நவம்பர் 19ஆம் திகதி வெலிங்டனில் ஆரம்பமாகும் இந்தியாவுக்கு எதிரான இரண்டு போட்டிகள் கொண்ட டெஸ்ட் தொடரில் ஆடும் நியூசிலாந்து குழாம் வெளியிடப்பட்டிருக்கின்றது.
முதல் டெஸ்ட் போட்டியில் தொடர்ந்தும் ஆதிக்கம் செலுத்தும் பாகிஸ்தான்
அதன்படி வெளியிடப்பட்டிருக்கும் நியூசிலாந்து குழாத்தில் முக்கிய வீரர்களான ரச்சின் ரவீந்திரா, டெவோன் கொன்வே மற்றும் டொம் ப்ளன்டெல் ஆகியோர் உபாதை பாதிப்புகளுக்குப் பின்னர் இணைக்கப்பட்டுள்ளனர்.
இந்தியாவுக்கு எதிரான T20 தொடருக்கு முன்னதாக விளம்பரப் படப்பிடிப்பின் போது ரச்சின் ரவீந்திரா உபாதைக்கு முகம் கொடுத்திருந்தார். இதனால் அவர் இந்தியாவிற்கு எதிரான மட்டுப்படுத்தப்பட்ட ஓவர்கள் கொண்ட தொடர்களில் ஆடவில்லை. அதேநேரம் டெவோன் கொன்வே தலை உபாதையில் (Concussion) இருந்து மீண்டுவந்த வேளையில், டொம் ப்ளன்டெல் தசை உபாதைக்கு சிகிச்சை பெற்று வந்திருந்தமை குறிப்பிடத்தக்கது. அதேசமயம், டொம் லேதம் தலைமையிலான இந்த அணியில் ஜேக்கப் டப்(f)பி மீண்டும் இணைந்துள்ளார்.
அதேவேளை நியூசிலாந்து தரப்பினை இந்திய தொடரில் இருந்து BJ வாட்லிங் துடுப்பாட்டப் பயிற்சியாளராக வழிநடாத்தவிருக்கின்றமை சுட்டிக்காட்டத்தக்கது.
நியூசிலாந்து அணி தற்போது ஐ.சி.சி. இன் உலக டெஸ்ட் சம்பியன்ஷிப் புள்ளிப்பட்டியலில் முதலிடத்தில் உள்ளது. இந்தியாவுக்கு எதிரான இரண்டு டெஸ்ட் போட்டிகளுக்குப் பிறகு, அவ்வணி டிசம்பர்-ஜனவரி மாதங்களில் அவுஸ்திரேலியாவுக்கு எதிராக நான்கு போட்டிகள் கொண்ட தொடரிலும், பெப்ரவரியில் இலங்கைக்கு எதிராக இரண்டு போட்டிகள் கொண்ட தொடரிலும் விளையாடவுள்ளது.
நியூசிலாந்து டெஸ்ட் குழாம்
டொம் லேதம் (தலைவர்), டொம் ப்ளன்டல் (விக்கெட்காப்பாளர்), டெவோன் கொன்வே, ஜேக்கப் டப்(f)பி, மேட் ஹென்ரி, கைல் ஜேமிசன், டெரைல் மிச்சல், ஹென்றி நிக்கோல்ஸ், கிளன் பிலிப்ஸ், ரச்சின் ரவீந்திரா, மிச்சல் சாண்ட்னர், நதன் ஸ்மித், ப்ளையர் டிக்னர், வில் யங்
>>மேலும் கிரிக்கெட் செய்திகளைப் படிக்க<<
