கொழும்பு கேப்ஸ் அணிக்கு LPL 2026 தொடரில் முதல் வெற்றி

லங்கா பிரீமியர் லீக் (LPL) 2026 தொடரின் ஐந்தாவது லீக் போட்டியில் கொழும்பு கேப்ஸ் கண்டி ரோயல்ஸ் அணியினை 6 விக்கட்டுக்கள் வித்தியாசத்தில் வீழ்த்தி, இந்தப் பருவத்திற்கான தொடரில் தமது முதல் வெற்றியினைப் பதிவு செய்துள்ளது.

>>LPL 2026 தொடரில் முதல் வெற்றியைப் பதிவு செய்த ஜப்னா கிங்ஸ்<<

LPL 2026 தொடரில் எந்தவித வெற்றிகளையும் பதிவு செய்திருக்காத கண்டி ரோயல்ஸ் மற்றும் கொழும்பு கேப்ஸ் அணிகள் முதல் வெற்றி வேட்கையுடன் மோதிய போட்டி நேற்று (19) கொழும்பு SSC மைதானத்தில் நடைபெற்றது.

போட்டியின் நாணய சுழற்சியில் வென்ற கொழும்பு கேப்ஸ் முதலில் பந்துவீச்சை தேர்வு செய்தது.  இதனால் முதலில் துடுப்பெடுத்தாடிய கண்டி ரோயல்ஸ், நிர்ணயிக்கப்பட்ட 20 ஓவர்களில் அனைத்து விக்கெட்டுக்களையும் இழந்து 179 ஓட்டங்கள் பெற்றது.

கண்டி ரோயல்ஸ் துடுப்பாட்டத்தில் ஆரம்ப வீரர்களில் ஒருவரான லஹிரு உதார அரைச்சதம் விளாசியதோடு 36 பந்துகளில் ஒரு சிக்ஸர் மற்றும் 8 பௌண்டரிகள் அடங்கலாக 53 ஓட்டங்கள் பெற்றார். இதேநேரம் அதிரடியாக ஆடிய மொயின் அலி 17 பந்துகளில் 4 சிக்ஸர்கள் மற்றும் ஒரு பௌண்டரி அடங்கலாக 41 ஓட்டங்கள் பெற்றார். எனினும் கலந்த அதிரடியில் ஆடிய அஞ்செலோ மெதிவ்ஸ் 41 பந்துகளில் 45 ஓட்டங்கள் பெற்றார்.

கொழும்பு கேப்ஸ் பந்துவீச்சில் பினுர பெர்னாண்டோ 4 விக்கெட்டுக்களையும், ஹசன் மஹ்மூட் 3 விக்கெட்டுக்களையும் கைப்பற்றினார்.

>>தொடர் வெற்றிகளுடன் LPL தொடரில் முன்னேறும் கோல் கெலன்ட்ஸ்<<

பின்னர் 180 ஓட்டங்கள் என்கிற வெற்றி இலக்கை நோக்கி பதிலுக்கு துடுப்பாடிய கொழும்பு கேப்ஸ் அணி தொடக்கத்தில் இருந்தே தடுமாறி ஒரு கட்டத்தில் 67 ஓட்டங்களில் 4 விக்கெட்டுக்களை இழந்து நெருக்கடியை அடைந்தது.

எனினும் இந்த தருணத்தில் இணைப்பாட்டம் உருவாக்கத் தொடங்கிய ஜேம்ஸ் நீஷம் மற்றும் ஜனித் லியனகே ஜோடி பொறுப்பான ஆட்டத்தோடு அணியினை வெற்றிப்பாதைக்கு அழைத்துச் சென்றது.

இரண்டு வீரர்களும் ஐந்தாம் விக்கெட் இணைப்பாட்டமாக 112 ஓட்டங்களைப் பகிர, கொழும்பு கேப்ஸ் 19.4 ஓவர்களில் 4 விக்கெட்டுக்களை இழந்து 182 ஓட்டங்களுடன் போட்டியின் வெற்றி இலக்கை அடைந்தது.

இதில் ஜனித் லியனகே ஒரு சிக்ஸர் மற்றும் 6 பௌண்டரிகள் அடங்கலாக 53 ஓட்டங்கள் எடுக்க, ஜேம்ஸ் நீஷம் 48 ஓட்டங்கள் பெற்றிருந்தார். கண்டி ரோயல்ஸ் பந்துவீச்சில் வனிந்து ஹஸரங்க 2 விக்கெட்டுக்களைச் சாய்த்தும் அது வீணாகியது. போட்டியின் ஆட்டநாயகனாக கொழும்பு கேப்ஸ் அணியின் ஜனித் லியனகே தெரிவாகியிருந்தார்.

>>மேலும் கிரிக்கெட் செய்திகளைப் படிக்க<<