முதல் டெஸ்ட் போட்டியில் தொடர்ந்தும் ஆதிக்கம் செலுத்தும் பாகிஸ்தான்

சுற்றுலா இலங்கை – பாகிஸ்தான் அணிகள் இடையிலான முதல் டெஸ்ட் போட்டியின் இன்றயை இரண்டாம் நாள் ஆட்டமும் போதிய வெளிச்சமின்மை காரணமாக நிறைவுக்கு வந்திருக்கின்றது.  

ஆப்கானிடமும் தோற்று அரையிறுதி வாய்ப்பை இழந்தது இலங்கை U19 அணி

இன்றைய நாள் ஆட்ட முடிவின் போது தமது முதல் இன்னிங்ஸில் துடுப்பாடி வரும் இலங்கை வீரர்கள் 114 ஓட்டங்களுக்கு 3 விக்கெட்டுக்களை இழந்து காணப்படுகின்றனர்.  

ராவல்பிண்டியில் நடைபெற்று வரும் இந்த டெஸ்ட் போட்டியின் முதல் நாள் ஆட்டம் நேற்று (09) நிறைவடையும் போது, பாகிஸ்தான் 281 ஓட்டங்களுக்கு 5 விக்கெட்டுக்களை இழந்து காணப்பட்டது. சௌத் சகீல் 57 ஓட்டங்களுடனும், காஸி கோரி 07 ஓட்டங்களுடனும் இருந்தனர்.  

இன்று (10) போட்டியின் இரண்டாம் நாளில் தமது முதல் இன்னிங்ஸ் துடுப்பாட்டத்தினை தொடர்ந்த பாகிஸ்தான் அணிக்கு களத்தில் நின்ற இரண்டு வீரர்களும் சிறந்த தொடக்கத்தினை வழங்கினர்.  

இரண்டு வீரர்களும் பாகிஸ்தான் அணியின் ஆறாம் விக்கெட் இணைப்பாட்டமாக 96 ஓட்டங்கள் பகிர்ந்த நிலையில், அரைச்சதத்தினை நெருங்கிய காஸி கோரி 48 ஓட்டங்களுடன் டில்சான் மதுசங்கவின் பந்துவீச்சில் ஆட்டமிழந்தார். ஆனால் சௌத் சகீல் தொடர்ந்தும் பாகிஸ்தான் தரப்பினை முன்னெடுத்துச் சென்றார்.  

அவருக்கு உறுதுணையாக வந்த அரபாத் மின்ஹாஸ் பொறுப்பாக ஆடி அரைச்சதம் விளாசினார். எனினும் சதத்தை நெருங்கிய சௌத் சகீல் 9 பௌண்டரிகள் அடங்கலாக 93 ஓட்டங்கள் பெற்று ஆட்டமிழந்தார்.  

சௌத் சக்கீலின் பின்னர் பாகிஸ்தான் அணியானது 434 ஓட்டங்களுக்கு 9 விக்கெட்டுக்களை இழந்து காணப்பட்ட நிலையில் தமது முதல் இன்னிங்ஸ் ஆட்டத்தினை நிறுத்திக் கொண்டது. பாகிஸ்தான் அணியின் துடுப்பாட்டத்தில் அரபாத் மின்ஹாஸ் 9 பௌண்டரிகள் மற்றும் ஒரு சிக்ஸர் அடங்கலாக 52 ஓட்டங்கள் எடுத்தார்.  

இலங்கை அணியின் பந்துவீச்சில் டில்சான் மதுசங்க மற்றும் அசித பெர்னாண்டோ ஆகியோர் தலா 3 விக்கெட்டுக்கள் வீதம் சாய்த்திருந்தமை குறிப்பிடத்தக்கது. இப்போட்டி மூலம் அசித பெர்னாண்டோ டெஸ்ட் போட்டிகளில் 100 விக்கெட்டுக்கள் என்கிற மைல்கல்லினையும் எட்டியிருந்தார்.  

முதல்நாளில் முன்வரிசை வீரர்களுடன் பலம் பெற்ற பாகிஸ்தான் அணி

பாகிஸ்தானை அடுத்து தமது முதல் இன்னிங்ஸ் துடுப்பாட்டத்தினை ஆரம்பம் செய்த இலங்கை அணி தொடக்கத்தில் தடுமாறிய போதும் லஹிரு உதார, கமிந்து மெண்டிஸ் ஆகியோரது பொறுப்பான ஆட்டத்துடன் போட்டியின் இரண்டாம் நாள் ஆட்டநிறைவில் 114 ஓட்டங்களுக்கு 3 விக்கெட்டுக்களை இழந்து காணப்படுகின்றது.  

இலங்கை அணியின் சார்பில் களத்தில் காணப்படும் கமிந்து மெண்டிஸ் 40 ஓட்டங்களுடனும், தனஞ்சய டி சில்வா 22 ஓட்டங்களுடனும் உள்ளனர். இலங்கை அணியின் ஆட்டமிழந்த வீரர்களில் லஹிரு உதார 41 ஓட்டங்கள் பெற்றிருந்தார். இலங்கை அணி முதல் இன்னிங்ஸில் தற்போது பாகிஸ்தானை விட 320 ஓட்டங்கள் பின்தங்கியிருக்கின்றது. பாகிஸ்தான் அணியின் பந்துவீச்சில் சகிப் கான் 2 விக்கெட்டுக்களையும், மொஹமட் அப்பாஸ் ஒரு விக்கெட்டினையும் கைப்பற்றியிருந்தனர்.  

போட்டியின் சுருக்கம் 

>>மேலும் கிரிக்கெட் செய்திகளைப் படிக்க<<