தொடர் வெற்றிகளுடன் LPL தொடரில் முன்னேறும் கோல் கெலன்ட்ஸ்

லங்கா பிரீமியர் லீக் (LPL) 2026 தொடரின் மூன்றாவது லீக் போட்டியில் கொழும்பு கேப்ஸ் அணியை 5 விக்கட்டுக்கள் வித்தியாசத்தில் வீழ்த்தி, கோல் கெலன்ட்ஸ் தனது இரண்டாவது தொடர் வெற்றியைப் பதிவு செய்துள்ளது.

>>LPL 2026 தொடரினை வெற்றியுடன் தொடக்கம் செய்த கோல் கெலன்ட்ஸ்<<

கொழும்பு SSC மைதானத்தில் நடைபெற்ற இப்போட்டியில் தசுன் ஷானக்க தலைமையிலான கோல் கெலன்ட்ஸ் அணி நாணய சுழற்சியில் வென்று முதலில் பந்துவீச்சை தேர்வு செய்தது.

எனவே எதிரணியால் பணிக்கப்பட்டு முதலில் துடுப்பெடுத்தாடிய கொழும்பு கேப்ஸ் அணி, நிர்ணயிக்கப்பட்ட 20 ஓவர்களில் 8 விக்கெட்டுகளை இழந்து 189 ஓட்டங்கள் பெற்றது.

கேப்ஸ் துடுப்பாட்டத்தில் ஆரம்ப வீரர்களில் ஒருவரான ருபின் ஹெர்மன் (1) ஏமாற்றமளித்தாலும், ஏனைய ஆரம்பத் துடுப்பாட்ட வீரரான குசல் மெண்டிஸ் அதிரடியாக விளையாடி அணியை முன்னிறுத்தினார். 53 பந்துகளை எதிர்கொண்ட மெண்டிஸ் 7 அபார சிக்ஸர்கள் மற்றும் 2 பெளண்டரிகளுடன் 79 ஓட்டங்கள் குவித்தார். அவருக்கு பக்கபலமாக Impact வீரராக வந்து ஆடிய பென் மெக்டெர்மொட் 34 பந்துகளில் 6 பெளண்டரிகள் மற்றும் 2 சிக்ஸர்களோடு 57 ஓட்டங்கள் விளாசினார். அத்துடன் இந்த ஜோடி நான்காவது விக்கெட் இணைப்பாட்டமாக 97 ஓட்டங்களும் சேர்த்து வலுவான அடித்தளமிட்டது.

கோல் அணியின் பந்துவீச்சில் ஆகிப் ஜாவேட் சிறப்பாக பந்துவீசி கொடுத்து 4 விக்கெட்டுக்களைக் கைப்பற்றினார்.

பின்னர் 190 ஓட்டங்கள் என்கிற கடின வெற்றி இலக்கை நோக்கி களம் இறங்கிய கோல் கெலன்ட்ஸ் அணிக்கு, சேம் ஹார்ப்பர் அதிரடியான தொடக்கத்தை வழங்கினார்.

ஹார்ப்பர் 45 பந்துகளில் 6 பெளண்டரிகள், 3 சிக்ஸர்கள் அடங்கலாக 65 ஓட்டங்கள் குவித்து அணியின் வெற்றிப் பாதைக்கு சிறந்த தொடக்கம் வழங்கினார். அவருக்கு ஆதரவாக சரித் அசலங்க 28 ஓட்டங்கள் எடுத்தார்.

பின்னர் ஆட்டம் பரபரப்பான நிலையை எட்டியபோது, சஹான் ஆராச்சிகே அதிரடி ஆட்டத்தை வெளிப்படுத்தி அணியை வெற்றிக்கு அழைத்துச் சென்றார். அவர் வெறும் 16 பந்துகளில் 7 பெளண்டரிகளுடன் 38 ஓட்டங்கள் எடுத்து இறுதிவரை ஆட்டமிழக்காமல் இருந்தார்.

இறுதியில் கோல் கெலன்ட்ஸ் அணி 19.2 ஓவர்களில் 5 விக்கெட்டுகளை மாத்திரம் இழந்து 191 ஓட்டங்கள் எடுத்து, 5 விக்கெட்டுகள் வித்தியாசத்தில் வெற்றி பெற்றது.

கொழும்பு கேப்ஸ் அணியின் பந்துவீச்சில் ஹசன் மஹ்மூத் மற்றும் வனுஜ சஹான் ஆகியோர் தலா 2 விக்கெட்டுக்கள் வீதம் வீழ்த்தி எதிரணிக்கு நெருக்கடி ஏற்படுத்தினர்.

போட்டியின் ஆட்டநாயகனாக கோல் கெலன்ட்ஸ் அணியின் சேம் ஹார்ப்பர் தெரிவாகியிருந்தார்.

>>மேலும் கிரிக்கெட் செய்திகளைப் படிக்க<<