2018 වසරේ පැවති දකුණු ආසියානු කනිෂ්ඨ මලල ක්‍රීඩා තරගාවලියේ දී සහ ආසියානු කනිෂ්ඨ මලල ක්‍රීඩා තරගාවලියේ දී නව වාර්තාවක් සමඟින් 400m ඉසව්වේ රන් පදක්කම් ජයග්‍රහණය කරමින් කරළියට පැමිණ, ගෙවී ගිය වසරේ දකුණු ආසියානු තරගාවලියේ දී ද 400m ඉසව්වෙන් ලක්මව රනින් සැරසූ ඔහු නමින් අරුණ දර්ශන ය.
Photo Story: අතීතය – අනාගතය යා කරන කුලවංශයන්
ත්‍රිකුණාමලය දිස්ත්‍රික්කයේ සේරුවාවිල ප්‍රදේශයේ දී උපත ලැබූ ඔහු බොහෝ දුෂ්කරතා මධ්‍යයේ තම ක්‍රීඩා දිවිය ආරම්භ කළ ක්‍රීඩකයෙකි. සහජයෙන් ලැබූ දක්ෂතාවය කුඩා කල සිටම පෙන්නුම් කළ ඔහු ඉතා කැපවීමක් ඇති ක්‍රීඩකයන් අතලොස්සකින් කෙනෙකි.
සේරුවාවිල සිට ජපානය දක්වා සිය දස්කම් පෙන්නූ මෙම “සේරුවාවිල රන් කොල්ලා” මෙරට මලල ක්‍රීඩාව නැවතත් තිලකරත්න යුගයක් කරා ගෙන යෑමට වෙර දරයි. මෙවර Photo Story ලිපිය වෙන්වන්නේ අරුණ දර්ශන මෙතෙක් ආ ගමන පිළිබඳව ThePapare.com කැමරා කාචයේ සටහන් වූ සේයා රූ වෙනුවෙනි.
1.දීර්ඝ අනාගතයකට පාසල් වියේ දී ම පෙර නිමිති පහල කිරීම
කුඩා කල සිටම 400m ඉසව්ව තුළින් සහජ දස්කම් පෙන්නුම් කළ ඔහු පාසල් මට්ටමේ තරගාවලිවල දී ඉතා කැපී පෙනෙන දස්කම් දැක්වූ අතර 2017 වසරේ පැවති සමස්ත ලංකා පාසල් මලල ක්‍රීඩා තරගාවලියේ දක්ෂතම ක්‍රීඩකයා ලෙස අභිෂේක දිනා ගත්තේය.
2.ජාත්‍යන්තර කනිෂ්ඨ ක්‍රීඩා පිටිය ආක්‍රමණය කිරීම
ජාතික කනිෂ්ඨ පිටියේ දැක්වූ දස්කම් නිසාවෙන් 2018 වසරේ දකුණු ආසියානු කනිෂ්ඨ මලල ක්‍රීඩා තරගාවලිය නියෝජනයට තේරී පත් වූ ඔහු එහි 400m ඉසව්ව නව තරගාවලි වාර්තාවක් ද (තත්පර 46.55 ) සමඟින් ජයග්‍රහණය කරන අතර 200m තරගයේ ද රන් පදක්කම ඔහු විසින් දිනා ගත්තේය (තත්පර 21:50).
3.දකුණු ආසියානු වාර්තාවකට දායක වීම
තම ඉසව් ද්විත්වයම ඉතා සාර්ථකව අවසන් කළ ඔහු 400X4 සහය දිවීමේ තරගයේ දී ඉතා හොඳින් දස්කම් දක්වමින් ජයග්‍රාහී අවසානයක් තම කණ්ඩායමට ලබා දෙන්නේ එම ඉසව්වට අදාළ දකුණු ආසියානු කනිෂ්ඨ වාර්තාව ද ( තත්පර 3:08:23) අලුත් කරමිනි.
