කන්ද උඩරටින් ක්‍රිකට් පිටියට පිවිසි ශ්‍රීපාලි වීරක්කොඩි ක්‍රිකට් වෙනුවෙන්ම කොළඹට පැමිණ එහිම බින්න බහිනවා. ක්‍රීඩිකාවක් ඊට පසුව උපදේශිකාවක් ලෙස ඇයගේ ජීවිතය ගෙවි යනවා. ThePapare.com ඇයත් සමඟ කළ සාකච්ඡාවක සංක්ෂිප්තයක් ලෙසින් මෙලෙස ඉදිරිපත් කරන්නේ ශ්‍රීපාලිගේ ඒ කතාව.
ශ්‍රීපාලිගේ පවුලේ කෙල්ලොම දෙන්නෙක්. ශ්‍රීපාලි බඩ පිස්සි. අක්කා පාසලේදීත් ඉන් පිටතදීත් අහිංසකියක් වෙද්දී, ශ්‍රීපාලි ටිකක් විතර දඩබ්බර චරිතයක් වුනා. දෙයක් කරන්න ඕන කියල හිතුණොත් ඒකෙ නිමාවක් දකින තුරු ශ්‍රීපාලිට ඉවසිල්ලක් නෑ. ඒක කොහොම හරි කරනවා. හරියට කොල්ලෙක් වගේ. උන්ටත් අභියෝගයක් වෙමින්.
ශ්‍රීපාලි පාසල් ගියේ මහනුවර, ගුරුදෙණිය මහා විද්‍යාලයට. ශ්‍රීපාලිගේ වැඩ නිසා පාසලේ ලොකු පිළිගැනීමක් තිබුණා. අක්කා පාසලේ ඉන්නවා ද නැද්ද නෑ. ශ්‍රීපාලි එහෙම නෙමේ, අක්කගෙ අහලකින් තියන්න බෑ. දිව්වා, පැන්නා, ක්‍රිකට් ගැහුවා, එල්ලෙ ගැහුවා විතරක් නෙමේ, පාසලේ ක්‍රීඩා කටයුතුවල දී වගේම පොදු කටයුතුවල දී ද පෙරමුණ ගත්තෙත් ශ්‍රීපාලි.
“පාසල් කාලෙ වැඩි හරියක් ගත කළේ පිට්ටනියෙ. මේ නිසා පාසල් වැඩත් මඟහැරුණා. ගෙදරින්, පාසලෙන් බැනුම් අහපු වාර අනන්තයි. ඒත් ඉතිං ඊට පහුවදාත් කළේ ඒ දේ ම තමයි. කොහොමටත් පොත් පත්වලට වඩා මගේ හිත තිබුණෙ පිට්ටනියේ” ශ්‍රීපාලි අතීතය සිහිපත් කළා.
ගුරුදෙණියෙ තම වයසේ අයට වඩා ශ්‍රීපාලිගේ යහළු මිත්‍රයන් වුනේ ඉහළ පංතිවල සිටි අක්කලා අයියලා. ඒ ශ්‍රීපාලිගේ ක්‍රීඩා සඟයෝ. ඔවුන්ට මැදි වුණහම ශ්‍රීපාලි පිටතට පෙනෙන්නෙත් නෑ. ඒ තරම් බටු වයසේ සිටම ශ්‍රීපාලි ක්‍රීඩාව හා බැඳී හිටියා. හැබැයි ඉතිං කොච්චර හිතවත්ව හිටියත් ශ්‍රීපාලිට ඔවුන් එක්ක විරසක වෙන්න තත්පරයක කාලයක් ගත වෙන්නේ නැහැ.
“දවසක් මම පිට්ටනියේ දැලේ එල්ලිලා අක්කලා අයියලා ක්‍රිකට් ගහනවා බලාගෙන හිටියා. මටත් හොඳටම උවමනාව තිබුණා, එතැනට ගිහින් ක්‍රිකට් ගහන්න. ඒත් ඉතිං ඒ වෙලාවෙ මම හිටියෙ එයාලත් එක්ක තරහ වෙලා. ටික වෙලාවක් ගියාට පස්සෙ ක්‍රිකට් පුහුණු කරන චන්න සර් පිට්ටනියට ආවා. දැන් මට එතැනට යන්න තවත් උවමනායි. ඒත් ඉතිං එතැනට යන්න කොච්චර හිත කිව්වත් තරහ තිබුණ නිසා යන්නෙම නෑ කියලයි හිටියේ.”
