 32 ஓட்டங்களுக்கு 3 விக்கெட்டுக்களையும், லிசார்ட் வில்லியம்ஸ் 2 விக்கெட்டுக்களையும் வீழ்த்தினர்.

சதமடித்து ஜப்னா அணியின் வெற்றிக்கு வித்திட்ட கமில் மிஷார போட்டியின் ஆட்டநாயகனாகத் தேர்ந்தெடுக்கப்பட்டார். இந்த வெற்றியின் மூலம் ஜப்னா கிங்ஸ் நேரடியாக இறுதிப்போட்டிக்கு முன்னேறிய நிலையில், தோல்வியடைந்த கோல் அணி இறுதிப்போட்டிக்குச் செல்ல இரண்டாவது கொலிபையர் போட்டியில் விளையாடவுள்ளது.

>>மேலும் கிரிக்கெட் செய்திகளைப் படிக்க<<