ஆரோன் ஹார்டியின் அபாரமான சகலதுறை ஆட்டத்தின் உதவியுடன், ஹைதராபாத் கிங்ஸ்மென் அணியை 5 விக்கெட்டுகளால் வீழ்த்தி, பெஷாவர் சல்மி அணி பாகிஸ்தான் சுப்பர் லீக் 2026 தொடரின் சம்பியன் பட்டத்தைச் சூடியது.
ஆரோன் ஹார்டி தனது சிறந்த பந்துவீச்சை வெளிப்படுத்தி 27 ஓட்டங்களுக்கு 4 விக்கெட்டுகளைக் கைப்பற்றி ஹைதராபாத் அணியை 129 ஓட்டங்களுக்குள் சுருட்டிய பின்னர் துடுப்பாட்டத்தில் தடுமாறிய தனது அணியை மீட்பதற்காக களமிறங்கிய அவர், 39 பந்துகளில் ஆட்டமிழக்காமல் 56 ஓட்டங்களைக் குவித்து வெற்றியை உறுதி செய்தார்.
இதன் மூலம் இஸ்லாமாபாத் யுனைடெட் மற்றும் லாகூர் கலாண்டர்ஸ் அணிகளுக்குப் பிறகு, ஒன்றுக்கு மேற்பட்ட முறை பி.எஸ்.எல் சம்பியன் பட்டத்தை வென்ற மூன்றாவது அணி என்ற பெருமையை பெஷாவர் சல்மி பெற்றுள்ளது. இதற்கு முன்னர் 2017 ஆம் ஆண்டு அந்த அணி சம்பியன் பட்டம் வென்றிருந்தமை குறிப்பிடத்தக்கது.
மறுபுறம், ஹைதராபாத் கிங்ஸ்மென் அணிக்கு இது ஒரு ஏமாற்றமான முடிவாக அமைந்தது. தொடரின் முதல் நான்கு போட்டிகளில் தோல்வியடைந்த போதிலும், அடுத்த எட்டு போட்டிகளில் ஏழை வெற்றிகொண்டு இறுதிப் போட்டி வரை முன்னேறிய அவர்களின் பயணம் ஒரு அதிசயமாகவே பார்க்கப்பட்டது. எனினும், இறுதிப் போட்டியில் அவர்களின் துடுப்பாட்ட வரிசை சரிந்ததால், பி.எஸ்.எல் இறுதிப் போட்டி வரலாற்றில் முதல் இன்னிங்ஸில் பதிவான மிகக்குறைந்த ஓட்ட எண்ணிக்கையைப் பதிவு செய்தனர்.
>>இஸ்லாமாபாத் யுனைடெட் அணியில் இணையும் பவன் ரத்நாயக்க
இறுதிப் போட்டியில் நாணய சுழற்சியில் வெற்றி பெற்ற பாபர் அசாம், ஆடுகளத்தின் தன்மையைக் கருத்தில் கொண்டு முதலில் பந்துவீசத் தீர்மானித்தார். பெஷாவர் பந்துவீச்சாளர்கள் சிறப்பாகச் செயற்பட்ட நிலையில், ஹைதராபாத் வீரர்கள் அடுத்தடுத்து விக்கெட்டுகளைப் பறிகொடுத்தனர். குறிப்பாக, அந்த அணியின் நடுத்தர வரிசை வீரர்கள் வெறும் 8 பந்துகளில் 2 ஓட்டங்களுக்கு 4 விக்கெட்டுகளை இழந்து பெரும் சரிவைச் சந்தித்தனர்.
ஆரம்பத்தில் 69 ஓட்டங்களுக்கு 2 விக்கெட் என்ற வலுவான நிலையில் இருந்த ஹைதராபாத் அணியின் இன்னிங்ஸ், உஸ்மான் கான் மற்றும் கிளென் மெக்ஸ்வெல் ஆகியோரின் ஆட்டமிழப்பால் நிலைகுலைந்தது. குசல் பெரேரா ரன் அவுட் ஆன போது, நஹித் ரானா தமக்கு இடையூறு செய்ததாக நடுவர்களிடம் முறையிட்ட போதிலும், மூன்றாவது நடுவர் அதனை ஆட்டமிழப்பு என்றே அறிவித்தார்.
இன்னொரு முனையில் தனி ஒருவனாகப் போராடிய சைம் அயூப், 50 பந்துகளில் 54 ஓட்டங்களைக் குவித்து தனது பருவத்தின் முதலாவது அரைச் சதத்தைப் பதிவு செய்தார். இவருக்கு உறுதுணையாக மார்னஸ் லபுசேன் 20 ஓட்டங்களைப் பெற்றார். ஆரோன் ஹார்டி 18வது ஓவரில் இரண்டு விக்கெட்டுகளை வீழ்த்தி தனது முதலாவது T20i நான்கு விக்கெட் சாதனையைப் படைத்தார்.
130 ஓட்டங்கள் என்ற இலக்கை நோக்கி துடுப்பெடுத்தாடிய பெஷாவர் அணிக்கும் ஆரம்பம் அதிர்ச்சியாகவே அமைந்தது. பாபர் அசாம் மற்றும் முகமது ஹாரிஸ் ஆகியோரின் விக்கெட்டுகளை முகமது அலி தனது முதல் ஓவரிலேயே கைப்பற்றி ஹைதராபாத் ரசிகர்களுக்கு நம்பிக்கையூட்டினார். குசல் மெண்டிஸ் மற்றும் மைக்கேல் பிரேஸ்வெல் ஆகியோரும் விரைவாக ஆட்டமிழக்க, பெஷாவர் அணி 40 ஓட்டங்களுக்கு 4 விக்கெட்டுகளை இழந்து தடுமாறியது.
அந்த இக்கட்டான நிலையில் இணைந்த ஆரோன் ஹார்டி மற்றும் அப்துல் சமத் ஜோடி, அதிரடியாக விளையாடி 85 ஓட்டங்களை இணைப்பாட்டமாகப் பகிர்ந்து கொண்டனர். அப்துல் சமத் 34 பந்துகளில் 48 ஓட்டங்களைப் பெற்று வெற்றிக்கு மிக அருகில் இருந்தபோது ஆட்டமிழந்தார். இறுதியில் ஃபர்ஹான் யூசுப் பவுண்டரி அடித்து பெஷாவர் அணியின் வரலாற்று வெற்றியை உறுதி செய்தார்.
இறுதிப் போட்டியின் ஆட்டநாயகனாக ஆரோன் ஹார்டி தெரிவாகியதுடன், தொடர் நாயகன் விருதை அதே அணியின் சுப்யான் மொகிம் பெற்றுக்கொண்டார்.
>>மேலும் கிரிக்கெட் செய்திகளைப் படிக்க<<
