செனகலின் டாக்கர் நகரில் நடைபெற்று வரும் 4ஆவது இளையோர் ஒலிம்பிக் விழாவில் இலங்கைக்கான முதல் பதக்கத்தை வென்று லஹிரு அச்சின்த வரலாற்று சாதனை படைத்தார்.
டாக்கர், இபா மார் டியொப் விளையாட்டரங்கில் நேற்று (09) நடைபெற்ற ஆண்களுக்கான 1500 மீற்றர் ஓட்டப் போட்டியில் பங்குகொண்ட லஹிரு அச்சின்த, 3 நிமிடங்கள், 59.08 செக்கன்களில் போட்டியை நிறைவு செய்து வெள்ளிப் பதக்கத்தை வென்றெடுத்தார்.
இளையோர் ஒலிம்பிக் விழாவில் இலங்கை வெள்ளிப் பதக்கமொன்றை வென்ற முதல் சந்தர்ப்பம் இதுவாகும். அதேபோல, இளையோர் ஒலிம்பிக்கில் இலங்கை வென்ற 2ஆவது பதக்கமாகவும் இது இடம்பிடித்தது.
முன்னதாக 2018ஆம் ஆண்டு அர்ஜென்டினாவின் புவனெஸ் அயர்ஸ் நகரில் நடைபெற்ற இளையோர் ஒலிம்பிக் விளையாட்டு விழாவில் பெண்களுக்கான 2000 மீற்றர் தடை தாண்டல் ஓட்டப் போட்டியில் பாரமி வசந்தி மாரிஸ்டெல்லா வெண்கலப் பதக்கம் வென்றமை குறிப்பிடத்தக்கது.
ஆசிய விளையாட்டு விழாவில் தங்கம் வென்று சாதனை படைத்தார் ருமேஷ் தரங்க
இதனிடையே, லஹிரு அச்சின்த பங்குகொண்ட போட்டியில் எதியோப்பிய வீரர் வொபி செப்லெகா (3:58.73 தங்கப் பதக்கத்தையும் ஸ்பெய்ன் வீரர் அலெக்ஸ் சங்கில் (3:58.70) வெண்கலப் பதக்கத்தையும் வென்றெடுத்தனர்.
இதேவேளை, லஹிரு அச்சின்த வென்றெடுத்த வெள்ளிப் பதக்கத்தின் மூலம், இம்முறை பதக்கப் பட்டியலில் இலங்கை 60ஆவது இடத்தைப் பிடித்துள்ளமை மற்றுமொரு சிறப்பம்சமாகும்.
இரத்தினபுரி, புனித அலோசியஸ் கல்லூரியைச் சேர்ந்த 17 வயதான லஹிரு அச்சின்த, கடந்த ஆண்டு பஹ்ரைனில் நடைபெற்ற ஆசிய இளையோர் விளையாட்டு விழாவில் ஆண்களுக்கான 1500 மீற்றர் ஓட்டப் போட்டியில் தங்கப் பதக்கம் வென்று சாதனை படைத்தார்.
இது இவ்வாறிருக்க, செனகலின் டாக்கர் நகரில் நடைபெற்று வரும் 4ஆவது இளையோர் ஒலிம்பிக் விழாவில் இலங்கையிலிருந்து ஐந்து வீரர்கள் பங்குபற்றியுள்ளமை குறிப்பிடத்தக்கது.
