இலங்கை அணிக்கு எதிரான முதலாவது மகளிர் ஒருநாள் கிரிக்கெட் போட்டியில் பாகிஸ்தான் அணி 5 விக்கெட்டுகள் வித்தியாசத்தில் அபார வெற்றி பெற்று, 3 போட்டிகள் கொண்ட தொடரில் 1-0 என முன்னிலை பெற்றுள்ளது.
குல் பெரோசா மற்றும் சித்ரா அமீனின் சிறப்பான அரைச் சதங்களும், நஷ்ரா சந்தூவின் அபார பந்துவீச்சும் பாகிஸ்தானின் இந்த வெற்றிக்கு வித்திட்டன.
ஹம்பாந்தோட்டையில் நேற்று (24) நடைபெற்ற இப்போட்டியில் நாணய சுழற்சியில் வென்ற இலங்கை அணி முதலில் துடுப்பாட்டத்தை தேர்வு செய்தது. ஆரம்ப துடுப்பாட்ட வீரர்களாக களம் இறங்கிய விஷ்மி குணரட்ன மற்றும் அணித்தலைவி சமரி அத்தபத்து ஜோடி சிறப்பான ஆரம்பத்தை அளித்தது.
இருப்பினும், பாகிஸ்தானின் சுழல்பந்து வீச்சு அறிமுகப்படுத்தப்பட்டதும் இலங்கையின் ஓட்ட வேகம் குறைந்ததோடு விக்கெட்டுகளும் சரியத் தொடங்கின. விஷ்மி குணரட்னவின் விக்கெட்டைக் கைப்பற்றி நஷ்ரா சந்தூ முதல் திருப்பத்தை ஏற்படுத்தினார். அடுத்து வந்த ஹசினி பெரேராவுடன் இணைந்து சமரி அத்தபத்து 53 ஓட்டங்கள் சேர்த்த நிலையில், சமரி அத்தபத்துவை (46 ஓட்டங்கள்) நஷ்ரா சந்தூ போல்ட் முறையில் ஆட்டமிழக்கச் செய்தார்.
24 ஓவர்களில் 109ஃ2 என வலுவான நிலையில் இருந்த இலங்கையை, பாகிஸ்தான் பந்துவீச்சாளர்கள் கட்டுப்படுத்தினர். நிலக்ஷிகா சில்வா மற்றும் கவிஷா தில்ஹாரி ஜோடி 5ஆவது விக்கெட்டுக்கு சேர்த்த 42 ஓட்டங்களைத் தவிர, பிற வீரர்களால் சோபிக்க முடியவில்லை. கடைசி 7 ஓவர்களில் இலங்கை அணி 32 ஓட்டங்களுக்கு 5 விக்கெட்டுகளை இழந்து தடுமாறியது. இதனால், நிர்ணயிக்கப்பட்ட 50 ஓவர்களில் இலங்கை அணியால் 9 விக்கெட் இழப்பிற்கு 210 ஓட்;;டங்கள் மட்டுமே எடுக்க முடிந்தது.
- இலங்கைத் தொடருக்கான பாகிஸ்தான் மகளிர் ஒருநாள், T20I குழாம் அறிவிப்பு
- பாகிஸ்தான் தொடரிலிருந்து காவ்யா காவிந்தி திடீர் விலகல்
211 ஓட்டங்கள் எடுத்தால் வெற்றி என்ற இலக்குடன் களமிறங்கிய பாகிஸ்தான் அணிக்கு குல் பெரோசா – சதார் ஷமாஸ் ஜோடி முதல் விக்கெட்டுக்கு 58 ஓட்டங்கள் சேர்த்து சிறந்த ஆரம்பத்தைக் கொடுத்தது. இதில் அதிரடியாக ஆடிய குல் பெரோசா, ஒருநாள் போட்டிகளில் தனது தொடர்ச்சியான 4ஆவது அரைச் சதத்தைப் பதிவு செய்தார்.
தொடர்ந்து, சித்ரா அமீனுடன் ஜோடி சேர்ந்த பெரோசா 2ஆவது விக்கெட்டுக்கு 90 ஓட்டங்கள் குவித்து அணியின் வெற்றியை உறுதி செய்தார். பெரோசா 77 பந்துகளில் 78 ஓட்டங்களுடனும், நிதானமாக ஆடிய சித்ரா அமீன் 57 ஓட்டங்களுடனும் ஆட்டமிழந்தனர். இறுதியில், பாகிஸ்தான் அணி 43 ஓவர்களிலேயே 5 விக்கெட்டுகளை மட்டும் இழந்து இலக்கை எளிதாக எட்டியது.
இந்த வெற்றியின் மூலம் ஒருநாள் போட்டிகளில் பாகிஸ்தான் மகளிர் அணி தனது தொடர்ச்சியான 5ஆவது வெற்றியைப் பதிவு செய்துள்ளதுடன், ஐசிசி மகளிர் சம்பியன்ஷிப் புள்ளிப்பட்டியலில் 2ஆவது இடத்திற்கு முன்னேறியுள்ளது.
>>மேலும் கிரிக்கெட் செய்திகளைப் படிக்க<<