හිත හා කුමන දේ ගිවිසගෙන තිබුණ ද ක්‍රීඩාව ඉදිරියේ එය පහව යන්නට වැඩි වේලාවක් ගත වෙන්නේ නැත. ශ්‍රීපාලිට මේ බලා සිටීම ඇති වෙන්නට ඇත. ඇය සෙමින් සෙමින් පිට්ටනියට පිවිසියේ ඒ නිසා ය. එහෙත් ප්‍රතිවාදීන්ගේ ඉවසුම් නොදෙන වදන් කුඩා ශ්‍රීපාලි තව තවත් කේන්ති ගැස්සුවා ය. පිට්ටනියේ සිටි අයියලාගේත්, අක්කලාගේත් උසුළු විසුළු කතා හමුවේ පුහුණුකරු අත තිබූ පන්දුව ගත් ශ්‍රීපාලි පන්දු යවන්නට ගත්තා ය.
“මම ඒ ඕවරය ඉවර කළේ කඩුලු 3ක් ලබා ගෙන. සර්ගෙන් බෝලෙ උදුරගෙන වගේ මම පන්දු යැව්වේ. අක්කලා අයියලා කරපු විහිළුවලට එකට එක මොනවා හරි කරන්නයි මට උවමනා වෙලා තිබුණේ. අන්තිමට ඒ සිදුවීම මගේ ජීවිතයම වෙනස් කළා.”
එදා සැහැල්ලු පන්දුවෙන් පෑ විස්කම හේතුවෙන්ම ශ්‍රීපාලිට ලෙදර් බෝල් ක්‍රීඩා කිරීමට ද අවස්ථාව උදා වෙනවා. ඒ සමන්ත සුදර්ශන මහතාගේ පුහුණුකාරීත්වය යටතේ. ඒ අනුව ගුරුදෙණිය මහා විද්‍යාලයීය කාන්තා ක්‍රිකට් කණ්ඩායමට ශ්‍රීපාලි එක් වෙනවා. ඒත් ඉතිං පාසල් කණ්ඩායම සමඟ සිටිද්දී ලත් පැහැදිලි ජයග්‍රහණයක් ගැන කියන්න නම් මතකයක් නැහැ කියලයි ශ්‍රිපාලි කියන්නේ.
පාසල් කාලයේම මහනුවර, මල්වත්ත ක්‍රීඩා සමාජයට එක්වෙන ශ්‍රීපාලි එහි කාන්තා ක්‍රිකට් කණ්ඩායම නියෝජනය කරනවා. ඊට පසුව කැන්ඩියන් ලේඩීස් කණ්ඩායමට එක් වෙනවා.
“මගේ ක්‍රිකට් ජීවිතය හරියටම ආරම්භ වෙන්නේ 2004 වසරේ කැන්ඩියන් ලේඩීස් කණ්ඩායම එක්ක. අපි ඒකෙදි සෙල්ලම් කළේ B කොටසේ ක්‍රිකට් තරගාවලිය. මම සහභාගී වුන මුල්ම අවුරුද්දේ අපි එම කොටසේ ශූරයන් වෙනවා. ඒ සිදුවීම මගේ ක්‍රිකට් ගමන තවත් ස්ථිර කළා.”
ඊට පසු වසරේ දී ඔවුන් ක්‍රීඩා කරන්නේ පළමු කොටසේ ක්‍රිකට් තරගාවලියේ. එම තරගාවලියේ දී මහනුවර පුෂ්පදාන ක්‍රීඩා සමාජයට එරෙහිව ලකුණු 282ක් ලබා ගැනීමට ශ්‍රීපාලි සමත් වෙනවා. කාන්තා පළමු පෙළ ක්‍රිකට් තරගාවලියක ක්‍රීඩිකාවක් ඉනිමක වාර්තා කළ වැඩිම ලකුණු ප්‍රමාණය එය වෙනවා.