4.ශ්‍රී ලංකා නාමයට ආසියාවේ තැනක් දිනා දීම
2018 වසරේ පැවති ආසියානු කනිෂ්ඨ මලල ක්‍රීඩා තරගාවලියේ දී 400m ඉසව්ව නව තරගාවලී වාර්තාවක් ද සමඟින් (තත්පර 45:79) ජය ගැනීමට ඔහු සමත් වන අතර එහි 400X4 සහය දිවීමේ තරගය ද කැපී පෙනෙන දස්කම් දක්වමින් ඔහු ඇතුළු කණ්ඩායම ජය ගැනීමට සමත් විය (තත්පර 3:08:70).
5.බලාපොරොත්තු බොඳ වූ ජ්‍යෙෂ්ඨ තරගාවලිය
කනිෂ්ඨ මට්ටමේ තරගාවලී රැසකම දැක්වූ දස්කම් නිසාවෙන් 2018 වසරේ ආසියානු ක්‍රීඩා තරගාවලියට තේරී පත් වූ ඔහු 400m ඉසව්වේ අවසන් පූර්ව අදියර තෙක් පැමිණීමට සමත් වූ අතර 400X4 සහය දිවීමේ තරගය නියෝජනය කළ ඔහු ඇතුළු කණ්ඩායම ඉතා හොඳ තරගයකින් පසුව හතරවැන්නා (තත්පර 3:02:74) ලෙස තරගය නිමා කරන්නේ ඉතා සුළු කාලයකින් (තත්පර 0:00:80කින්) ලෝකඩ පදක්කම අහිමි කර ගනිමිනි.
6.ජාතික තලය සිය අණසකට නතුකර ගැනීම
ජාත්‍යන්තර කනිෂ්ඨ පිටියේ පෑ දස්කම්වලින් අනතුරුව 2018 වසරේ ජාතික මහා ක්‍රීඩා උළෙලේ දී 400m ඉසව්වේ ජාතික ශූරයා (තත්පර 48:12) බවට පත්වන ඔහු 2019 වසරේ ජාතික මලල ක්‍රීඩා තරගාවලියේ ද තම ඉසව්වේ කිරුළ රැක ගැනීමට සමත් වනවා (තත්පර 46:76).
7.රණවිරු පිටියෙහි දස්කම්
යුද හමුදා මලල ක්‍රීඩා සංචිතය හා එක්වූ අරුණ දිගින් දිගටම දැක්වූ දස්කම් නිසාවෙන් 2019 වසරේ “Military World Games” නියෝජනය කිරීමට සමත් විය.
8.දකුණු ආසියානු තලය නැවතත් ජය ගැනීම
කෙටි කලක් තුල මෙරට මලල ක්‍රීඩාවේ ඉහළට පැමිණි ඔහු 2019 වසරේ දකුණු ආසියානු ක්‍රීඩා උළෙලේ දී තමන් කනිෂ්ඨ මට්ටමේ රඳවා ගත් ආධිපත්‍ය රැක ගනිමින් 400m ඉසව්ව ජයග්‍රහණය (තත්පර 46:69) කිරීමට සමත් වන්නේ මැකී යමින් තිබූ මෙරට මලල ක්‍රීඩාවේ අනාගතයට සුබ පෙර නිමිති පහල කරමිනි.
බොහෝ දුෂ්කරතා ජය ගනිමින් මෙරට ක්‍රීඩාව ස්වර්ණමය යුගයකට රැගෙන යාමට වෙහෙසෙන අරුණගේ ක්‍රීඩා දිවියේ ඉදිරි අනාගතය විජයග්‍රහණය කිරීමට අවශ්‍ය ශක්තිය ධෛර්යය ලැබේවායි ThePapare.com අප සුබ පතන්නෙමු.
තවත් Photo Story ලිපියක් සමඟින් හමුවෙමු. රැඳී සිටින්න ThePapare.com සමඟින්.
>> තවත් මලල ක්‍රීඩා පුවත් සඳහා පිවිසෙන්න – මලල ක්‍රීඩා පිටුවට <<
