தனன்ஞய டி சில்வா மற்றும் குசல் மெண்டிஸ் ஆகியோரின் அபார சதங்களின் உதவியோடு பாகிஸ்தானுக்கு எதிரான முதல் டெஸ்ட் போட்டியின் மூன்றாம் நாள் ஆட்டத்தை இலங்கை அணி முழுமையாகத் தனது கட்டுப்பாட்டுக்குள் கொண்டுவந்துள்ளது.
>>முதல் டெஸ்ட் போட்டியில் தொடர்ந்தும் ஆதிக்கம் செலுத்தும் பாகிஸ்தான்
ராவல்பிண்டி கிரிக்கெட் மைதானத்தில் நடைபெற்று வரும் இந்த டெஸ்ட் போட்டியின் இரண்டாம் நாள் ஆட்டம் நேற்று (10) நிறைவுக்கு வரும் போது, பாகிஸ்தானின் முதல் இன்னிங்ஸின் (434/9) பின்னர் தனது முதல் இன்னிங்ஸை இலங்கை அணி ஆரம்பித்து 114 ஓட்டங்களுக்கு 3 விக்கெட்டுக்களை இழந்து காணப்பட்டது. களத்தில் ஆட்டமிழக்காதிருந்த கமிந்து மெண்டிஸ் 40 ஓட்டங்களையும், தனஞ்சய டி சில்வா 22 ஓட்டங்களையும் பெற்றிருந்தனர்.
இன்று பாகிஸ்தானை விட 320 ஓட்டங்கள் பின்தங்கிய நிலையில் முதல் இன்னிங்ஸ் துடுப்பாட்டத்தினை தொடர்ந்த இலங்கை அணி முதல் விக்கெட்டாக கமிந்து மெண்டிஸை பறிகொடுத்தது. மொஹமட் அப்பாஸின் பந்தில் ஆட்டமிழந்த கமிந்து மெண்டிஸ் 58 ஓட்டங்கள் எடுத்தார். அத்துடன் அவர் நான்காம் விக்கெட் இணைப்பாட்டமாக 90 ஓட்டங்களையும் பகிர்ந்தார்.
எனினும், இது மாத்திரமே இன்றைய நாளில் பாகிஸ்தான் பந்துவீச்சாளர்களுக்குக் கிடைத்த இறுதி விக்கெட்டாக அமைந்தது. இலங்கை அணியின் ஐந்தாம் விக்கெட்டுக்கு ஜோடி சேர்ந்த தனஞ்சய டி சில்வா மற்றும் குசல் மெண்டிஸ் இருவரும் பாகிஸ்தானின் பந்து வீச்சாளர்களை மிக நேர்த்தியாக எதிர்கொண்டு ஓட்டங்களைக் குவித்தனர்.
பொறுப்புணர்வுடன் துடுப்பெடுத்தாடிய தனஞ்சய டி சில்வா சதம் விளாச மற்றைய முனையில் குசல் மெண்டிஸ் உம் சதமடித்தார். இதில் தனஞ்சய 14ஆவது டெஸ்ட் சதத்தினையும், குசல் மெண்டிஸ் 11ஆவது டெஸ்ட் சதத்தினையும் பூர்த்தி செய்தமை குறிப்பிடத்தக்கது. மெண்டிஸ் டெஸ்ட் தலைவராக களமிறங்கிய முதல் போட்டியில் சதம் பெற்ற வீரராகவும் மாறினார்.
இரண்டு வீரர்களினது அபார ஆட்டத்துடன் இலங்கை அணி பாகிஸ்தானின் முதல் இன்னிங்ஸ் ஓட்டங்களை நெருங்கியதோடு இரு வீரர்களும், போட்டியின் மூன்றாம் நாள் ஆட்டம் வெளிச்சமின்மை காரணமாக நிறுத்தப்படும் போது 249 ஓட்டங்களையும் இணைப்பாட்டமாக பகிர்ந்தனர்.
இந்த வலுவான இணைப்பாட்டத்துடன் மூன்றாம் நாள் நிறைவில் இலங்கை அணி 102 ஓவர்களுக்கு 4 விக்கெட்டுகளை மாத்திரம் இழந்து 404 ஓட்டங்களைக் குவித்துள்ளது.
இலங்கை அணியின் துடுப்பாட்டத்தில் தனஞ்சய டி சில்வா 17 பௌண்டரிகள் அடங்கலாக 241 பந்துகளில் ஆட்டமிழக்காமல் 167 ஓட்டங்களைப் பெற்றுள்ளார். மறுமுனையில் அதிரடி காட்டிய குசல் மெண்டிஸ், 9 பௌண்டரிகள் மற்றும் 3 சிக்ஸர்களுடன் 188 பந்துகளில் ஆட்டமிழக்காமல் 117 ஓட்டங்கள் எடுத்துள்ளார். தற்போது இலங்கை பாகிஸ்தானை விட 30 ஓட்டங்கள் மாத்திரமே குறைவாக காணப்படுகின்றது.
