2026 ஆசிய விளையாட்டு போட்டிகள்; இலங்கை கிரிக்கெட் அணிக்கு நேரடி நொக்-அவுட் வாய்ப்பு

2026ஆம் ஆண்டு ஜப்பானின் அய்ச்சி-நகோயாவில் இடம்பெறும் நடைபெறவுள்ள ஆசிய விளையாட்டு போட்டிகளில் (Asian Games) ஆடவர் கிரிக்கெட் பிரிவில் இலங்கை உட்பட இந்தியா, பாகிஸ்தான் மற்றும் பங்களாதேஷ் ஆகிய அணிகளுக்கு நேரடியாக நொக்-அவுட் சுற்றில் அதாவது காலிறுதிச் சுற்றில் பங்கேற்க வாய்ப்பு வழங்கப்பட்டிருக்கின்றது.

>>இலங்கை மகளிருடனான முதல் ஒருநாள் போட்டியில் பாகிஸ்தானுக்கு இலகு வெற்றி<<

நேற்று (23) வெளியிடப்பட்ட போட்டி அட்டவணையின்படி இந்த நான்கு முதன்மை அணிகளுடன் மேலும் நான்கு அணிகள் ஆடவர் பிரிவு கிரிக்கெட் காலிறுதிச் சுற்றில், இதற்கான பிரத்தியேக தகுதிச் சுற்று மூலம் இணையவுள்ளன.

அதன்படி ஆடவர் கிரிக்கெட் போட்டிகளுக்கான தகுதிச் சுற்றில் ஆறு அணிகள் இரண்டு குழுக்களாகப் பிரிக்கப்பட்டுள்ளன. இதில் ஆப்கானிஸ்தான் முக்கிய அணியாக இடம் பெற்றுள்ளது. 2023ஆம் ஆண்டு ஆசிய விளையாட்டு போட்டிகளில் வெள்ளிப் பதக்கம் வென்ற ஆப்கானிஸ்தான், போட்டியை நடாத்தும் ஜப்பான் மற்றும் நேபாளத்துடன் குழு A இல் இடம் பெற்றிருக்கின்றது. குழு B இல் மலேஷியா, ஓமான் மற்றும் ஹொங்கோங் (சீனா) ஆகிய அணிகள் இடம் பெற்றுள்ளன. ஒவ்வொரு அணியும் தங்கள் குழுவில் உள்ள மற்ற அணிகளுடன் தலா ஒரு முறை மோதும். பின்னர் இரு குழுக்களிலிருந்தும் முதல் இரண்டு இடங்களைப் பிடிக்கும் அணிகள் காலிறுதிக்கு முன்னேறும்.

அதேவேளை மகளிர் கிரிக்கெட் பிரிவு நேரடியாகக் காலிறுதிச் சுற்றிலிருந்தே ஆரம்பமாகுகின்றது. இந்த காலிறுதிச் சுற்றில் இந்தியா, ஜப்பான், பாகிஸ்தான், தாய்லாந்து, இலங்கை, மலேஷியா, பங்களாதேஷ் மற்றும் சீனா ஆகிய அணிகள் காணப்படுகின்றன.

மகளிர் கிரிக்கெட் காலிறுதிப் போட்டி நிரல்படுத்தல்

• இந்தியா எதிர் ஜப்பான்
• பாகிஸ்தான் எதிர் தாய்லாந்து
• இலங்கை எதிர் மலேஷியா
• பங்களாதேஷ் எதிர் சீனா

2023ஆம் ஆண்டு சீனாவின் குவாங்ஷூ நகரில் நடைபெற்ற ஆசிய விளையாட்டுப் போட்டிகளில், ஆடவர் மற்றும் மகளிர் ஆகிய இரண்டு பிரிவுகளிலுமே இந்தியா தங்கம் வென்று நடப்புச் சம்பியனாகத் திகழ்கின்றமை சுட்டிக்காட்டத்தக்கது.

2026 ஆசிய விளையாட்டுப் போட்டியில், மகளிர் கிரிக்கெட் செப்டம்பர் 17 முதல் 22 வரையிலும், ஆடவர் கிரிக்கெட் செப்டம்பர் 24 முதல் அக்டோபர் 1 வரையிலும் நடைபெறவுள்ளமை குறிப்பிடத்தக்கது.

>>மேலும் கிரிக்கெட் செய்திகளைப் படிக்க<<