“අදටත් ඒ වාර්තාව මා නමින් තිබෙන්නේ. ඒ ගැන සතුටු වෙනවා. එම තරගයෙන් පස්සෙ තමයි මට ශ්‍රී ලංකා කාන්තා ක්‍රිකට් සංචිතයට එක් වෙන්න අවස්ථාව ලැබෙන්නේ. ඒ 2005 අවුරුද්ද. එම සංචිතයට එක් වූ අලුතම ඕස්ට්‍රේලියා කාන්තා B කණ්ඩායම මෙරට තරග සංචාරයකට පිවිසියා. ඕස්ට්‍රේලියාව දෙවැනි පෙළ කණ්ඩායමක් වුනත් අපේ ක්‍රීඩා කළේ ශ්‍රී ලංකා ෆුල් කණ්ඩායම. ඊට පස්සේ එම අවුරුද්දේ තිබුණ ලෝක කුසලාන කාන්තා ක්‍රිකට් තරගාවලියේ අතිරේක ක්‍රීඩිකාවක් ලෙසත් මම සංචිතයට එක් වෙනවා.”
මේ තරග අවසානයේ 2006 වසරේ දෙසැම්බර් මාසයේ දී පාකිස්තානයේ තරග සංචාරයක යෙදුණ ශ්‍රී ලංකා කාන්තා ක්‍රිකට් කණ්ඩායමට ආධුනික ක්‍රීඩිකාවක් ලෙසින් ශ්‍රීපාලි සහභාගී වෙනවා. වමතින් පිත්ත හසුරුවමින් දකුණතින් මද වේගපන්දු යැවූ ශ්‍රීපාලි එතැන් සිට 2018 නොවැම්බර් මස බංග්ලාදේශය සමඟ වූ තරගාවලිය දක්වා පුරා වසර 12ක් ශ්‍රී ලංකා කාන්තා ජාත්‍යන්තර එක්දින පිටියේ රැඳී සිටියා.
තරග 89කට සහභාගී වෙමින් ඉනිම් 79ක දී ලකුණු 722ක් ලබා ඇති ශ්‍රීපාලි ලබා ඇති කඩුලු සංඛ්‍යාව 58ක්. එහි දී ඇයගේ හොඳම පන්දු යැවීම ලෙසින් සටහන් වෙන්නේ බටහිර ඉන්දීය කොදෙව් ක්‍රීඩිකාවන්ට එරෙහිව දඹුල්ලේ දී ලකුණු 19කට ලබා ගත් කඩුලු 3යි.
ශ්‍රීපාලි විස්සයි විස්ස ජාත්‍යන්තර ක්‍රිකට් පිටියට පිවිසෙන්නේ 2009 ලෝක කුසලාන තරගාවලියේ දී. ඒ පාකිස්තානයට එරෙහිවයි. විස්සයි විස්ස පිටියේ තරග 58කට සහභාගී වෙමින් ඉනිම් 47ක දී ලකුණු 209ක් සහ කඩුලු 31ක් වාර්තා කිරීමට ශ්‍රීපාලි සමත් වෙනවා. ඇයගේ හොඳම දක්ෂතාව වෙන්නේ බටහිර ඉන්දීය කොදෙව් ක්‍රීඩිකාවන්ට එරෙහිව ලකුණු 23කට ලබා ගත් කඩුලු 3යි. විස්සයි විස්ස පිටියේ ඇයගේ අවසන් තරගය වෙන්නේ 2018 නොවැම්බරයේ පැවති බංග්ලාදේශ තරගාවලියයි.
කැන්ඩියන් ලේඩීස් කණ්ඩායමෙන් අනතුරුව ශ්‍රීපාලි පන්නල ස්ලිම්ලයින් ක්‍රීඩා සමාජය හා එක් වෙනවා. ඊට පසුව කෝල්ට්ස් සහ අවසානයේ දී ශ්‍රී ලංකා ගුවන් හමුදා කාන්තා ක්‍රිකට් කණ්ඩායම සමඟ රැඳී සිටියා.
