கத்தாரில் நடைபெறவுள்ள வளர்ந்து வரும் வீரர்களுக்கான ஆசியக் கிண்ண கிரிக்கெட் தொடருக்கான 15 பேர் கொண்ட இலங்கை A குழாத்தை தேசிய கிரிக்கெட் தேர்வுக்குழு அறிவித்துள்ளது.
இதில் அண்மைக்காலங்கில் இலங்கை ஒருநாள் அணிக்காக விளையாடி வருகின்ற பவன் ரத்நாயக்க இலங்கை A அணியின் தலைவராக நியமிக்கப்பட்டுள்ளார்.
இலங்கை குழாத்தில் பவனுக்கு மேலதிகமாக, சர்வதேச போட்டிகளில் விளையாடிய அனுபவம் மிக்க வீரர்களாக ஜனித் லியனகே மற்றும் நிஷான் மதுஷ்க ஆகியோர் இடம்பெற்றுள்ளதுடன், ஏனைய வீரர்களாக புதுமுக மற்றும் இளம் வீரர்கள் இடம்பெற்றுள்ளனர்.
இதனிடையே, இம்முறை வளர்ந்து வரும் வீரர்களுக்கான ஆசியக் கிண்ண கிரிக்கெட் தொடருக்காக அறிவிக்கப்பட்டுள்ள இலங்கை A குழாத்தில் யாழ்ப்பாணத்தைச் சேர்ந்த சுழற்பந்து வீச்சாளர் விஜயகாந்த் வியாஸ்காந்த்தும், கொழும்பைச் சேர்ந்த சாருஜன் சண்முகநாதனும் இடம்பிடித்துள்ளனர்.
- தனஞ்சய – மெண்டிஸ் சதங்களோடு முதல் டெஸ்டில் இலங்கை ஆதிக்கம்
- ஆப்கானிடமும் தோற்று அரையிறுதி வாய்ப்பை இழந்தது இலங்கை U19 அணி
நவம்பர் 19 முதல் 29 ஆம் திகதி வரை நடைபெறவுள்ள வளர்ந்து வரும் வீரர்களுக்கான ஆசியக் கிண்ண கிரிக்கெட் தொடரில், இலங்கை A அணி, A குழுவில் இடம்பெற்றுள்ளது. இதே பிரிவில் பங்களாதேஷ் A, ஆப்கானிஸ்தான் A மற்றும் ஹொங்காங் ஆகிய அணிகளும் அங்கம் வகிக்கின்றன. மறுபுறத்தில் B குழுவில் இந்தியா A, பாகிஸ்தான் A, நேபாளம் மற்றும் ஐக்கிய அரபு இராச்சியம் ஆகிய அணிகள் இடம்பெற்றுள்ளன.
50 ஓவர்கள் கொண்ட போட்டியாக நடைபெறும் இத்தொடர், ஆசியாவைச் சேர்ந்த வளர்ந்து வரும் இளம் கிரிக்கெட் வீரர்கள் தங்களது திறமையை சர்வதேச அளவில் வெளிப்படுத்துவதற்கான ஒரு முக்கிய களமாக அமையும்.
வளர்ந்து வரும் வீரர்களுக்கான ஆசியக் கிண்ண கிரிக்கெட் தொடரில் பங்குபற்றவுள்ள இலங்கை அணி எதிர்வரும் நவம்பர் 16 ஆம் திகதி கத்தாருக்கு புறப்பட்டுச் செல்லவுள்ளது.
இலங்கை A குழாம்விபரம்:
பவன் ரத்நாயக்க (தலைவர்), நிஷான் மதுஷ்க, சினேத் ஜயவர்தன, லசித் க்ரூஸ்புள்;ளே, நிபுன் தனஞ்சய, ஜனித் லியனகே, சாமிக ஹீனடிகல, சாருஜன் சண்முகநாதன், ரவிந்து பெர்னாண்டோ, விஜயகாந்த் வியாஸ்காந்த், வனுஜ சஹன், துலாஜ் சமுதித, துவிந்து ரணதுங்க, லஹிரு சமரகோன், கருக்க சங்கேத்
