இலங்கைக்கு சவால் வழங்கும் மே.இ.தீவுகள் ஜோடியின் இணைப்பாட்டம்

சுற்றுலா இலங்கை – மேற்கிந்திய தீவுகள் இடையிலான இரண்டாவது டெஸ்ட் போட்டியின் மூன்றாம் நாள் ஆட்டநிறைவில் மேற்கிந்திய தீவுகள் அணிக்கு ஷேய் ஹோப் மற்றும் ஜஸ்டின் கீரிவ்ஸ் ஜோடி நம்பிக்க இணைப்பாட்டத்துடன் பெறுமதி சேர்த்து வருகின்றது.

>>செனுஜ, கவிஜவின் போராட்டம் வீண்; இலங்கையை வீழ்த்தியது இந்தியா U19 அணி<<

அன்டிகுவாவில் நடைபெற்று வருகின்ற இந்த டெஸ்ட் போட்டியின் இரண்டாம் நாள் ஆட்டம் நிறைவடையும் போது இலங்கை அணியின் முதலாவது இமலாய இன்னிங்ஸ் (549) துடுப்பாட்டத்தினை ஆரம்பித்த மேற்கிந்திய தீவுகள் தமது முதல் இன்னிங்ஸிற்காக 58 ஓட்டங்களுக்கு ஒரு விக்கெட்டினை இழந்து காணப்பட்டது.

மேற்கிந்திய தீவுகள் தரப்பின் துடுப்பாட்டத்தில் ஜோன் கெம்பல் 31 ஓட்டங்களுடனும், கவேம் ஹொட்கே 06 ஓட்டங்களுடனும் ஆட்டமிழக்காதிருந்தனர்.

இலங்கையை விட 491 ஓட்டங்களால் பின்தங்கி காணப்பட்டு போட்டியின் மூன்றாம் நாளில் துடுப்பாட்டத்தினை தொடர்ந்த மேற்கிந்திய தீவுகள் அணியானது நேர்த்தியான ஆரம்பம் ஒன்றினைப் பெற்றுக் கொண்டது.

அதன்படி ஆரம்பத் துடுப்பாட்டவீரர்களில் ஒருவரான ஜோன் கெம்பல் அரைச்சதம் விளாசி மேற்கிந்திய தீவுகளை முன்னோக்கி நகர்த்தியிருந்தார். எனினும் அவரது விக்கெட் மூன்றாம் நாளின் மதிய போசணத்திற்கு முன்னதாக அசித பெர்னாண்டோவின் பௌன்சர் பந்தில் பறிபோனது. மிட் விக்கெட் திசையில் பந்தினை அடித்த கெம்பல் தினேஷ் சந்திமாலிடம் பிடிகொடுத்து ஆட்டமிழந்தார். கெம்பல் ஆட்டமிழக்கும் போது 7 பௌண்டரிகள் மற்றும் 2 சிக்ஸர்கள் அடங்கலாக 72 ஓட்டங்கள் பெற்றிருந்தமை குறிப்பிடத்தக்கது.

>>இமாலய முதல் இன்னிங்ஸ் துடுப்பாட்டத்துடன் இரண்டாவது டெஸ்டில் இலங்கை<<

பின்னர் மூன்றாம் நாளின் தேநீர் இடைவேளைக்கு முன்னதாக இரண்டு விக்கெட்டுக்களை துரித கதியில் பறிகொடுத்த மேற்கிந்திய தீவுகள் அணி, 144 ஓட்டங்களுக்கு 4 விக்கெட்டுக்களை இழந்து காணப்பட்டது. இந்த தருணத்தில் மத்தியவரிசை வீரர்களாக ஷேய் ஹோப் மற்றும் ஜஸ்டின் கீரிவ்ஸ் ஆகிய இருவரும் களம் வந்திருந்தனர்.

இந்த வீரர்கள் இருவரும் அணியின் நிலைமையினைக் கருத்திற் கொண்டு பொறுமையுடனும் நிதானத்துடனும் சிறந்த இணைப்பாட்டம் ஒன்றினை உருவாக்கத் தொடங்கினர். இந்த இணைப்பாட்ட முயற்சி வெற்றியளிக்க மூன்றாம் நாள் ஆட்டநிறைவில் மேற்கிந்திய தீவுகள் அணியானது மேலதிக விக்கெட் இழப்புக்கள் ஏதுமின்றி 318 ஓட்டங்களுக்கு 4 விக்கெட்டுக்களை இழந்து காணப்படுகின்றது.

மேற்கிந்திய தீவுகள் துடுப்பாட்டம் சார்பில் ஐந்தாம் விக்கெட் இணைப்பாட்டமாக 174 ஓட்டங்களை உருவாக்கி ஆட்டமிழக்காதிருக்கும் ஷேய் ஹோப் 86 ஓட்டங்களுடனும், ஜஸ்டின் கீரிவ்ஸ் 85 ஓட்டங்களுடனும் காணப்படுகின்றனர்.

மேற்கிந்திய தீவுகள் அணியானது இலங்கையை விட இன்னும் 231 ஓட்டங்கள் பின்தங்கி காணப்படுகின்றது. இலங்கைப் பந்துவீச்சில் பிரபாத் ஜயசூரிய மற்றும் அசித பெர்னாண்டோ ஆகிய இவருவரும் தலா 2 விக்கெட் வீதம் கைப்பற்றியமை குறிப்பிடத்தக்கது.

>>மேலும் கிரிக்கெட் செய்திகளைப் படிக்க<<