රග්බි ක්‍රීඩාව ඉහළ නැංවීමට පියවර රැසක්

556
 

ශ්‍රී ලංකා රග්බි ක්‍රීඩාවේ අනාගතයට සුබවාදී පෙරනිමිති පෙන්නුම් කරමින් නව ක්‍රීඩා අමාත්‍ය ගරු නාමල් රාජපක්ෂ මහතාගේ මගපෙන්වීම යටතේ රග්බි ක්‍රීඩාවේ අනාගතයට සහ එහි සංවර්ධනයට අවශ්‍ය තීරණ රැසක් ගෙන ඇත.

එම කටයුතු පිළිබඳව සාකච්ඡා කිරීම සඳහා ක්‍රීඩා අමාත්‍යවරයා සහ ශ්‍රී ලංකා රග්බි සම්මේලනයේ බලධාරීන් අතර ඉතා ඵලදායී හමුවක් පසුගිය සතියේ පැවැත්විය.

කෙසේ නමුත් දැනට පවතින කොරෝනා වසංගතය නිසාවෙන් රග්බි ක්‍රීඩාවට ද බලපෑම් එල්ලව ඇති අතර ඔක්තෝබර් මස 30 වැනිදා ආරම්භ වීමට නියමිතව තිබූ අන්තර් සමාජ සත් සාමාජික රග්බි තරගාවලිය ද දින නියමයකින් තොරව කල් දැමීමට සිදු විය.

එනමුත් පසුගිය සතියේ ක්‍රීඩා අමාත්‍යවරයා සමඟ පැවති සාකච්ඡාවේ දී ගත් තීරණ සහ එහි ඵලදායීතාව පිළිබඳව ඉඟි පලකරමින් ශ්‍රී ලංකා රග්බි සභාපති Rizly Illyas මහතා ප්‍රකාශ කර සිටියේ මෙරට රග්බි ක්‍රීඩාව අනාගතය ඉතාමත් හොඳ හස්තයක රැඳී තිබෙන බවයි.

එම සාකච්ඡාවේ දී පහත කරුණු පිළිබඳව අවධානය යොමු කර තිබුණි.

  • සත් සාමාජික තරගාවලිය 2021 දී 

ඔක්තෝබර් මාසයේ දී ආරම්භ වීමට තිබූ නමුත් කල් දැමුණු සත් සාමාජික තරගාවලිය ලබන වසරේ දී (2021) නැවත ආරම්භ කළ හැකි වනු ඇතැයි ක්‍රීඩා අමාත්‍යවරයා විශ්වාස කරයි.

මෙම තරගාවලිය නියමිත සෞඛ්‍ය නීති රීති හා රෙගුලාසි අනුගමනය කරමින් සහ ක්‍රීඩකයන් දින හතක නිරෝධායන ක්‍රියාවලියකට යටත්ව ජෛව ආරක්ෂිත බුබුලකට හැඩගැහෙමින් තරගාවලිය පැවැත්වීමට තීරණය කර ඇත.

  • කාර්ය සාධන ක්‍රියාකාරකම් සඳහා නාවලපිටිය ක්‍රීඩාපිටිය

ඉහළ කාර්ය සාධනයක් ඇති කිරීමට අවශ්‍ය ක්‍රියාකාරකම් සඳහා ක්‍රීඩා පිටියක් ශ්‍රී ලංකා රග්බි සම්මේලනය යටතේ නොමැති බව රග්බි සභාපති Rizly Illyas මහතා අවධාරණය කරන ලදි.

එයට විසඳුමක් ලෙස නාවලපිටිය ජයතිලක ක්‍රීඩාංගණය ඉහළ කාර්ය සාධනයක් ඇති කිරීමට අවශ්‍ය පුහුණුවීම් කටයුතු සඳහා රග්බි සම්මේලනයට ලබා දීමට හැකි බව ප්‍රකාශ කරන ලදි.

  • සියලු කණ්ඩායම් සඳහා විදේශ ක්‍රීඩකයන්   

Dialog අන්තර් සමාජ රග්බි තරගාවලියේ ක්‍රීඩා කරන කණ්ඩායම් අට සඳහා විදෙස් ක්‍රීඩකයන් ඇතුළත් කරගැනීමට අවධානය යොමු කරන ලදි. මීට පෙර වසරවල දී ද සමහර කණ්ඩායම් විදෙස් ක්‍රීඩකයන් සිය කණ්ඩායමට එක් කරගැනීමට කටයුතු කර තිබූ අතර එමගින් තරගාවලියේ උණුසුම ද වැඩි විය.

ඒ අනුව 2021 තරග වාරයේ සිට තරගාවලිය සඳහා සහභාගි වන කණ්ඩායම් 8 ම විදෙස් ක්‍රීඩකයන් ඇතුළත් කරගැනීමට අවස්ථාව හිමි වේ.

තවත් රග්බි පුවත්:

  • Carlton Super Sevens නැවත හඳුන්වා දීම 

ඉන්දියානු ප්‍රිමියර් ලීගයට සමාන franchised තරගාවලියක් ලෙස පැවැත්වූ Carlton Super Sevens තරගාවලිය 2010 වසරේ දී ආරම්භ කළ අතර එය, ලොව නම් දැරූ ක්‍රීඩකයන්ගේ සහභාගිත්වයෙන් ඉතා සාර්ථකව පැවැත්විය.

පසුව එම තරගාවලිය Sri Lanka Super Sevens ලෙස නම් කරමින් 2016, 2017 වසරවල දී පැවැත්වූ නමුත් 2017 වසරින් පසු එම තරගාවලිය නොපැවැත්වීමට කටයුතු කරන ලදි.

එම තරගාවලිය සාර්ථක කරගැනීමට 2010 සිට 2014 දක්වා විශාල සේවාවක් සිදු කළ වර්තමාන ක්‍රීඩා අමාත්‍යවරයා විසින් ඉදිරි වසරවල දී ඒ හා සමාන තරගාවලිය නැවතත් ඇති කිරීමට අවශ්‍ය සහය රග්බි සම්මේලනය වෙත ලබා දීමට පොරොන්දු වී ඇත.

  • දෙවන සහ තෙවන පරම්පරාවේ ක්‍රීඩකයන් සොයාගැනීම 

මෙම සාකච්ඡාවේ දී අවධානය යොමු වූ ප්‍රධාන කරුණක් වූයේ රට වෙනුවෙන් ක්‍රීඩා කිරීමට හැකි දක්ෂ දෙවන සහ තෙවැනි පරම්පරාවේ ශ්‍රී ලංකා සම්භවයක් සහිත ක්‍රීඩකයින් සොයාගැනීම සහ ඔවුන්ව රට වෙනුවෙන් ක්‍රීඩා කරවීමට ඇති හැකියාව පිළිබඳවයි.

මෙය ක්‍රීඩා අමාත්‍යවරයා සිය අවධානය ප්‍රධාන වශයෙන් යොමුකළ ක්‍රියාමාර්ගයකි.

>> තවත් රග්බි පුවත් සඳහා පිවිසෙන්න – රග්බි පිටුවට <<