சுற்றுலா இலங்கை மற்றும் பங்களாதேஷ் அணிகள் இடையிலான இரண்டாவது டெஸ்ட் போட்டியின் முதல் நாள் ஆட்ட நிறைவில் இலங்கை அணியானது குசல் மெண்டிஸ், நிஷான் மதுஷ்க மற்றும் திமுத் கருணாரட்ன ஆகியோரது அரைச்சதங்களோடு வலுப் பெற்றிருக்கின்றது.
இலங்கை – பங்களாதேஷ் அணிகள் இடையிலான இரண்டாவது டெஸ்ட் போட்டியானது முன்னதாக சட்டோக்ரமில் ஆரம்பமாகியது. போட்டியின் நாணய சுழற்சியில் வென்ற இலங்கை அணியின் தலைவர் தனன்ஞய டி சில்வா முதலில் துடுப்பாட்டத்தினை தெரிவு செய்தார்.
இரண்டு போட்டிகள் கொண்ட டெஸ்ட் தொடரில் இலங்கை 1-0 என ஏற்கனவே முன்னிலை பெற்றிருக்க இலங்கை இப்போட்டியில் ஒரு மாற்றத்துடன் களமிறங்கியிருந்தது. அதன்படி உபாதைக்குள்ளான கசுன் ராஜிதவிற்குப் பதிலாக அசித பெர்னாண்டோ இலங்கை குழாத்தில் உள்வாங்கப்பட்டிருந்தார்.
தொடர்ந்து நாணய சுழற்சிக்கு அமைய துடுப்பாட்டத்தினை ஆரம்பம் செய்த இலங்கை அணிக்கு நிஷான் மதுஷ்க மற்றும் திமுத் கருணாரட்ன ஆகியோர் சிறந்த ஆரம்பத்தினை வழங்கியிருந்தனர். இந்த வீரர்களும் முதல் விக்கெட் இணைப்பாட்டமாக 96 ஓட்டங்களை பகிர்ந்த நிலையில் நிஷான் மதுஷ்க 57 ஓட்டங்களுடன் ஆட்டமிழந்தார். இது அவரின் இரண்டாவது அரைச்சதமாகவும் மாறியது.
அதன் பின்னர் முதல் நாள் மதிய போசணம் வரை திமுத் கருணாரட்ன தன்னுடைய 37ஆவது அரைச்சதத்தோடு இலங்கைத் தரப்பினை பலப்படுத்திய நிலையில் தனது விக்கெட்டினைப் பறிகொடுத்தார். திமுத் கருணாரட்ன ஒரு சிக்ஸர் மற்றும் 8 பௌண்டரிகள் அடங்கலாக 86 ஓட்டங்கள் எடுத்தார்.
தொடர்ந்த ஆட்டத்தில் இலங்கை அணிக்கு குசல் மெண்டிஸ் பெறுமதி சேர்த்தார். பொறுப்பாக ஆடிய அவர் தன்னுடைய 18ஆவது டெஸ்ட் அரைச்சதத்தோடு சதத்தினை நோக்கி முன்னேறிய நிலையில் ஆட்டமிழந்தார்.
குசல் மெண்டிஸ் ஆட்டமிழக்கும் போது ஒரு சிக்ஸர் மற்றும் 11 பௌண்டரிகள் அடங்கலாக 93 ஓட்டங்கள் பெற்றிருந்தார். இந்த மூன்று வீரர்களது ஆட்டத்தோடும் இலங்கை அணியானது முதல் நாள் ஆட்டநிறைவில் முதல் இன்னிங்ஸில் 90 ஓவர்களுக்கு 4 விக்கெட்டுக்களை இழந்து 314 ஓட்டங்களை பெற்று காணப்படுகின்றது.
களத்தில் ஆட்டமிழக்காது காணப்படும் தினேஷ் சந்திமால் 34 ஓட்டங்களோடும், தனன்ஞய டி சில்வா 15 ஓட்டங்களுடனும் காணப்பட்டிருந்தனர். பங்களாதேஷ் பந்துவீச்சில் ஹசன் மஹ்மூட் 64 ஓட்டங்களுக்கு 2 விக்கெட்டுக்களை சுருட்டியிருந்தமை குறிப்பிடத்தக்கது.