“නුවර ඉඳල ඇවිත් මුලින්ම එක් වුනේ ස්ලිම්ලයින් කණ්ඩායමට. අපි නතර වෙලා හිටියෙත් පන්නල. නමුත් ශ්‍රී ලංකා ටීම් එකේ පුහුණුවිම් තිබුණෙ කොළඹ. මේ නිසා ගමනාගමනයට ටිකක් වෙහෙස වෙන්න වුනා. ඒ නිසා කෝල්ට්ස් එකට ආවා. ඊට පස්සේ එයාර් ෆෝර්ස්. එයාර් ෆෝර්ස් එකේ මම අවුරුදු 7ක් හිටියා.”
මේ කාලයේ දී ශ්‍රීපාලි මධ්‍යම පළාත් කාන්තා ක්‍රිකට් කණ්ඩායමේ නායිකාව ලෙසින් ශ්‍රී ලංකා ක්‍රිකට් සංවිධානය කළ අන්තර් පළාත් කාන්තා ක්‍රිකට් තරගාවලියට එක් වෙනවා. එහි දී 2013 වසරේ ජයග්‍රාහිකාවන් ලෙසත්, 2015/16 තරගාවලියේ අනුශූරයන් ලෙසින් අභිෂේක ලැබීමට ඔවුන් සමත් වෙනවා. එම කණ්ඩායමේ උපනායිකාව ලෙසින් ද කටයුතු කිරීමට ශ්‍රීපාලිට අවස්ථාව හිමි වෙනවා. එමෙන්ම ශ්‍රීපාලි ශ්‍රී ලංකා කාන්තා ක්‍රිකට් කණ්ඩායමේ උපනායිකාව ලෙසින් ද අවස්ථා ගණනාවක දී පත් වෙනවා.
තවත් විශේෂාංග ලිපි:
- ThePapare නම් කළ ලකී 7 ක්‍රීඩකයා “ලොහාන්”
- අරාබිකරයට ක්‍රිකට් කියාදෙන ලංකා පුත්‍රයා
- පරණවිතානගේ පරණ නොවන මතකයන්
- පළමු පෙළ වේගවත්ම ශතකයේ හිමිකරු “සඳුන්”
- මලල ක්‍රීඩාවෙන් වාර්තා තැබූ ක්‍රිකට් ක්‍රීඩකයා “දුෂාන්”
මේ සියලු මතකයන් සමඟින් ශ්‍රීපාලි පසුගිය දා තමන් ඉතාම ආදරෙන් පිවිසි සහ රැඳී සිටි ක්‍රිකට් ක්‍රීඩාවට සමු දෙනවා. එවන් තීරණයක් ගැනීම කෙනෙක්ට අසීරු කරුණක් වූව ද ශ්‍රීපාලිට එසේ වන්නේ නැත.
“හොඳම කාලෙ හොඳම තීරණය ගන්න ඕන. මම ඉතා කැමැත්තෙන් මේ තීරණය ගත්තේ. මා සමඟ කිහිප දෙනෙක්ම කිව්වා තව අවුරුදු කිහිපයක් ක්‍රීඩා කරන්න කියලා. ඒත් මම විශ්වාස කළා මට සමුගන්න හොඳම කාලය මේක කියලා. මොකද කෙනෙක්ට මම ගැන කතා කරන්න ඉඩ තියල සමුගන්න එකයි වැදගත්” ශ්‍රිපාලි තමන්ගේ සමුගැනීම ගැන ඇහුවම පැවසුවේ එවැන්නක්.
“ක්‍රිකට් වෙනුවෙන් මම විශාල කැපවීමක් කළා. නුවර ඉඳල කාත් කවුරුවත් නැතුව කොළඹ ආවා. උත්සාහයෙන් මහන්සියෙන් මේ තැනට ආවේ. අද මම මේ ආපු ගමන ගැන සතුටු වෙනවා. ඒ වගේම මට හිතුණා මේ සතුට තවත් ක්‍රීඩිකාවකට ලබා දෙන්න ඕන කියලා. අපේ පිටිපස්සේ නවක දක්ෂ ක්‍රීඩිකාවන් විශාල පිරිසක් ඉන්නවා. මට දැන් අවුරුදු 34ක්. ආධුනිකයෙකුට තැන දෙන්න මීට වඩා හොඳ කාලයක් තියෙනවද?”
