நியூசிலாந்து கிரிக்கெட் அணியின் நட்சத்திர வீரர் கேன் வில்லியம்சன் சர்வதேச கிரிக்கெட்டின் அனைத்து வடிவங்களிலிருந்தும் உடனடியாக ஓய்வு பெறுவதாக அதிரடியாக அறிவித்துள்ளார்.
இங்கிலாந்துக்கு எதிரான மூன்று போட்டிகள் கொண்ட டெஸ்ட் தொடர் பாதியிலேயே நடந்து கொண்டிருக்கும் வேளையில் இவரது இந்த முடிவு வெளியாகியுள்ளது. இதன் மூலம் கடந்த 2010 ஆம் ஆண்டு தொடங்கிய அவரது 16 ஆண்டுகால சர்வதேச கிரிக்கெட் பயணம் முடிவுக்கு வந்துள்ளது.
35 வயதான வில்லியம்சன், லோர்ட்ஸ் மைதானத்தில் நடைபெற்ற இங்கிலாந்துக்கு எதிரான முதல் டெஸ்ட் போட்டியில் 0 மற்றும் 18 ஓட்டங்கள் மட்டுமே எடுத்து ஆட்டமிழந்தார். இப்போட்டியில் நியூசிலாந்து அணி தோல்வியடைந்தது.
இந்நிலையில், ஓவல் மற்றும் ட்ரெண்ட் பிரிட்ஜ் ஆகிய மைதானங்களில் நடைபெறவுள்ள அடுத்த இரண்டு டெஸ்ட் போட்டிகளில் விளையாடப்போவதில்லை என அவர் முடிவு செய்துள்ளார். கடந்த 2024 ஜூன் மாதம் முதல் அவர் நியூசிலாந்து கிரிக்கெட் சபையின் வீரர்களுக்கான மத்திய ஒப்பந்தத்தில் இடம்பெறவில்லை என்பது குறிப்பிடத்தக்கது. தனது கிரிக்கெட் வாழ்க்கையின் இறுதி காலப்பகுதியில் டி20 லீக் போட்டிகளில் கவனம் செலுத்துவதற்காக, தேர்ந்தெடுக்கப்பட்ட சர்வதேச தொடர்களில் மட்டுமே அவர் விளையாடி வந்தமை குறிப்பிடத்தக்கது.
- கிரிக்கெட்டிலிருந்து ஓய்வை அறிவித்த நியூசிலாந்து சகலதுறை வீரர்
- அவிஷ்கவின் அதிரடி சதத்துடன் இலங்கை A அணிக்கு இலகு வெற்றி
- மகளிர் T20 உலகக் கிண்ண முதல் போட்டியில் இலங்கை தோல்வி
இந்நிலையில், தனது ஓய்வு குறித்து நியூசிலாந்து கிரிக்கெட் சபை வெளியிட்ட அறிக்கையில் வில்லியம்சன் கூறியிருப்பதாவது, ‘இதைப்பற்றி நான் சில காலமாகவே சிந்தித்து வந்தேன். ஆனால், கடந்த சில நாட்களாகவே இதுதான் சரியான நேரம் என்பது எனக்குத் தெளிவாகப் புரிந்துவிட்டது. சர்வதேச கிரிக்கெட்டின் மீது எனக்கு எப்போதும் ஒரு தீராத பசியும் விருப்பமும் இருந்தது. நியூசிலாந்துக்காக நான் விளையாடிய ஒவ்வொரு போட்டியிலும் எனது நூறு சதவீத உழைப்பைக் கொடுத்துள்ளேன் என்பதில் பெருமகிழ்ச்சி அடைகிறேன். முழுமையான அர்ப்பணிப்பு இல்லாமல் தொடர்ந்து விளையாடுவது சரியாக இருக்காது. எனது சொந்த விருப்பத்தின் பேரில், கண்ணியமாக விடைபெறுவதை பாக்கியமாகக் கருதுகிறேன்.’
