தேசிய சுப்பர் லீக் இறுதிப்போட்டியில் வென்றது தம்புள்ள

இலங்கை கிரிக்கெட் சபையின் ஏற்பாட்டில் நடைபெற்றுவந்த தேசிய சுப்பர் லீக் (NSL) 4 நாள் போட்டி தொடரில் தனஞ்சய டி சில்வா தலைமையிலான தம்புள்ள அணி வெற்றியை சுவீகரித்துக்கொண்டது.

கொழும்பு ஆர்.பிரேமதாஸ சர்வதேச கிரிக்கெட் மைதானத்தில் நடைபெற்ற இந்த இறுதிப்போட்டியில் கொழும்பு அணியை எதிர்கொண்ட தம்புள்ள அணி 119  ஓட்டங்கள் வித்தியாசத்தில் வெற்றிபெற்றது.

போட்டியில் நாணய சுழற்சியில் வெற்றிபெற்று முதலில் துடுப்பெடுத்தாடிய தம்புள்ள அணி 222/8d ஓட்டங்களை பெற்றிருந்தபோது ஆட்டத்தை இடைநிறுத்தியது.

>>LPL தொடர் 2026; வெளிநாட்டு வீரர்களுக்கான பதிவு விபரம் வெளியீடு<<

துடுப்பாட்ட வீரர்கள் ஆரம்பங்களை பெற்றிருந்த போதும், அதனை பெரிய ஓட்ட எண்ணிக்கையாக மாற்றுவதற்கு தவறியிருந்தனர். அதிகபட்சமாக சொனால் தினுஷ 51 ஓட்டங்களையும், விக்கெட் காப்பாளர் அஞ்சல பண்டார 40 ஓட்டங்களையும், பவன் ரத்நாயக்க 39 ஓட்டங்களையும் பெற்றனர். பந்துவீச்சில் அனுபவ சுழல் பந்துவீச்சாளர் பிரபாத் ஜயசூரிய 4 விக்கெட்டுகளையும், தனன்ஜய லக்ஷான் மற்றும் ஜனித் லியனகே ஆகியோர் தலா 2 விக்கெட்டுகளையும் கைப்பற்றினர்.

இதனையடுத்து தங்களுடைய முதல் இன்னிங்ஸை ஆரம்பித்த கொழும்பு அணி கவிந்து பத்திரணவின் வேகப்பந்துவீச்சுக்கு தடுமாறியது. கவிந்து பத்திரண அபாரமாக பந்துவீசி 5 விக்கெட்டுகளை சாய்க்க, வெறும் 146 ஓட்டங்களுக்கு சகல விக்கெட்டுகளையும் கொழும்பு அணி இழந்தது.

கொழும்பு அணி சார்பாக இளம் விக்கெட் காப்பு துடுப்பாட்ட வீரர் சாருஜன் சண்முகநாதன் அதிகபட்சமாக 44 ஓட்டங்களை பெற்றார். பந்துவீச்சில் கவிந்து பத்திரணவையடுத்து அகில தனஞ்சய 3 விக்கெட்டுகளை வீழ்த்தினார்.

தொடர்ந்து 76 ஓட்டங்கள் முன்னிலையில் இரண்டாவது இன்னிங்ஸை ஆரம்பித்த தம்புள்ள அணிக்கு நிசான் மதுஷ்க 43 ஓட்டங்களை பெற்று நேர்த்தியான ஆரம்பத்தை கொடுத்தார். ஆனாலும் இவரின் ஆட்டமிழப்பை தொடர்ந்து தடுமாறிய தம்புள்ள அணி சீரான இடைவெளிகளில் விக்கெட்டுகளை இழந்தது.

இறுதியாக அகில தனஞ்சய ஆட்டமிழக்காமல் 53 ஓட்டங்களை பெற தம்புள்ள அணி 222 ஓட்டங்களை மீண்டும் பெற்று, கொழும்பு அணிக்கு வெற்றியிலக்காக 299 ஓட்டங்களை நிர்ணயித்தது. பந்துவீச்சில் சமோத் பட்டகே 4 விக்கெட்டுகளையும், பிரபாத் ஜயசூரிய 3 விக்கெட்டுகளையும் வீழ்த்தினர்.

>>ஆரோன் ஹார்டியின் சகலதுறை ஆட்டத்தால் சம்பியனாகியது பெஷாவர் சல்மி<<

பின்னர் 299 ஓட்டங்களை வெற்றியிலக்காக நோக்கிய களமிறங்கிய கொழும்பு அணி மூன்றாவது நாள் ஆட்டநேர நிறைவில் 154 ஓட்டங்களுக்கு 4 விக்கெட்டுகளை இழந்திருந்தது. இரண்டு அணிகளுக்கும் வெற்றிவாய்ப்பு காணப்பட்ட நிலையில், நான்காவது நாளில் தடுமாற்றம் கொண்ட கொழும்பு அணி அடுத்தடுத்து விக்கெட்டுகளை இழந்தது.

அபாரமாக பந்துவீசிய மொஹமட் சிராஸ், கொழும்பு அணியின் தலைவர் சரித் அசலங்கவின் (35) விக்கெட்டினை வீழ்த்த, அடுத்த பந்தில் கவீஜ கமகே ரன்-அவுட் மூலம் ஆட்டமிழந்தார். இதனையடுத்து விக்கெட்டுகள் தொடர்ச்சியாக வீழ்த்தப்பட 179 ஓட்டங்களுக்கு சகல விக்கெட்டுகளையும் இழந்த கொழும்பு அணி 119  ஓட்டங்களால் தோல்வியை தழுவியது.

கொழும்பு அணிக்காக அதிகபட்சமாக தனன்ஜய லக்ஷான் 84 ஓட்டங்களை பெற, தம்புள்ள அணிக்காக சிறப்பாக பந்துவீசிய மொஹமட் சிராஸ் 4 விக்கெட்டுகளையும், நிசல அபேரத்ன 2 விக்கெட்டுகளையும் வீழ்த்தினர்.

சுருக்கம்

தம்புள்ள அணி – 222/9d (70), சொனால் தினுஷ 51, அஞ்சல பண்டார 40, பவன் ரத்நாயக்க 39, பிரபாத் ஜயசூரிய 4/54, ஜனித் லியனகே 2/18, தனன்ஜய லக்ஷான் 2/42

 

கொழும்பு அணி – 146 (44.3), சாருஜன் சண்முகநாதன் 44, சரித் அசலங்க 27, கவிந்து பத்திரண 5/51, அகில தனன்ஜய 3/17

 

தம்புள்ள அணி  (2வது இன்னிங்ஸ) – 222 (71.4), அகில தனன்ஜய 53*, நிசான் மதுஷ்க 43, சமோத் பட்டகே 4/55, பிரபாத் ஜயசூரிய 3/17

 

கொழும்பு அணி (2வது இன்னிங்ஸ்) – 179 (50.2), தனன்ஜய லக்ஷான் 84, சரித் அசலங்க 35, மொஹமட் சிராஸ் 4/38, நிசல அபேரத்ன 2/23

 

முடிவு – தம்புள்ள அணி 119 ஓட்டங்கள் வித்தியாசத்தில் வெற்றி

>>மேலும் கிரிக்கெட் செய்திகளைப் படிக்க<<