ශ්‍රී ලංකා කණ්ඩායමේ දකුණු අප්‍රිකානු සංචාරය සඳහා එක්ව සිටින ශ්‍රී ලංකා ක්‍රිකට් ක්‍රීඩකයින් කිහිපදෙනෙක්ම පළමු ටෙස්ට් තරගයේ දී ආබාධයන් වලට ලක්විය. එම ක්‍රීඩකයින්ට අමතරව සුරංග ලක්මාල්, දිනේෂ් චන්දිමාල් සහ ඕෂධ ප්‍රනාන්දු හටද Johannesburgහි දී පැවැත්වීමට නියමිත දෙවන ටෙස්ට් ක්‍රිකට් තරගය මඟ හැරෙන බව වාර්තා වේ.
තරගාවලිය ආරම්භ කරමින් දෙරට අතර Centurion හිදී පැවති පළමු ටෙස්ට් ක්‍රිකට් තරගයෙන් ඉනිමක සහ ලකුණු 45ක දැවැන්ත පරාජයක් සඳහා උරුමකම් කීමට ශ්‍රී ලංකාවට සිදුවිය. එම තරගය අතරතුර දී ධනංජය ද සිල්වා, කසුන් රාජිත සහ ලහිරු කුමාර යන ක්‍රීඩකයින් ආබාධයන් වලට මුහුණදුන් නිසාවෙන් තරගයේ අවසානය දක්වා ක්‍රීඩා කිරීමට ඔවුන්ට නොහැකි විය. අවසානයේ දී දිනේෂ් චන්දිමාල් සහ එම තරගයේ ටෙස්ට් වරම් දිනාගත් වනිඳු හසරංග යන දෙදෙනා ද ආබාධයන් වලට ලක්විය.
තවත් ක්‍රිකට් පුවත් කියවන්න:
- පරුෂ වචනයේ ඵල විපාක!
- Yadav නැවතත් ඉන්දියාවට; සංචිතයේ වෙනසක්
- ශ්‍රී ලංකා ක්‍රිකට් ක්‍රීඩක නව කොන්ත්‍රාත්තුවට දින නියම වෙයි
කෙසේ නමුත් පළමු ටෙස්ට් තරගයේ දී දක්ෂ ලෙස පිතිකරණයේ නිරත වුනු චන්දිමාල්ගේ ඉඟටිය ආශ්‍රිතව මතුව තිබෙන ආබාධය නිසා ඔහුට දෙවන තරගය ද මඟ හැරීමට වැඩි ඉඩක් තිබෙන අතර වනිඳුගේ සහභාගීත්වය ද යම් අවිනිශ්චිත මට්ටමකට පැමිණ තිබෙන බව ThePapare.com වෙත ලැබුනු විශ්වාසදායී ආරංචි මාර්ග පවසා සිටියි.
“සුරංග ලක්මාල් දෙවන ටෙස්ට් තරගයට කලින් තිබ්බ යෝග්‍යතා පරීක්ෂණය අසමත් වෙලා තියෙනවා. දැන් අපි ඔහුව කළමනාකරණය කරමින් ඉන්නේ, මොකද එහෙම නැති වුනොත් ඔහුගේ ආබාධය තවත් වැඩි වෙන්න පුළුවන්. ඒ වගේම මේ වගේ ආබාධ ගොඩක් එක පාර මම දැක්කමයි. අපි මාස 10කට වගේ පස්සේ තමයි ජාත්‍යන්තර ක්‍රිකට් පිටියට ආවේ. ඒක තමයි මේකට හේතුව.” යැයි ශ්‍රී ලංකා ක්‍රිකට් කණ්ඩායමේ කණ්ඩායම් කළමනාකරු අසන්ත ද මෙල් මහතා ESPN Cricinfo වෙබ් අඩවිය වෙත පැවසීය.
ඕෂද ප්‍රනාන්දු LPL තරගාවලියේ පළමු තරගයේ දී ආබාධයකට ලක්වූ අතර ඔහුට සිදුකළ MRI පරීක්ෂණයට අනුව ඔහුව දෙවන ටෙස්ට් තරගය සඳහා ක්‍රීඩා කිරීමට හැකි බව වෛද්‍යවරුන් පවසා සිටි නමුත් දැනට තිබෙන තත්වය අනුව ඔහුට දෙවන ටෙස්ට් තරගය සඳහා ද උචිත ශාරීරික යෝග්‍යතාවයක් නොමැත.
ඒ අනුව තරගාවලියට පෙරම ඇන්ජලෝ මැතිව්ස් ආබාධයකට ලක්වූ අතර අනතුරුව ඕෂධ ප්‍රනාන්දු, සුරංග ලක්මාල්, ධනංජය ද සිල්වා, ලහිරු කුමාර, දිනේෂ් චන්දිමාල් සහ කසුන් රාජිත යන ක්‍රීඩකයින් 7 දෙනා ආබාධයන් වලට ලක්විය.
පළමු ටෙස්ට් තරගයට ක්‍රීඩා කළ ශ්‍රී ලංකා කණ්ඩායම – දිමුත් කරුණාරත්න (නායක), කුසල් පෙරේරා, කුසල් මෙන්ඩිස්, දිනේෂ් චන්දිමාල්, ධනංජය ද සිල්වා, නිරෝෂන් දික්වැල්ල, දසුන් ශානක, වනිඳු හසරංග, විශ්ව ප්‍රනාන්දු, කසුන් රාජිත, ලහිරු කුමාර.
සංචිතයේ සිටින දැනට ආබාධයන් වලට ලක්ව නොසිටින ක්‍රීඩකයින් – ලහිරු තිරිමාන්න, මිනෝද් භානුක, සන්තුෂ් ගුණතිලක, දිල්රුවන් පෙරේරා, ලසිත් ඇඹුල්දෙණිය, දුෂ්මන්ත චමීර, අසිත ප්‍රනාන්දු.
ඒ අනුව දෙවන ටෙස්ට් තරගය සඳහා දුෂ්මන්ත චමීර සහ අසිත ප්‍රනාන්දු ක්‍රීඩා කිරීමට වැඩි ඉඩක් තිබෙන අතර පිතිකරුවන් ලෙස මිනෝද් භානුක හෝ ලහිරු තිරිමාන්න කණ්ඩායමට එක්වීමට වැඩි ඉඩක් තිබේ. යම් හෙයකින් වනිඳු හසරංග හටද ක්‍රීඩා කිරීමට නොහැකි වුවහොත් ලසිත් ඇඹුල්දෙණිය හෝ දිල්රුවන් පෙරේරා කණ්ඩායමට පැමිණීමට වැඩි ඉඩක් ඇත. අසිත සහ මිනෝද් ශ්‍රී ලංකාව වෙනුවෙන් තවමත් ටෙස්ට් වරම් දිනාගෙන නොමැත.
>> තවත් ක්‍රිකට් පුවත් සඳහා පිවිසෙන්න <<
