“මම හැඟීම් වලට පැරදුණා” – ඇන්තනී ජෝෂුවා

පසුගිය දා සවුදි අරාබියේ දී පැවති බොක්සිං තරගයක දී හිටපු ලෝක ශූර Anthony Joshua (ඇන්තනී ජෝෂුවා) පරදවා WBA (Super), IBF, WBO, IBO ලෝක ශූර Oleksander Usyk (ඔලෙක්සාන්ඩර් උසික්) ජයග්‍රහණය කළා. මෙය දෙදෙනා අතර පැවති දෙවැනි තරගයයි

ත්‍රෛපාර්ශ්වික ජූරිය විසින් 2-1ක බහුතරයකින් උසික් හට ජය ලබා දෙනු ලැබුවේ වට 12ක තරගයක් අවසානයේ දීයි. ලකුණු තත්වය සටහන් වුනේ 115-113, 113-115 සහ 116-112ක් ලෙසයි. යුක්‍රේන ජාතික උසික් විසින් බ්‍රිතාන්‍ය ජාතික ජෝෂුවා පරාජය කෙරුණේ එලෙසින්.

තරගයෙන් අනතුරුව සාමාන්‍යයෙන් අදහස් දක්වන්නේ ශූරයා විසින් වුවත්, පරාජිත ජෝෂුවා විසින් බොක්සිං වළල්ල තුළ දී ම දිගු අදහස් දැක්වීමක් සිදු කිරීම මෙහි දී කැපී පෙනුණා.

ඇතැම් බොක්සිං ප්‍රේක්ෂකයන් පැවසුවේ එය උසික්ගේ ජයග්‍රහණයේ දීප්තිය තමන් වෙතට කැඳවා ගන්නට ජෝෂුවා යෙදූ උපක්‍රමයක් බවයි. කෙසේ වෙතත් ඔහුගේ අදහස් දැක්වීම සංවේදී එකක් වුනා.

• ටයිසන් ෆියුරි අලුත් මාවතකින් එයි
• ටයිසන්ගේ ව්‍යාඝ්‍ර සුරතලිය ඈත් වූ හැටි
• “අපි උඹට මිලියනයක් ගෙව්වේ බින්දුවට අවුට් වෙන්න නෙමෙයි”

තරගය අවසන් වූ වහාම ප්‍රතිවාදී උසික්ගේ ශූරතා බඳ පටි දෙකක් බොක්සිං වළල්ලෙන් පිටතට දැමූ ජෝෂුවා හට ප්‍රේක්ෂකයන්ගේ නොකැමැත්ත මධ්‍යයේ අදහස් දක්වන්නට සිදු වුනා.

“මම මාව පහතට දාගත්තා” ඔහු පැවසුවා.

ඉන්පසුව ඔහු විසින් සාමාන්‍ය බොක්සිං ක්‍රීඩකයෙකුට වඩා දීර්ඝ අදහස් දැක්වීමක් සිදු කළා.

“උඹ ඉහළ සටන්කරුවෙක් චෑම්ප්! ඔය බඳ පටි වලට සටන් කරන්නට ඊයේ මට මගේ මනස අඳුරු තැනකට ගෙනියන්න සිදු වුනා. මට සටන් දෙකක් තිබුණා. එකක් උසික් එක්ක, එකක් මං එක්ක. ඒ දෙකෙන්ම මම පරාද වුනා,” 32 හැවිරිදි ඔහු පැවසුවා.

“මම මාව පහතට දාගත්තා කියලා මුලින්ම පිළිගන්න කෙනා මමයි. මම වැඩ කරේ පිරිසිදු දැඩි කැමැත්තකින් වගේම හැඟීමකින්. ඒක පාලනය කරගන්න බැරි වුනහම ඒක ශ්‍රේෂ්ඨ නෑ. මම මේ ක්‍රීඩාවට ගොඩක් ගොඩක් ආදරෙයි. මම මෙතන ඉඳන් මීට වඩා හොඳ වේවි. රෙස්පෙක්ට්!” ඒ ඔහුගේ අදහස් දැක්වීමෙන් කොටසක්.

වාර්තා වන ආරංචි වලට අනුව එළඹෙන දෙසැම්බරයේ දී ඔවුන් දෙදෙනා නැවත සටන් වැදීමට සැරසෙනවා.

කෙසේ වෙතත් ජයග්‍රහණයෙන් අනතුරුව හෙවිවෙයිට් ශූර උසික් පැවසුවේ මෙසේයි.

“මේක මගේ රටේ එවුන්ට.” ඔහු පැවසුවේ යුද්ධයකින් පීඩිත යුක්‍රේන වැසියන් සිහිකරමින්.

>> තවත් ක්‍රීඩා පුවත් සඳහා පිවිසෙන්න <<