2026ஆம் ஆண்டுக்கான தெற்காசிய கால்பந்து சம்மேளன (SAFF) சம்பியன்ஷிப் தொடரில், குழு A இற்கான தமது இறுதி லீக் போட்டியில் பங்களாதேஷ் அணியை எதிர்கொண்ட இலங்கை அணி 4-0 என்ற கோல் கணக்கில் தோல்வியடைந்ததுடன், அரையிறுதி வாய்ப்பையும் இழந்து தொடரிலிருந்து வெளியேறியுள்ளது.
பங்களாதேஷின் டாக்கா தேசிய விளையாட்டரங்கில் இன்று (11) இடம்பெற்ற இந்தப் போட்டியில், அரையிறுதிக்கு முன்னேற குறைந்தது சமநிலை முடிவொன்று தேவை என்ற நிலையிலேயே இலங்கை அணி களமிறங்கியது. எனினும், போட்டித் தொடரை நடத்தும் பங்களாதேஷ் அணி ஆரம்பம் முதலே ஆதிக்கம் செலுத்தியது. போட்டியின் 9ஆவது நிமிடத்தில் பங்களாதேஷ் அணியின் தலைவர் ஹம்ஸா சௌத்ரி உள்ளனுப்பிய பந்தை இலங்கை கோல் காப்பாளர் சுஜான் பெரேராவினால் முறையாக வெளியேற்ற முடியாமல் போக, அந்தப் பந்தைப் பெற்ற ஷமித் ஷோம் தனது இரண்டாவது முயற்சியில் அதனை வலைக்குள் செலுத்தி பங்களாதேஷ் அணிக்கு முன்னிலையைப் பெற்றுக் கொடுத்தார்.
தொடர்ந்தும் வலது பக்கத்தினூடாக ராகிப் ஹொசைன் இலங்கை பின்களத்திற்கு அழுத்தம் கொடுக்க, பங்களாதேஷ் அணி பல கோல் வாய்ப்புகளை உருவாக்கியது. மறுமுனையில் இலங்கை அணிக்கும் சில வாய்ப்புகள் கிடைத்த போதும், அவற்றைக் கோலாக மாற்ற முடியவில்லை. இந்த நிலையில், முதல் பாதி நிறைவடையவிருந்த வேளையில் (45ஆவது நிமிடம்) மொஹமட் இப்ராஹிம் வழங்கிய பந்துப் பரிமாற்றத்தைப் பெற்ற ஹம்ஸா சௌத்ரி, இலங்கை பின்கள வீரர் ஒருவரைக் கடந்து சென்று பந்தை வலைக்குள் செலுத்தினார். பங்களாதேஷ் அணியின் தலைவராகத் தனது முதல் போட்டியில் விளையாடிய ஹம்ஸா பெற்ற இந்தக் கோலின் மூலம், இடைவேளையின் போது அவ்வணி 2-0 என முன்னிலை பெற்றிருந்தது.
முதல் பாதி: இலங்கை 0 – 2 பங்களாதேஷ்
இரண்டாம் பாதியிலும் பங்களாதேஷ் அணியின் ஆதிக்கமே தொடர்ந்தது. இரண்டாம் பாதி ஆரம்பமாகி ஏழு நிமிடங்களில் (52ஆவது நிமிடம்), தனி ஒருவராகப் பந்தை எடுத்துச் சென்ற பர்ஹான் அலி வஹீத் இலங்கை பின்கள வீரர்கள் மூவரைக் கடந்து அபாரமான கோலொன்றைப் பெற, பங்களாதேஷ் அணியின் முன்னிலை 3-0 என அதிகரித்தது.
அதன் பின்னரும் போட்டியின் கட்டுப்பாட்டைத் தம்வசம் வைத்திருந்த பங்களாதேஷ் அணி, 87ஆவது நிமிடத்தில் ராகிப் ஹொசைன் பெற்ற சிறப்பான கோலின் மூலம் தமது கோல் எண்ணிக்கையை நான்காக உயர்த்தியது. எஞ்சிய நிமிடங்களில் இலங்கை அணியால் ஆறுதல் கோலொன்றையேனும் பெற முடியாமல் போக, பங்களாதேஷ் அணி 4-0 என்ற கோல் கணக்கில் வெற்றியைத் தமதாக்கியது.
முழு நேரம்: இலங்கை 0 – 4 பங்களாதேஷ்
ஏற்கனவே அரையிறுதி வாய்ப்பை உறுதி செய்திருந்த பங்களாதேஷ் அணி, தாம் விளையாடிய இரண்டு லீக் போட்டிகளிலும் வெற்றி பெற்று 6 புள்ளிகளுடன் குழு A இல் முதலிடத்தைப் பிடித்துள்ளது. இதேவேளை, பூட்டான் அணியுடனான முதல் போட்டியை 2-2 என சமநிலையில் முடித்திருந்த இலங்கை அணி, ஒரு புள்ளியுடன் தொடரிலிருந்து வெளியேறியுள்ளது. இலங்கையைப் போன்றே ஒரு புள்ளியைப் பெற்றிருந்த பூட்டான் அணி, கோல் வித்தியாசத்தின் அடிப்படையில் குழுவில் இரண்டாம் இடத்தைப் பெற்று அரையிறுதிக்குத் தெரிவாகியுள்ளது.
எதிர்வரும் 14ஆம் திகதி இடம்பெறவுள்ள அரையிறுதிப் போட்டிகளில் பங்களாதேஷ் அணி பாகிஸ்தானையும், பூட்டான் அணி நடப்புச் சம்பியன் இந்தியாவையும் எதிர்கொள்ளவுள்ளமை குறிப்பிடத்தக்கது.
கோல்கள் விபரம்
பங்களாதேஷ்
ஷமித் ஷோம் 9’, ஹம்ஸா சௌத்ரி 45’, பர்ஹான் அலி வஹீத் 52’ & ராகிப் ஹொசைன் 87’
 சம்பியன்ஷிப் தொடரில், குழு A இற்கான தமது இறுதி லீக் போட்டியில் பங்களாதேஷ் அணியை எதிர்கொண்ட இலங்கை அணி 4-0 என்ற கோல் கணக்கில் தோல்வியடைந்ததுடன், அரையிறுதி வாய்ப்பையும் இழந்து தொடரிலிருந்து வெளியேறியுள்ளது.){kind=link}