மேற்கிந்தியத் தீவுகள் அணிக்கு எதிரான முதல் ஒருநாள் போட்டியில், விராட் கோலி மற்றும் சுப்மன் கில்லின் அதிரடி சதங்களால் இந்திய அணி 8 விக்கெட் வித்தியாசத்தில் அபார வெற்றி பெற்றது.
திருவனந்தபுரத்தில் நேற்று (27) நடைபெற்ற இந்தப் போட்டியில் நாணய சுழற்சியில் வென்ற இந்திய அணி முதலில் பந்துவீச்சை தேர்வு செய்தது.
இதன்படி, முதலில் களமிறங்கிய மேற்கிந்தியத் தீவுகள் அணிக்கு ஆரம்ப வீரர்களான ஜோன் கெம்பெல் மற்றும் ஜஸ்டின் கிரீவ்ஸ் ஜோடி சிறப்பான ஆரம்பத்தைத் தந்தது. மேற்கிந்தியத் தீவுகள் அணி 135 ஓட்டங்களுக்கு அதன் முதல் விக்கெட்டினை இழந்தது. சிறப்பான ஆட்டத்தை வெளிப்படுத்திய ஜோன் கெம்பெல் 60 பந்துகளில் 62 ஓட்டங்கள் எடுத்து ஆட்டமிழந்தார். அதில் 6 பவுண்டரிகள் மற்றும் 3 சிக்ஸர்கள் அடங்கும். அதன் பின், கீஸி கார்ட்டி 13 ஓட்டங்கள், அணித்தலைவர் சாய் ஹோப் 12 ஓட்டங்கள் எடுத்து ஆட்டமிழந்து ஏமாற்றமளித்தனர்.
இதனையடுத்து, ஜஸ்டின் கிரீவ்ஸ் மற்றும் அமிர் ஜாங்கோ ஜோடி சேர்ந்தனர். ஆரம்பம் முதலே நேர்த்தியான ஆட்டத்தை வெளிப்படுத்திய ஜஸ்டின் கிரீவ்ஸ் ஒருநாள் போட்டிகளில் கன்னி சதத்தை விளாசி அசத்தினார். அவர் 108 பந்துகளில் 101 ஓட்டங்கள் எடுத்தார். அதில் 12 பவுண்டரிகள் அடங்கும்.
மறுமுனையில் அதிரடியாக விளையாடிய அமிர் ஜாங்கோ அரைச் சதம் விளாசி அசத்தினார். அவர் 43 பந்துகளில் 58 ஓட்டங்கள் எடுத்து கடைசி வரை களத்தில் இருந்தார். அதில் 7 பவுண்டரிகள் மற்றும் ஒரு சிக்ஸ்ர் அடங்கும். ரொஸ்டன் சேஸ் 24 ஓட்டங்கள் எடுத்தார். மற்ற வீரர்கள் பெரிதாக ஓட்டங்களைக் குவிக்கவில்லை.
இறுதியில் மேற்கிந்தியத் தீவுகள் அணி 50 ஓவர்கள் முடிவில், 7 விக்கெட் இழப்பிற்கு 295 ஓட்டங்கள் எடுத்தது.
இந்திய அணி தரப்பில் துல்லியமாக சுழல்;பந்து வீசிய குல்தீப் யாதவ் 10 ஓவர்களில் 40 ஓட்டங்கள் மட்டுமே விட்டுக்கொடுத்து 4 விக்கெட்களை சாய்த்தார். பிரசித் கிருஷ்ணா 2 விக்கெட்களையும், நிதிஷ் குமார் ரெட்டி ஒரு விக்கெட்டையும் வீழ்த்தினர்.
- சென்னை சுப்பர் கிங்ஸ் தலைமைப் பயிற்சியாளராக ஸஹீர் கான் நியமனம்
- 2027 ஐ.பி.எல் ஏலம் நடைபெறும் இடமாக கோவா நகர் தெரிவு
296 ஓட்டங்கள் எடுத்தால் வெற்றி என்ற இலக்குடன் களமிறங்கிய இந்திய அணிக்கு ஆரம்ப வீரர் ரோஹித் சர்மா 32 ஓட்டங்களில் ஆட்டமிழந்தார். இதன்பின் ஜோடி சேர்ந்த அணித்தலைவர் சுப்மன் கில் மற்றும் விராட் கோலி மேற்கிந்தியத் தீவுகளின் பந்துவீச்சை துவம்சம் செய்தனர். அபாரமாக ஆடிய கில் 108 பந்துகளில் 13 பவுண்டரிகள், ஒரு சிக்ஸருடன் 110 ஓட்டங்கள் விளாசி 10ஆவது ஒருநாள் சதத்தைப் பெற்று ஆட்டமிழந்தார்.
இதையடுத்து ருதுராஜ் கெய்க்வாட்டுடன் சேர்ந்து விராட் கோலி அதிரடி காட்டினார். அவர் 74 பந்துகளில் சதமடித்து அசத்தினார். தொடர்ந்து அதிரடி காட்டிய கோலி, அணியை வெற்றிப்பாதைக்கு அழைத்துச்சென்றார். இறுதிவரை ஆட்டமிழக்காமல் களத்தில் இருந்த கோலி 88 பந்துகளில் 10 பவுண்டரிகள், 9 சிக்ஸர்களுடன் 139 ஓட்டங்கள் விளாசினார்.
இப்போட்டியில், விராட் கோலி தனது 303-வது இன்னிங்ஸில் 15 ஆயிரம் ஓட்டங்கள் என்ற வரலாற்று மைல்கல்லை எட்டினார். இதன் மூலம் சர்வதேச ஒருநாள் கிரிக்கெட் வரலாற்றில் 15,000 ஓட்டங்களைப் பூர்த்தி செய்த உலகின் இரண்டாவது வீரர் என்ற பெருமையை அவர் பெற்றுள்ளார்.
இதற்கு முன் முன்னாள் இந்திய வீரர் சச்சின் டெண்டுல்கர் தனது 377-வது இன்னிங்ஸில் 15,000 ஓட்டங்களை எட்டியதே அதிவேக சாதனையாக இருந்தது. தற்போது சச்சினை விட 74 இன்னிங்ஸ்கள் குறைவாக எடுத்துக்கொண்டு, அதிவேகமாக 15,000 ஓட்டங்களைக் கடந்த வீரர் என்ற புதிய உலக சாதனையை விராட் கோலி படைத்துள்ளார்.
இறுதியில் இந்திய அணி 41.4 ஓவர்களில் இலக்கை கடந்து வெற்றிபெற்றது.
மேற்கிந்தியத் தீவுகள் சார்பில் அல்சரி ஜோசப், ரோஸ்டன் சேஸ் ஆகியோர் தலா ஒரு விக்கெட்டினை வீழ்த்தினர்.
போட்டியின் ஆட்டநாயகனாக குல்தீப் யாதவ் தெரிவானார்.
இந்த அசத்தல் வெற்றியின் மூலம் 3 போட்டிகள் கொண்ட ஒருநாள் தொடரில் இந்திய அணி 1-0 என முன்னிலை பெற்றுள்ளது. இரு அணிகளுக்கும் இடையிலான இரண்டாவது ஒருநாள் போட்டி 30ஆம் திகதி குவஹாத்தியில் நடைபெறவுள்ளது.
>>மேலும் கிரிக்கெட் செய்திகளைப் படிக்க<<
