இங்கிலாந்து லயன்ஸ் அணிக்கு எதிராக நடைபெறவுள்ள மூன்றாவது உத்தியோகபூர்வமற்ற ஒருநாள் போட்டியிலிருந்து அஞ்செலோ மெதிவ்ஸ் விடுவிக்கப்பட்டுள்ளார்.
இலங்கை அணியின் அனுபவ வீரரான அஞ்செலோ மெதிவ்ஸ் முதலிரண்டு போட்டிகளிலும் விளையாடியிருந்ததுடன், இரண்டாவது போட்டியில் அரைச்சதம் கடந்திருந்தார்.
>> இரண்டாவது ஒருநாள் போட்டிக்கான இலங்கை A குழாம் அறிவிப்பு
இந்நிலையில் நியூசிலாந்து சுற்றுப் பயணத்துக்காக இலங்கை அணி தயாராகிவருகின்ற நிலையில், ரதெல்ல மைதானத்தில் நடைபெற்றுவருகின்ற பயிற்சி முகாமில் அஞ்செலோ மெதிவ்ஸ் இணைந்துகொண்டுள்ளார்.
இதன் காரணமாகவே மூன்றாவது போட்டிக்கான இலங்கை A குழாத்தில் மெதிவ்ஸ் இணைக்கப்படவில்லை. மெதிவ்ஸ் அணியிலிருந்து நீக்கப்பட்டுள்ள போதும், அவருக்கு பதிலாக மேலதிக வீரர்களை இலங்கை A அணி பெயரிடவில்லை.
இரண்டாவது போட்டியில் விளையாடிய குழாத்திலிருந்து எந்தவித மாற்றங்களையும் இலங்கை கிரிக்கெட் சபை மேற்கொள்ளவில்லை. தேசிய அணி வீரர்களான நுவனிது பெர்னாண்டோ, அவிஷ்க பெர்னாண்டோ, சதீர சமரவிக்ரம, பிரமோத் மதுசான் மற்றும் துனித் வெல்லாலகே போன்ற வீரர்கள் தொடர்ந்தும் A அணியில் இணைக்கப்பட்டுள்ளனர்.
இங்கிலாந்து லயன்ஸ் மற்றும் இலங்கை A அணிகளுக்கு இடையிலான மூன்றாவது ஒருநாள் போட்டி செவ்வாய்க்கிழமை (21) நடைபெறவுள்ளமை குறிப்பிடத்தக்கது.
இலங்கை A குழாம்
அவிஷ்க பெர்னாண்டோ, லசித் குரூஸ்புள்ளே, நுவனிது பெர்னாண்டோ, சதீர சமரவிக்ரம, சஹான் ஆராச்சிகே, துனித் வெல்லாலகே, இசித விஜேசுந்தர, பிரமோத் மதுசான், துஷான் ஹேமன்த, அம்ஷி டி சில்வா, கவிஷ்க அஞ்சுல, லஹிரு உதார, நிபுன் தனன்ஜய, சுமிந்த லக்ஷான்
>>மேலும் கிரிக்கெட் செய்திகளைப் படிக்க<<