மேலும் பேசிய அவர்,‘தற்போதுள்ள இளம் நியூசிலாந்து அணி திறமையான பாதையை நோக்கிச் செல்வதை எண்ணி நம்பிக்கையுடன் விடைபெறுகிறேன். இந்த அணியில் அசாத்திய திறமைகளும், சாதிக்கும் வெறியும் கொண்ட வீரர்கள் உள்ளனர். நான் மனதார நேசிக்கும் இந்த அணியில் இவ்வளவு காலம் ஒரு அங்கமாக இருந்ததற்கு நன்றிக்கடன்பட்டவனாவேன். நியூசிலாந்து அணி எப்போதும் எனது இதயத்திற்கு நெருக்கமாக இருக்கும்.‘ என்று உருக்கமாகத் தெரிவித்தார்.
நியூசிலாந்து டெஸ்ட் கிரிக்கெட் வரலாற்றில் அதிக ஓட்டங்கள் குவித்த வீரர் என்ற சாதனையை வில்லியம்சன் தன்வசம் வைத்துள்ளார். அவர் 110 டெஸ்ட் போட்டிகளில் விளையாடி 54.06 சராசரியுடன் 9515 ஓட்டங்களைக் குவித்துள்ளார். இவரது கிரிக்கெட் வாழ்க்கையின் உச்சக்கட்டமாக, 2021 ஆம் ஆண்டு நடைபெற்ற முதலாவது ஐசிசி உலக டெஸ்ட் சம்பியன்ஷிப் இறுதிப்போட்டியில் இந்தியாவை வீழ்த்தி நியூசிலாந்து அணிக்கு சம்பியன் பட்டத்தை வென்று கொடுப்பதில் முக்கிய பங்கு வகித்தார்.
இது தவிர, 175 ஒருநாள் போட்டிகளில் 7256 ஓட்;டங்களையும் (நியூசிலாந்தின் 4வது அதிகபட்ச ஓட்டங்கள்), 93 டி20 போட்டிகளில் 2575 ஓட்டங்களையும் (நியூசிலாந்தின் 2வது அதிகபட்ச ஓட்டங்கள்) குவித்துள்ளார்.
வில்லியம்சன் நியூசிலாந்து அணியை 40 டெஸ்ட் போட்டிகள் (22 வெற்றி, 10 தோல்வி, 8 டிரா), 91 ஒருநாள் போட்டிகள் (46 வெற்றி, 40 தோல்வி) மற்றும் 75 டி20 போட்டிகளில் (39 வெற்றி, 34 தோல்வி) வழிநடத்தியுள்ளார்.
இவரது தலைமையின் கீழ் நியூசிலாந்து அணி 2016 டி20 உலகக் கிண்ணம் (அரைஇறுதி), 2019 ஒருநாள் உலகக் கிண்ணம் (இறுதிப்போட்டி), 2021 உலக டெஸ்ட் சம்பியன்ஷிப் (சம்பியன்), 2021 டி20 உலகக் கிண்ணம் (இறுதிப்போட்டி), 2022: டி20 உலகக் கிண்ணம் (அரைஇறுதி) மற்றும் 2023 ஒருநாள் உலகக் கிண்ணம் (அரைஇறுதி) ஆகிய ஐசிசி இன் முக்கிய தொடர்களில் நியூசிலாந்து அணி உச்சத்தை தொட்டது.
இதனிடையே, கேன் வில்லியம்சன் கடந்த ஆண்டு ஒக்டோபர் மாதம் ஐபிஎல் தொடரின் லக்னோ சுப்பர் ஜெயண்ட்ஸ் அணியின் மூலோபாய ஆலோசகராகப் பொறுப்பேற்றதன் மூலம், தனது அடுத்தகட்ட பயணத்தைத் தொடங்கிவிட்டார். கடந்த நவம்பர் மாதமே சர்வதேச டி20 போட்டிகளிலிருந்து ஓய்வை அறிவித்திருந்த வில்லியம்சன், தற்போது அனைத்து வடிவ சர்வதேச கிரிக்கெட்டிலிருந்தும் முழுமையாக விடைபெற்றுள்ளார்.
>>மேலும் கிரிக்கெட் செய்திகளைப் படிக்க<<
