වැරදුනේ කොතනද?

52

කොළඹ ඉසිපතන විද්‍යාලය යනු ‘ශ්‍රී ලංකාවට වැඩියෙන්ම රග්බි ක්‍රීඩකයින් නිපදවූ පාසල’ යයි පැවසීම වරදක් නොවේ. ක්‍රීඩා සමාජ මට්ටමින් පමණක් නොව ජාතික මට්ටමටද ක්‍රීඩකයින් බිහිකළ මෙම පාසලේ නම කනවැකුණු පමණින් “ඉසිපතනේ ද? රගර් ගැහුවද?” යනුවෙන් ප්‍රශ්න කරන අයවලුන්ගෙන් නම් අඩුවක් නැත. 

“ඉසිපතනය” නම් රග්බි බලකොටුවේ ඇත්තම කතාව

1960 වසරේදී කොළඹ ග්‍රීන්ලන්ඩ්ස් විදුහලේ ඉගෙන ගන්නා පොඩි ළමයෙක්….

වර්ෂ 1952 දී ආරම්භ වූ මෙම පාසල, වටපිටාවේ තිබූ හරිත වර්ණය නිසාම “Greenlands College” යනුවෙන් නම් කෙරුණි. පසුව 1961 වර්ෂය වනවිට සිදුවූ සංස්කෘතික පෙරළියත් සමඟ ග්‍රීන්ලන්ඩ්ස් විද්‍යාලය “කොළඹ ඉසිපතන විද්‍යාලය” යනුවෙන් නම් කෙරුණු අතර එහි ආදර්ශ පාඨය වූයේ පාලි භාෂාවෙන් “දළහං පගණත විරියං” යනුවෙනි. එනම් සිංහල භාෂාවෙන් “අදිටනින් වෙර වඩමු”, ඉංග්‍රීසි භාෂාවෙන් “Strive With Determination” යනුවෙනි.

වර්ෂ 1963 දී බ්‍රයන් ඉන්ග්‍රම් ගේ නායකත්වයෙන් සහ වයි. සී. චැන්ග් ගේ පුහුණුකාරීත්වය යටතේ ඉසිපතන විද්‍යාලය ක්‍රීඩා කළ ප්‍රථම රග්බි තරගය වූයේ කටුගස්තොට සාන්ත අන්තෝනි විද්‍යාලයට එරෙහි තරගය යි. එම තරගයේ දී ඉසිපතන විද්‍යාලය ලකුණු 08 – 03ක් වශයෙන් ජයගන්නේ ඒ වනවිටත් රග්බි ක්‍රීඩා කරන කණ්ඩායම් වලට අනතුරු අඟවමිනි. එතැන් සිට ඔවුන් කිසිවිටෙකත් පසු නොබසිමින් ඔවුන්ගේ ආධිපත්‍යය පවත්වා ගිය නිසාම “ශ්‍රී ලංකා පාසල් රග්බි ක්ෂේත්‍රයේ රජුන්” ලෙස ඔවුන්ට නම් පටබැඳුණි. 

රග්බි ක්‍රීඩාව යනු ජවසම්පන්න තරුණයින් රටට බිහිවන ස්ථානයකි. එවැනි ක්‍රීඩාවක ඉහළම තලයට නැගී ඒමට හැකිවුනු පාසලක් වූ ඉසිපතන විද්‍යාලය අද සිටින ස්ථානය ගැන විග්‍රහ කරන්නටයි මේ වෑයම.

