ஜமைக்காவை வீழ்த்தி முதல் தடவையாக கரீபியன் பிரீமியர் லீக் சம்பியனாகியது அன்டிகுவா

கரீபியன் பிரீமியர் லீக் (CPL 2026) தொடரின் பரபரப்பான இறுதிப்போட்டியில், தொடரில் அறிமுக அணியாகக் களமிறங்கிய ஜமைக்கா கிங்ஸ்மென் அணியை 8 விக்கெட்டுகள் வித்தியாசத்தில் வீழ்த்தி, அன்டிகுவா அண்ட் பார்புடா பால்கன்ஸ் அணி தனது கன்னிச் சம்பியன் பட்டத்தை வென்று வரலாற்றுச் சாதனை படைத்துள்ளது.

பார்படோஸின் பிரிட்ஜ்டவுனில் உள்ள புகழ்பெற்ற கென்சிங்டன் ஓவல் மைதானத்தில் நேற்று (20) நடைபெற்ற இறுதிப்போட்டியில், நாணய சுழற்சியில் வென்ற அன்டிகுவா பால்கன்ஸ் அணி முதலில் பந்துவீச்சைத் தேர்வு செய்தது.

இதன்படி, முதலில் துடுப்பெடுத்தாடிய ஜமைக்கா கிங்ஸ்மென் அணிக்கு ஆரம்ப துடுப்பாட்ட வீரர் மாஸ் சதகத் அபாரமான ஆட்டத்தை வெளிப்படுத்தினார். 58 பந்துகளில் 8 பவுண்டரிகள் மற்றும் 9 சிக்ஸர்களுடன் 114 ஓட்டங்கள் குவித்து அணிக்கு வலுவான அடித்தளம் அமைத்துக் கொடுத்தார். இதனால் 10 ஓவர்கள் முடிவில் ஜமைக்கா அணி 100ஃ2 என்ற வலுவான நிலையில் இருந்தது.

ஆனால், போட்டிக்குத் திருப்புமுனையாக அமைந்தது அன்டிகுவா பால்கன்ஸ் சுழல்பந்து வீச்சாளர் சுஃப்பியான் முகீமின் அற்புதமான பந்துவீச்சுதான். 12ஆவது ஓவரில் சாய்ம் அய்யூப் (29) மற்றும் ரோவ்மன் பவெல் (0) ஆகிய இரு முக்கிய விக்கெட்டுகளைக் கைப்பற்றி ஜமைக்கா அணியின் சரிவை ஆரம்பித்து வைத்தார்.

தொடர்ந்து அபாரமாகப் பந்துவீசிய முகீம், தனது 4 ஓவர்களில் வெறும் 14 ஓட்டங்களை மட்டுமே விட்டுக்கொடுத்து 4 விக்கெட்டுகளைச் சாய்த்தார். இதனால் 110/2 என்ற நிலையில் இருந்த ஜமைக்கா அணி, அடுத்தடுத்து விக்கெட்டுகளை இழந்து 20 ஓவர்கள் முடிவில் 9 விக்கெட்டுகள் இழப்பிற்கு 170 ஓட்டங்களுக்குக் கட்டுப்படுத்தப்பட்டது. அன்டிகுவா தரப்பில் அல்ஸாரி ஜோசப் 2 விக்கெட்களை வீழ்த்தினார்.

>>சமரியின் அதிரடியால் இறுதிப்போட்டிக்கு முன்னேறியது இலங்கை மகளிர் அணி

171 ஓட்டங்கள் என்ற வெற்றியிலக்குடன் களமிறங்கிய அன்டிகுவா அண்ட் பார்புடா பால்கன்ஸ் அணிக்கு ரகீம் கார்ன்வால் (6 பந்துகளில் 20 ஓட்டங்கள்) அதிரடி ஆரம்பத்தை அமைத்துக் கொடுத்தார். தொடர்ந்து இணைந்த எவின் லூயிஸ் (38) மற்றும் விக்கெட் காப்பாளர் ஆமீர் ஜாங்கு ஜோடி 2ஆவது விக்கெட்டுக்கு 64 ஓட்டங்கள் சேர்த்தது.

லூயிஸ் ஆட்டமிழந்த போதிலும், அடுத்து வந்த ஹசன் நவாஸுடன் இணைந்த ஆமீர் ஜாங்கு அணியை வெற்றிப் பாதைக்கு அழைத்துச் சென்றார். பிரிக்கப்படாத 3ஆவது விக்கெட் இணைப்பாட்டமாக இருவரும் 89 ஓட்டங்களை எடுத்து, இன்னும் 20 பந்துகள் எஞ்சியிருந்த நிலையிலேயே (16.4 ஓவர்களில்) இலக்கை எட்டச் செய்தனர். ஆமீர் ஜாங்கு 34 பந்துகளில் 57 ஓட்டங்களுடனும், ஹசன் நவாஸ் 35 பந்துகளில் 47 ஓட்டங்களுடனும் ஆட்டமிழக்காமல் களத்தில் இருந்தனர்.

இதன்படி, தனது 3ஆவது கரீபியன் பிரீமியர் தொடரிலேயே அன்டிகுவா அண்ட் பார்புடா பால்கன்ஸ் அணி சம்பியன் பட்டத்தைத் முத்தமிட்டுள்ளமை குறிப்பிடத்தக்கது. தொடர் முழுவதும் சிறப்பான ஆட்டத்தை வெளிப்படுத்திய சதாப் கான் தொடர் நாயகன் விருதை வென்றார்.

>>மேலும் கிரிக்கெட் செய்திகளைப் படிக்க<<