தசுன் ஷானக்கவின் போராட்டம் வீண்; கண்டி ரோயல்ஸ் வெற்றி

தம்புள்ளை ரங்கிரி சர்வதேச மைதானத்தில் இன்று (25) நடைபெற்று முடிந்திருக்கும் லங்கா பிரீமியர் லீக் (LPL) 2026 தொடரின் 11ஆவது போட்டியில் கோல் கெலன்ட்ஸ் அணியை 11 ஓட்டங்களால், கண்டி ரோயல்ஸ் வீழ்த்தி அபார வெற்றி பெற்றுள்ளது.

>>2026 ஆசிய விளையாட்டு போட்டிகள்; இலங்கை கிரிக்கெட் அணிக்கு நேரடி நொக்-அவுட் வாய்ப்பு<<

முன்னதாக இந்தப் போட்டியின் நாணய சுழற்சியில் வென்ற காலி கெலன்ட்ஸ் அணி முதலில் பந்துவீச்சைத் தெரிவு செய்தது. அதன்படி முதலில் துடுப்பாடிய கண்டி அணியின் முக்கிய வீரர்களான குசல் பெரேரா (1) மற்றும் செதிகுல்லா அட்டல் (0) ஆகியோரை பிரமோத் மதுஷன் அடுத்தடுத்து ஆட்டமிழக்கச் செய்து அதிர்ச்சி அளித்தார்.

எனினும் மத்திய வரிசையில் களமிறங்கிய டேல் பிலிப்ஸ்  மற்றும் மொயின் அலி ஆகியோரின் சிறப்பாட்டம் காரணமாக,  கண்டி ரோயல்ஸ் அணி சரிவிலிருந்து மீண்டது. தொடர்ந்து கண்டி ரோயல்ஸ் அணியானது 20 ஓவர்கள் நிறைவில் 6 விக்கெட் இழப்பிற்கு 165 ஓட்டங்களைக் குவித்தது.

கண்டி ரோயல்ஸ் துடுப்பாட்டத்தில் மொயின் அலி 29 பந்துகளில் 3 பௌண்டரிகள் மற்றும் ஒரு சிக்ஸர் அடங்கலாக 41 ஓட்டங்களையும், டேல் பிலிப்ஸ் 25 பந்துகளில் 34 ஓட்டங்களையும் பெற்றனர்.

கோல் அணியின் பந்துவீச்சு சார்பில் அகீப் ஜாவேட், பிரமோத் மதுஷன் மற்றும் விஜயகாந்த் வியாஸ்காந்த் ஆகியோர் தலா 2 விக்கெட்டுக்கள் வீதம் வீழ்த்தினர்.

>>இலங்கை மகளிருடனான முதல் ஒருநாள் போட்டியில் பாகிஸ்தானுக்கு இலகு வெற்றி<<

பின்னர் 166 ஓட்டங்கள் என்ற இலக்கை நோக்கிப் பதிலுக்கு ஆடிய கோல் கெலன்ட்ஸ் அணிக்கு ஆரம்பமே பின்னடைவாக அமைந்தது. நுவான் துஷார மற்றும் அசித பெர்னாண்டோவின் துல்லியமான பந்துவீச்சால் கோல் அணியானது 54 ஓட்டங்களுக்கு 5 விக்கெட்டுக்களை இழந்து தடுமாறியது.

எனினும் கோல் அணியை மீட்க சாமிக்க கருணாரட்ன மற்றும் அணித்தலைவர் தசுன் ஷானக கூட்டணி அமைத்து போராடிய போதும், கோல் வீரர்களால் 20 ஓவர்களில் 8 விக்கெட்டுக்களை இழந்து 154 ஓட்டங்கள் மட்டுமே பெற முடிந்தது.

கோல் அணியின் துடுப்பாட்டத்தில் சாமிக்க கருணாரட்ன 35 பந்துகளில் 52 ஓட்டங்கள் பெற்றார். எனினும்  தசுன் ஷானக்க இறுதிவரை போராடி 38 பந்துகளில் 6 பெளண்டரிகள் மற்றும் 2 சிக்ஸர்கள் அடங்கலாக 57 ஓட்டங்கள் குவித்தார்.

கண்டி ரோயல்ஸ் பந்துவீச்சில் நுவான் துஷார 3 விக்கெட்டுக்களையும், அசித பெர்னாண்டோ 2 விக்கெட்டுக்களையும் வீழ்த்தியிருந்தனர். போட்டியின் ஆட்டநாயகனாக மொயின் அலி தெரிவாகினார்.

>>மேலும் கிரிக்கெட் செய்திகளைப் படிக்க <<