ඉසිපතන විද්‍යාලය අතීතයේ පටන් රග්බි ක්‍රීඩාවෙන් ඉහළින්ම වැජඹුණු පාසලකි. ඒ පිළිබඳව කතා දෙකක් නැත. නමුත් 2013 වසරෙන් පසු ඉසිපතනය ප්‍රථම ස්ථාන 4න් පහතට ඇද වැටෙන්නේ 2019 වසරේ දීය. එයට හේතුව කුමක්ද

2019 වර්ෂය නම් ඉසිපතනයට රග්බි ක්‍රීඩාව අතින් ඉතා හොඳ වර්ෂයක් නොවීය. ලීග් තරගාවලිය හොඳින් ආරම්භ කළත් එය හොඳින් අවසන් කරන්නට ඉසිපතනයට නොහැකි විය. ලීග් තරගාවලියේ පළමු තරග 4 තුළ දීම ඉසිපතනය අපරාජිතව සිටි අතර පළමු වටයේ ඔවුන් පරාජය වූයේ සාන්ත ජෝසප් විද්‍යාලයට පමණි. ඒ ලකුණු 17 – 18ක් වශයෙනි. දෙවැනි වටය ඉසිපතනයට එතරම් සුබදායක වූයේ නැත. ඔවුන් දෙවැනි වටයේ ක්‍රීඩා කළ තරග 4න් තරග 3ක් පරාජය වූ අතර ඔවුන් එක් තරගයක් සාන්ත තෝමස් විද්‍යාලයට එරෙහිව ලකුණු 12 – 12ක් වශයෙන් සම කිරීමට සමත් විය. 

“ඉසිපතන ක්‍රීඩකයින් කවදාවත් විශාල දේහයක් තිබූ ක්‍රීඩකයින් නොවේ. ඔවුන්ගේ ශරීරයට වඩා ඔවුන්ගේ මානසික ශක්තිය ඉතා ඉහළයි” යනුවෙන් අපට පැවසුවේ ඉසිපතනයේ පුහුණුකරු නිහාල් “වයිපර්” ගුණරත්න මහතා. 

දේහයේ ප්‍රමාණයට වඩා ඔවුන් මේ ක්‍රීඩාව ගැන බලන කෝණය වෙනස්ය. ඉසිපතනය යනු ශ්‍රී ලංකාවට රග්බි ක්‍රීඩාව හඳුන්වා දුන් පාසල නොවුනත් දැනට වැඩියෙන්ම ශූරතාවයන් හොබවා ඇති පාසල යයි ඔවුන්ව නම් කරන්නට හැකිය. 

නමුත් මේ වසරේ ඔවුන් මෙතරම් පසුබෑමට හේතුව

මේ වසරේත් ප්‍රමාණයෙන් කුඩා ක්‍රීඩකයින් සිටියත් මෙවර ඉසිපතනයට ඊටත් වඩා විශාල ප්‍රශ්නයක් තිබෙන බවක් පෙනී යයි. ඉසිපතන කණ්ඩායමේ මනිල්ක රුබේරු, කිලාන් චමත්, ජනිත් සේරසිංහ, මනුල රත්නායක වැනි ජ්‍යෙෂ්ඨ ක්‍රීඩකයින් මතට කණ්ඩායමේ වැඩි බරක් යොමු වුනාද? එහෙමත් නැත්තම් ඉදිරිපෙළ – පසුපෙළ සුසංයෝගය හරි ගියේ නැතිද

2019 වසරේ ඉසිපතන පළමු පෙළ කණ්ඩායම ගැන බලන විට අපට මුලින්ම ඇස ගැටෙන්නේ පසුගිය වසරේ නායක මනිල්ක රුබේරු වෙතයි. ඔහු වචනයේ පරිසමාප්ත අර්ථයෙන්ම Center ක්‍රීඩකයෙකි. ඒ වගේම පසුගිය වසරේ (2018) ඉසිපතන විද්‍යාලයේ නායකයා ද වූ ඔහු මතට කණ්ඩායමේ බර වැඩියෙන් වැටුනාද යන්න ප්‍රශ්නයකි. තම 5 වැනි වසරටත් ඉසිපතන පළමුපෙල කණ්ඩායමේ ක්‍රීඩා කරන මනිල්ක රුබේරු ඉසිපතනයේ දැනට සිටින අත්දැකීම් බහුලම ක්‍රීඩකයාය.

