රග්බි විනිසුරුවරුන්ගේ මුල් පුටුව ඩින්කාට

181

ශ්‍රී ලංකා රග්බි විනිසුරුවරුන්ගේ සංගමයේ සභාපති ලෙස හිටපු ජ්‍යේෂ්ඨ විනිසුරු ඩින්කා පීරිස් මහතා පත්ව තිබේ.

වසර 20කට ආසන්න කාලයක දීර්ඝ විනිසුරු දිවිය නිමා කරමින් ක්‍රීඩා පිටියෙන් සමුගැනීමට ඔහු තීරණය කළේ 2019 වසරේදීය.

රග්බි ක්‍රීඩාවට තමා තුල ඇති ආදරය නිසාම රග්බි විනිසුරුවරයෙකු බවට පත්වූ ඩින්කා පීරිස් මෙරට රග්බි විනිසුරුවරුන්ගේ A කාණ්ඩයේ ප්‍රමුඛ විනිසුරුවරයෙකු ලෙස වසර ගණනාවක් කටයුතු කළේය.

ආසියානු කලාපයේ සත් සාමාජික රග්බි ඇතුළු සෙසු රග්බි ක්‍රීඩා විනිසුරුවන්වරුන්ගේ කමිටුවේ සාමාජිකයෙකු ලෙස ද ඒ මහතා කටයුතු කළේය.

ශ්‍රී ලංකා රග්බි විනිසුරුවන්ගේ සංගමයේ වත්මන් සභාපති වූ ටෝනි අමිත් මහතාගේ ඉවත් වීමෙන් පුරප්පාඩු වූ සභාපති ධුරය සඳහා ඩින්කා පීරිස් මහතා පත්ව තිබේ.

තවත් රග්බි පුවත්:

ටෝනි මහතා එක් වරක් පමණක් සභාපති ධුරයේ කටයුතු කළේය. මේ අතර ශ්‍රී ලංකා රග්බි විනිසුරුවන්ගේ සංගමයේ උප සභාපති ධූර සඳහා බ්‍රිගේඩියර් උපාලි කොටුවේගෙදර මහතා සහ ප්‍රියන්ත ගුණරත්න මහතා පත්විය.

ශ්‍රී ලංකා රග්බි විනිසුරුවන්ගේ සංගමය සඳහා පත්වූ සාමාජිකයින්

  • සභාපති – ඩින්කා පීරිස්
  • උප සභාපති – බ්‍රිගේඩියර් උපාලි කොටුවේගෙදර, ප්‍රියන්ත ගුණරත්න
  • ලේකම් – කෙවින් පීරිස්
  • භාණ්ඩාගාරික – ශාම්‍රත් ප්‍රනාන්දු
  • හිටපු කමිටු සාමාජිකයන් – ඉර්ශාඩ් කාඩර්, රොහාන් ප්‍රනාන්දු
  • කමිටු සාමාජිකයන් – ප්‍රීති කුමාර, මාධව විජේසිරි, දීපාල් පුණ්‍යවර්ධන සහ ප්‍රදීප් විල්සන්.

කොරෝනා වයිරසය හේතුවෙන් අවලංගු වූ මෙරට රග්බි ක්‍රීඩාව නැවත ආරම්භ කිරීම සම්බන්ධයෙන් ක්‍රීඩා අමාත්‍යාංශය, සෞඛ්‍ය අමාත්‍යාංශය සහ ශ්‍රී ලංකා රග්බි සම්මේලනය මේ වන විට සාකච්ඡා කරමින් සිටී.

රග්බි විනිසුරුවන්ගේ සංගමයේ නව සභාපති ඩින්කා පීරිස් මහතාට සහ සෙසු සාමාජිකයන්ට ThePapare.com අප මෙලෙස සුභාශිංසන එක් කර සිටිමු.