ஜூன் 12ஆம் திகதி இங்கிலாந்தில் ஆரம்பமாகும் மகளிர் T20 உலகக் கிண்ணத் தொடருக்கான 15 பேர் கொண்ட இலங்கை குழாம் வெளியிடப்பட்டுள்ளது.
அனுபவம் கொண்ட சாமரி அத்தபத்து தலைமையிலான இலங்கை குழாத்தில் முன்வரிசை துடுப்பாட்டவீராங்கனை விஷ்மி குணரத்ன, ஹர்சிதா சமரவிக்ரம மற்றும் வேகப்பந்துவீச்சாளர் காவ்யா காவிந்தி ஆகியோர் இணைக்கப்பட்டுள்ளனர்.
சாமரி அத்தபத்து இலங்கை மகளிர் அணிக்காக தனது 10ஆவது T20 உலகக் கிண்ணத் தொடரில் இம்முறை ஆடவிருப்பது குறிப்பிடத்தக்க விடயமாகும்.
அதேநேரம் இறுதியாக பங்களாதேஷ் மகளிர் அணிக்கு எதிரான தொடரில் விளையாடியிருந்த ரஷ்மிக்கா செவ்வந்தி, தேவ்மி விஹங்கா மற்றும் இனோக்கா ரணவீர ஆகியோருக்கு T20 உலகக் கிண்ண அணியில் வாய்ப்பு வழங்கப்படவில்லை.
எனினும் இரண்டு கைகளாலும் பந்துவீசக்கூடிய மணிக்கட்டு சுழல்வீராங்கனையான 17 சஷினி கிம்ஹானிக்கு வாய்ப்பு வழங்கப்பட்டிருக்கின்றது. 15 வயதில் இலங்கை மகளிர் அணிக்கு அறிமுகமாகிய கிம்ஹானி இதுவரை 7 T20I போட்டிகளில் விளையாடியிருக்கின்றமை குறிப்பிடத்தக்கது.
ஜூன் 3ஆம் திகதி இங்கிலாந்துச் செல்லும் இலங்கை மகளிர் அணியானது குழு 2 இல் இங்கிலாந்து, நியூசிலாந்து, மேற்கிந்திய தீவுகள், அயர்லாந்து மற்றும் ஸ்கொட்லாந்து ஆகிய அணிகளுடன் இடம் பிடித்துள்ளது. இலங்கை ஜூன் 12ஆம் திகதி எட்ஜ்பாஸ்டனில் இங்கிலாந்துக்கு எதிரான முதல் போட்டியில் ஆடுகின்றது. இதனைத் தொடர்ந்து சௌத்தம்ப்டனில் நியூசிலாந்துடனும் (ஜூன் 16), பிரிஸ்டல் நகரில் மேற்கிந்திய தீவுகள் (ஜூன் 21) மற்றும் அயர்லாந்துடனும் (ஜூன் 23), மன்செஸ்டரில் ஸ்கொட்லாந்துடனும் (ஜூன் 26) மோதவிருக்கின்றமை குறிப்பிடத்தக்கது.
இலங்கை குழாம்:
சாமரி அத்தபத்து (அணித்தலைவி), ஹாசினி பெரேரா, விஷ்மி குணரட்ன, ஹர்ஷிதா சமரவிக்ரம, இமேஷா துலானி, நிலக்ஷிகா சில்வா, கவிஷா டில்ஹாரி, ஹன்சிமா கருணாரட்ன, கௌஷனி நுத்யாங்கனா, சுகந்திகா தஸநாயக்க, நிமாஷா மதுஷானி, சஷினி கிம்ஹானி, காவ்யா கவிந்தி, மல்கி மதாரா, மித்தாலி அயோத்யா
>>மேலும் கிரிக்கெட் செய்திகளைப் படிக்க<<
