නෙදර්ලන්තය, අයර්ලන්තය සහ ස්කොට්ලන්තය යන රටවල් තුන එක්ව එක් රටකින් කණ්ඩායම් දෙක බැගින් (එක් එක් රටේ ප්‍රධාන නගර නියෝජනය වෙන ලෙස) ඉදිරිපත් කරමින් කණ්ඩායම් හයක් අතර පවත්වන යුරෝ ස්ලෑම් විස්සයි විස්ස ක්‍රිකට් තරගාවලිය මේ වසරේ අගෝස්තු මස 20 වැනිදා ආරම්භ වීමට නියමිතව තිබුණි.
>> විස්ඩන් තරුණ ටෙස්ට් කණ්ඩායමට ඔබ නොසිතන ශ්‍රී ලාංකිකයෙක්
කෙසේ නමුත් පළමු වතාවට පැවැත්වීමට නියමිතව තිබූ මෙම තරගාවලිය 2021 වසර දක්වා කල් දැමීමට තරගාවලි සංවිධායක කමිටුව තීරණය කර ඇත. ඒ ගෝලීය වසංගතයක් ලෙස ව්‍යාප්ත වී යන කොරෝනා වසංගත තත්වය නිසාවෙනි.
“අපි පසුගිය සති දින ගණනාව පුරාවටම කතා කරමින් සිටියේ මේ තරගාවලිය පැවැත්වීමට තිබෙන හැකියාව ගැන, නිරෝධායන කාලයක, ඇස්තුමේන්තුගත මුදල් ප්‍රමාණය, ක්‍රීඩකයින්ගේ ආරක්ෂාව, තරග පැවැත්වෙන ක්‍රීඩාංගණ සහ ඒ අවට වසංගතයේ ව්‍යාප්තිය, ප්‍රේක්ෂකයින් සම්බන්ධ කරගන්නා අකාරය සඳහා ව්‍යාපාර අවස්ථා හරහා මුදල් උපයන ආකාරය යන කරුණු කාරනා ගැන අපි ගොඩක් අපේ අවධානය යොමු කළා. ඒ අනුව අපි මේ තරගාවලිය ලබන වසර දක්වා කල් දැමීමට තීරණය කළා” යැයි අයර්ලන්ත ක්‍රිකට් ආයතනයේ ප්‍රධාන විධායක නිලධාරි වොරන් ඩියුට්‍රොම් මහතා පැවසීය.
තරගාවලිය 2019 වසරේ අගෝස්තු සහ සැප්තැම්බර් මාසයේ දී පැවැත්වීමට සූදානම් කර තිබූ නමුත් රටවල් තුනේ ක්‍රිකට් කණ්ඩායම් සඳහා තිබූ කාර්‍යබහුල තරග කාලසටහන සහ මූල්‍යමය ගැටලු නිසාවෙන් එය 2020 අගෝස්තු මස දක්වා කල් දමන ලදි.
>> නිරෝධායන නීති කැඩූ ආචර්ට සමාජ මාධ්‍යවලිනුත් හිරිහැර
2019 වසරේ තරගාවලිය පළමු වතාවට හඳුන්වා දීම සඳහා පැවති මාධ්‍ය හමුවේ දී තරගාවලියේ ප්‍රධාන ක්‍රීඩකයින් හය දෙනා ලෙස ශහිඩ් අෆ්රිඩි, මාර්ටින් ගප්ටිල්, රෂීඩ් ඛාන්, බ්‍රෙන්ඩන් මැකලම්, ඔයින් මෝගන් සහ ශේන් වොට්සන්, බාබර් අසාම්, ජේ. පී. ඩුමිනි, ක්‍රිස් ලින්, ලූක් රොන්චි, ඩේල් ස්ටේන් සහ ඉම්රාන් තාහීර් යන ක්‍රීඩකයින්ගේ නම් ප්‍රකාශයට පත් කරන ලදි.
තරගාවලිය සඳහා සහභාගී වීමට නියමිතව තිබූ කණ්ඩායම්වල නම් – ඇම්ස්ටර්ඩෑම් නයිට්ස් (නෙදර්ලන්තය), රොටර්ඩෑම් රයිනෝස් (නෙදර්ලන්තය), බෙල්ෆාස්ට් ටයිටන්ස් (අයර්ලන්තය), ඩබ්ලින් චීෆ්ස් (අයර්ලන්තය), එඩින්බරෝ රොක්ස් (ස්කොට්ලන්තය) , ග්ලාස්ගෝ ජයන්ට් (ස්කොට්ලන්තය).
>> තවත් ක්‍රිකට් පුවත් සඳහා පිවිසෙන්න <<
