ஆப்கானிஸ்தான் A அணிக்கு எதிராக நடைபெற்ற முத்தரப்பு ஒருநாள் தொடரின் தங்களுடைய இரண்டாவது போட்டியில் இலங்கை A அணி 8 விக்கெட்டுகள் வித்தியாசத்தில் இலகுவாக வெற்றிபெற்றது.
முதல் போட்டியில் இந்திய அணிக்கு எதிராக இலங்கை A அணி தோல்வியடைந்திருந்த நிலையில் கட்டாய வெற்றியை இலங்கை அணி களமிறங்கியிருந்தது.
>>மகளிர் T20 உலகக் கிண்ண முதல் போட்டியில் இலங்கை தோல்வி<<
இந்தப் போட்டிக்கான இலங்கை அணியில் தமிழ்பேசும் வீரர்களான மொஹமட் சிராஸ், விஜயகாந்த் வியாஸ்காந்த் மற்றும் குகதாஸ் மாதுளன் ஆகிய மூவருக்கு வாய்ப்பு வழங்கப்பட்டிருந்தது.
போட்டியில் முதலில் துடுப்பெடுத்தாடிய ஆப்கானிஸ்தான் அணி 49.4 ஓவர்கள் நிறைவில் சகல விக்கெட்டுகளையும் இழந்து 245 ஓட்டங்களை பெற்றுக்கொண்டது.
ஆப்கானிஸ்தான் அணி சார்பாக ஹஸன் இசகில் 46 ஓட்டங்களையும், பாஹீர் ஷா 44 ஓட்டங்களையும் பெற்றுக்கொண்டனர். பந்துவீச்சில் சாமிக குணசேகர 3 விக்கெட்டுகளை வீழ்த்த, சுழல் பந்துவீச்சில் சிறப்பாக செயற்பட்ட விஜயாந்த் வியாஸ்காத் 2 விக்கெட்டுகளையும், குகதாஸ் மாதுளன் 2 விக்கெட்டுகளையும் சாய்த்தனர்.
பதிலுக்கு துடுப்பெடுத்தாடிய இலங்கை அணிக்கு நிரோஷன் டிக்வெல்ல மற்றும் அவிஷ்க பெர்னாண்டோ ஆகியோர் வேகமான ஆரம்பத்தை பெற்றுக்கொடுத்தனர். இதற்கிடையில் போட்டியில் மழைக்குறுக்கிட இலங்கை அணிக்கு 41 ஓவர்களில் 231 ஓட்டங்கள் வெற்றியிலக்காக நிர்ணயித்தது.
முதல் விக்கெட்டுக்காக இவர்கள் இருவரும் 5.5 ஓவர்களில் 76 ஓட்டங்களை விளாசினர். இதில் 19 பந்துகளில் 49 ஓட்டங்களை பெற்று நிரோஷன் டிக்வெல்ல ஆட்டமிழந்தார். இதனை தொடர்ந்து விஷேன் ஹலம்பகே 4 ஓட்டங்களுடன் வெளியேறினார்.
>>இலங்கை வளர்ந்து வரும் அணிக்காக 2 சதங்களை விளாசிய அஞ்சல பண்டார<<
எனினும் அதனை தொடர்ந்து ஜோடி சேர்ந்த அவிஷ்க பெர்னாண்டோ மற்றும் சதீர சமரவிக்ரம விக்கெட்டினை விட்டுக்கொடுக்காமல் அணியை வெற்றிக்கு அழைத்துச்சென்றனர். சதீர சமரவிக்ரம 60 ஓட்டங்களையும், அவிஷ்க பெர்னாண்டோ மிகச்சிறப்பாக ஆடி 79 பந்துகளில் 108 ஓட்டங்களையும் விளாச, வெறும் 28.1 ஓவர்கள் நிறைவில் இலங்கை அணி வெற்றியை உறுதிசெய்தது.
எனவே தொடரில் மூன்று போட்டிகள் நடைபெற்றுள்ள நிலையில் ஒவ்வொரு அணிகளும் தலா 2 புள்ளிகளை பெற்றுள்ளன. இதில் ஓட்ட விகிதத்தில் முன்னிலைப் பெற்றுள்ள இலங்கை அணி முதலிடத்தை பிடித்துள்ளமை குறிப்பிடத்தக்கது.
சுருக்கம்
- ஆப்கானிஸ்தான் ‘A’ – 245 (49.4) ஹஸன் இசகில்46, பாஹிர் ஷா 44, சாமிக குணசேகர 3/32, விஜயகாந்த் வியாஸ்காந்த் 2/37, குகதாஸ் மாதுளன் 2/42
- இலங்கை ‘A’ – 231/2 (28.1) அவிஷ்க பெர்னாண்டோ 108*, சதீர சமரவிக்ர 60*, நிரோஷன் டிக்வெல்ல 49, பர்மானுல்லாஹ் சஃபி 2/40
- முடிவு – இலங்கை A அணி 8 விக்கெட்டுகள் வித்தியாசத்தில் வெற்றி
>>மேலும் கிரிக்கெட் செய்திகளைப் படிக்க <<