ශ්‍රීපාලි එසේ ප්‍රශ්න කළත් අපෙන් පෙරළා පිළිතුරක් බලාපොරොත්තු වුනේ නැහැ. ඇය මේ තීරණයට පිවිසෙන්නේ ක්‍රීඩාවේ තව දුරටත් රැඳී සිටීමට අදාළ කාරණා කටයුතු රාශියක් ද සම්පාදනය කර ගනිමින්. ඇය පසුගිය කාලයේ වැඩි හරියක් කාලය ගත කළේ ඕස්ට්‍රේලියාවේ. එහි දී ඇය Master and Fitness Trainer නමැති ශාරීරික යෝග්‍යතා පාඨමාලාවක් සම්පූර්ණ කළා. එය හැදෑරූ පළමු ශ්‍රී ලාංකික කත වන්නේ ශ්‍රීපාලි.
“මට අවශ්‍ය වුනේ මගේ දැනුමෙන් වැඩක් ගන්න. මම ක්‍රිකට් ගහද්දී විශාල ලෙස මහන්සි වුනා. ශාරීරික යෝග්‍යතාව පවත්වා ගෙන යන්න විශාල වෙහෙසක් ගත්තා. ඒ වගේම අපි කරන ඕනම දෙයක් කරන්න නිරවුල් මනසක් අවශ්‍ය වෙනවා. ඊට නිසි දැනුමක් අවශ්‍යයි. අපි ගොඩක් වෙලාවට මොකකින් හරි පරාජය වෙන්නේ හෝ පසු බසින්නේ අපේ මනස ඒ වෙනුවෙන් වර්ධනය කරගෙන නැති නිසා. ඒ නිසා මම කල්පනා කළා ඒ කාරණා දෙක වෙනුවෙන් වෙනම ම ක්‍රමයක් එහෙමත් නැත්නම් මොඩ්ල් එකක් හදන්න. ෆිට්නස් වැඩ පිළිවෙළත් සමඟ යෝගා භාවනාව ද උපයෝගී කර ගෙන මම ඒ වෙනුවෙන් වන මගේම වැඩක් පටන් ගත්තා Myrus නමින්. අද මම ඒ කටයුතු ඉතා සාර්ථකව පවත්වාගෙන යනවා” ශ්‍රීපාලි පැවසුවා.
මේ යටතේ ශාරීරික යෝග්‍යතාව ද යෝගී භාවනාව මගින් මනස නිරවුල් කිරීමේ කටයුතු ද සිදු කෙරෙන බවයි ශ්‍රීපාලි පවසන්නේ. එය ක්‍රීඩකයන්ට සේ ම විශේෂයෙන්ම කාර්යබහුල විවිධ තරාතිරමේ කාර්යාල සේවකයන්ට ද එකසේ මේ පුහුණුවට එක් වීම වැදගත් බවක් ද පවසනවා.
නුවර සිට පැමිණ කොළඹට බින්න බැස ගත් ශ්‍රීපාලි අද සිදාදියේ, ගමේ වෙනසක් නැතිව කාර්ය බහුල වූ මිනිසුන් වෙනුවෙනුත් සහ තම ශරීරය මනාව පවත්වා ගෙන යෑමට වෙහෙසෙන මිනිසුන් වෙනුවෙනුත් කැප වෙනවා. එතැන දී තමන් ද නියෝජනය කළ ක්‍රීඩාවේ යෙදෙන අය ද ඊට සම්බන්ධ කර ගැනීමට ශ්‍රීපාලි අමතක කර නැහැ.
“මම ඉගෙන ගත් දෙයින් රටට යමක් කළ යුතුයි කියන මතයේ එදා ඉඳලම සිටියා. ක්‍රිකට් ටීම් එකේ සිටිද්දී රටවල් 20ක පමණ සංචාරය කරල තියෙනවා. විවිධ අය හමුවෙලා තියෙනවා. විවිධ සංස්කෘතීන් දැකල තියෙනවා. ඉතිං ඒ දේවල් සමඟ අපේ රටටත් අවශ්‍ය වෙනම ම දෙයක් කිරීමයි මගේ අරමුණ.”
ශ්‍රීපාලිගේ ඒ උත්සාහය වෙනුවෙන් ThePapare.com අපගේ ද සුබ පැතුම් එක් කරමු.
>> තවත් විශේෂාංග ලිපි සඳහා පිවිසෙන්න <<