ඉසිපතන තරගයක් බලන විට තරගයේ සෑම ස්ථානයකම දක්නට ලැබෙන ක්‍රීඩකයෙක් තමයි මේ මනිල්ක රුබේරු. Touch අවස්ථාවක, ප්‍රවර්තන අවස්ථාවක, එහෙමත් නැත්නම් Center ස්ථානයේ සිට ඉසිපතන පසුපෙළ හැසිරවීමට වගේම ඉසිපතන තරග සැලැස්ම දියත් කරන ක්‍රීඩකයා මනිල්ක යයි කිව්වොත් වඩාත් නිවැරදි ය. ඉසිපතනය වෙනුවෙන් මනිල්ක හුදෙකලා සටනක නිරත වෙමින් ජයගෙන දුන් තරග එමටය. එසේම මනිල්ක වැනි තවත් ක්‍රීඩකයෙකු නොමැති වීම නිසා ඉසිපතනයට තරග පරාජය වන්නටද සිදුවිය. 

කණ්ඩායමක් තමන්ගේ හොඳම ක්‍රීඩකයින්ගෙන් තරග සැලැස්ම දියත් කිරීමට යොදවා ගැනීම සාමාන්‍යය. නමුත් එක් ක්‍රීඩකයෙකු මතට විශාල බරක් පැටවීම මඟින් තරගය අවසානයේ කණ්ඩායමට අවශ්‍යම මොහොතේ දී ඔහුගේ සේවය ලබා ගත නොහැකි තත්වයක් උදාවිය හැක. 

මෙයට කදිම නිදසුන වන්නේ ඉසිපතන – සාන්ත ජෝසප් කණ්ඩායම් දෙක අතර තරගය යි. තරගය අවසන් මිනිත්තුවේ දී ලකුණු 17-18 වශයෙන් තිබිය දී ප්‍රතිවාදී ධවල රේඛාවට මීටර 5ක පමණ දුරක සිට “Wrong Tap” එනම් වැරදි ලෙස පන්දුව අතට ගැනීම වැනි පොඩි අතපසුවීමක් නිසා තරගය පරාජය විය. එසේම සාන්ත පීතර විද්‍යාලයට එරෙහි තරගයේ අවසන් මිනිත්තු කිහිපයේ දී ජ්‍යෙෂ්ඨ ක්‍රීඩකයින් සියලු දෙනාම පාහේ විඩාවට පත්ව සිටීම වැනි කරුණු නිසා මෙම කණ්ඩායමට ප්‍රසාද ලකුණු සටහනේ 6 වැනි ස්ථානයට ඇද වැටීමට සිදුවිය. 

ක්‍රීඩකයින් ආබාධයට පත්වීම

රේණුජ සිල්වා වැනි කණ්ඩායමේ අත්දැකීම් බහුලතම Fly Half ක්‍රීඩකයා දණහිසේ ACL ආබාධයක් නිසා දෙවන වටය ක්‍රීඩා නොකිරීම, විමේෂ් වර්ණපුර වැනි ජ්‍යෙෂ්ඨ ඉදිරිපෙළ Prop ක්‍රීඩකයා ආබාධයක් හේතුවෙන් කණ්ඩායමෙන් ඉවත්වීමට සිදුවීම සහ මනුල රත්නායක ගේ විටින් විට උත්සන්න වන වළලුකර ආබාධය වැනි හේතූන් නිසාද ඉසිපතනයට තමන්ගේ සුපුරුදු දස්කම් වලට පැමිණීමට නොහැකි විය. 

