කෝප වූ ගේල් අංක එකේ T20 පන්දු යවන්නා මට්ටු කළ හැටි

30452
 

විස්සයි විස්ස තරග ආකෘතිය උඩුයටිකුරු කළ සුවිශේෂී චරිත අතළොස්ස අතුරින් කොදෙව් ආරම්භක පිතිකරු ක්‍රිස් ගේල් හට හිමිවන්නේ ප්‍රමුඛ ස්ථානයකි. ලොව බිහිසුණුම පන්දු යවන්නන් පවා ගේල්ගේ ප්‍රවේගකාරී පිතිහරඹය ඉදිරියේ අන්ත අසරණ වූ අවස්ථා එමට ඉතිහාසය පුරා ඕනෑ තරම් දැක ගත හැකි අතර ඔහු දිනෙන් දින විස්සයි විස්ස තරග රටාවේ වාර්තා පොත් අළුත් කළේ තම විශිෂ්ටත්වය ලොවටම විදහා පාමිනි.

ආසියානු කුසලානය UAE හෝ ලංකාවේ

පිටිය තුල දී පමණක් නොව ඉන් පිටතදීත් ඉතාමත් නිහතමානී චරිතයක් ලෙස කාගේත් ප්‍රසාදය හිමිකරගත් ක්‍රිස් ගේල් ඔහුගේ ක්‍රීඩා දිවියේ වැදගත් සන්ධිස්ථානයන් පවා සැමරීමේ දී ඒ කෙරෙහි එතරම් උනන්දුවක් නොදැක්වූයේ ඔහුගේ හැඟීම් ඉතාමත් සංයමයකින් යුතුව පාලනය කරගනිමිනි. 

කෙසේ නමුත් විනෝදකාමී චරිතයක් ද වන ගේල් තම කණ්ඩායමේ සඟයින් සමඟ මෙන්ම ප්‍රතිවාදී ක්‍රීඩකයින් සමඟ ද විහිළු තහළු කරමින් ප්‍රේක්ෂකයින් හට ද අමුතු වින්දනයක් ලබා දීමට උත්සාහ කරන්නේ සෑමවිටම මුවඟ සිනහවකින් සරසා ගනිමිනි.

2018 වසරේ පැවති IPL තරගාවලියේ දී ගේල් සමඟ ඉනිම ආරම්භ කිරීමේ කාර්‍යභාර්‍ය පැවරී තිබුණේ වත්මන් ඉන්දීය කණ්ඩායමේ ආරම්භක පිතිකරුවා ලෙස කටයුතු කරන K. L. රාහුල් හට වන අතර කිංග්ස් ඉලෙවන් පන්ජාබ් කණ්ඩායම වෙනුවෙන් එම තරගවාරයේ දී ජයග්‍රාහී සබඳතා කිහිපයක්ම ගොඩනැඟීමට ඔවුන් දෙදෙනා සමත්කම් දැක්විය. 

නමුත් ඉන් එක් තරගයක් පිළිබඳව රාහුල් පසුගිය දා යළි මතකාවර්ජනය කළේ එදින ගේල් ක්‍රීඩා කළ විලාසය ඔහුට කිසිදා අමතක නොවන බව සඳහන් කරමිනි.

වත්මන් ලොව අංක එකේ විස්සයි විස්ස දඟපන්දු යවන්නා ලෙස විරුදාවලිය ලත් රශීඩ් ඛාන් හට අමතක නොවන පාඩමක් ඉගැන්විය යුතු බව කියමින් කෝපයෙන් පුපුරමින් සිටි ගේල් ඔහුට පහර පිට පහර එල්ල කරමින් සුපිරි ශතකයක් වාර්තා කළ අයුරු සිහිපත් කළ රාහුල් ප්‍රකාශ කර සිටියේ මින් පෙර කිසිදු දිනක ගේල් ඒ අයුරින් ආවේගශීලීව පන්දුවට පහර දෙනු ඔහු දැක නොමැති බවයි.

මූලාශ්‍රය – ESPN Cricinfo

රශීඩ් ඛාන් පන්දුව යොමු කිරීමෙන් අනතුරුව තමන් දෙස රවා සිටි ආකාරය නොරිස්සු බවත්, අධිතක්සේරුවෙන් පන්දු යවමින් සිටි රශීඩ් හට හයේ වරුසාවකින් සැලකිය යුතු බවත් ගේල් පන්දුවට පහර දෙන අතරතුර දී තමන් හට පවසා සිටි බව රහුල් සඳහන් කරේ සිනහාව නවතා ගැනීමට දැඩි ආයාසයක් දරමිනි.

“මට මතකයි ඔහු (ගේල්) කියනවා රශීඩ්ගේ පන්දුවාරයට කලින් එක ලකුණක් දාලා දෙන්න අනිත් පන්දු ඔක්කොටම මුහුණ දෙන්න ඔහුට අවස්ථාව දෙන්න කියලා. මම පළවෙනි වතාවට තමයි දැක්කේ ක්‍රිස්ට ඔච්වර කේන්ති ගිහින් ඉන්නවා. හැබැයි ඔහු එදා පහර දෙන්න ඇවිල්ලා හිටියේ හොඳ සැලැස්මක් එක්ක. කිව්වත් වගේම ඔහු සුපිරි ශතකයක් වාර්තා කළා. ඔහුගේ දවසේ දී මොන ජගතටවත් ඔහුව නවත්වන්න බැහැ.”

ශ්‍රී ලංකා – බංග්ලාදේශ තරගාවලියත් හබක්

ගේල් ඔහුගේ හයවැනි ඉන්දීය ප්‍රිමියර් ලීග් ශතකය වාර්තා කිරීමට එදින වැය කර තිබුණේ පන්දු 63ක් පමණක් වන අතර රශීඩ් යැවූ පන්දු 16කට මුහුණ දුන් ගේල් ප්‍රවේගකාරී ලකුණු 42ක් තම නම ඉදිරියේ සටහන් කරගත්තේ රශීඩ්ගෙන් එල්ල වූ අභියෝගය තඹ දොයිදුවකටවත් මායිම් නොකරමිනි. 

ගේල්ගේ විශිෂ්ට පිතිහරඹයෙන් කිංග්ස් ඉලෙවන් පංජාම් කණ්ඩායමට ද ජය කණුව පසු කර යෑමට හැකි වූයේ සන්රයිසස් හයිද්‍රාබාද් කණ්ඩායම ලකුණු 15ක පරාජයක් අත්පත් කරදෙමිනි.

රාහුල් සමඟ එක්ව මෙවර තරගවාරයේ දී යලිත් වරක් එවැනිම ඉතිහාසගත ඉනිම් කිහිපයක් දියත් කිරීමේ අපේක්ෂාවෙන් පසු වූ ගේල් හට තවත් මාස කිහිපයක් ඒ සඳහා බලා සිටීමට සිදු වනුයේ Covid-19 වසංගතය නිසාවෙන් කල් දැමුණු තරගාවලිය නැවත පැවැත්වෙන දිනයක් පිළිබඳව අවසන් තීරණයක් තවමත් ගෙන නොමැති නිසාවෙනි.

Hindustan Times ඇසුරෙනි.

>> තවත් ක්‍රිකට් පුවත් සඳහා පිවිසෙන්න <<