ක්‍රීඩකයින් ආබාධයට පත්වීම සහ එයට ක්‍රීඩකයින් ආදේශ කිරීම ගැන බලන විට දී Fly Half ක්‍රීඩකයෙකු වෙනුවෙන් ආදේශ කිරීමට කණ්ඩායම සතුව සිටින්නේ කිලාන් චමත් ය. නමුත් ඔහු කණ්ඩායමේ ප්‍රධාන Scrum Half ක්‍රීඩකයා ය. චමත් Fly Half ස්ථානයේ ක්‍රීඩා කරන විට Scrum Half ස්ථානයට ක්‍රීඩා කරන්නේ නවක ක්‍රීඩකයින් වන යොහාන් රත්නවීර, එහෙමත් නැත්තම් දිනිත් භාග්‍ය යි. 

එසේම Center ක්‍රීඩක මනුල රත්නායක වෙනුවෙන් ආදේශකයක් වූයේ රමිත හිමාෂ් ය. එය Wing ක්‍රීඩකයෙකු Center ස්ථානයේ ක්‍රීඩා කිරීමකි. රමිත වේගවත් වුවත් මනිල්කගේ ක්‍රීඩා විලාශයත් සමඟ ඔහුට ඔහුගේ දස්කම් පෑමට නොහැකි වන්නේ ඉසිපතනයේ අවසනාව ටය. 

ඉදිරිපෙළ තවත් ශක්තිමත් කළ විමේෂ් වර්ණපුර ටද දණහිසේ ACL ආබාධයක් හේතුවෙන් කණ්ඩායමෙන් ඉවත් වීමට සිදුවෙද්දී ඉසිපතනයේ ඉදිරිපෙළ තවත් අසරණ වන්නේ නොසිතූ ආකාරයකට ය.

ඉසිපතනය මීට පෙරදී ශ්‍රේණිගත කිරීම් වලින් මෙතරම් පහත වැටෙන්නේ වසර 6කට පෙර එනම් 2013 වර්ෂයේ දීය. දත්ත වාර්තා වලට අනුව ඉසිපතනය මෙතරම් පහතට ඇද වැටුනු පසු ඔවුන් තමන්ගේ සියලු ශක්තිය යොදා එළඹෙන වසරේ ඉහළ නගින්නේ කිසිවෙකු නොසිතු ලෙසිනි. 2013 වසරේ දී 7 වැනි ස්ථානයට ඇද වැටුනු ඉසිපතනය 2014 වසරේ තරග වාරය අවසන් කරන්නේ ලීග්, පිළිමළුන් පිටුදැකීම සහ සත්සාමාජික යන ශූරතා තුනම අපරාජිතව ජයගනිමිනි. 

නමුත් අද වනවිට තත්වය වෙනස් වී ඇත. මේ ඉසිපතනයේ ක්‍රීඩා විලාශය වෙනස් කළ යුතු කාලය ද? නැතහොත් ඔවුන් පසුගිය වර්ෂයන්වල ක්‍රීඩා කළ ආකාරයට තරග රටාවන් ක්‍රියාත්මක කළ යුතුද

ඉසිපතන ක්‍රීඩකයෝ ජෝසප් සිහින බිඳ දමයි

2019 මයිලෝ ජනාධිපති කුසලාන පිළිමළුන් පිටුදැකීමේ තරගාවලියේ…..

එම වසරට අදාළ කණ්ඩායම ගැන පමණක් අවධානය යොමු නොකර ඉන්පසු වර්ෂයන් වලටත් අවශ්‍ය ආකාරයට කණ්ඩායම් පුහුණු කළේ නම් එක් වසරකින් පසු තවත් වසරකට ඔවුන්ගේ රිද්මය පවත්වාගෙන ගිය හැක. ඉසිපතනය යනු ශ්‍රී ලංකා පාසල් රග්බි පිටියේ පෙරලියක් කළ පාසලකි. ඒ ගැන සැකයක් නැත. නමුත් ඔවුන්ගේ තත්වය ඔවුන් ඉදිරියට පවත්වාගෙන යෑමට නම් ඔවුන් වෙනසක් කළ යුතුමය. 

“ශ්‍රී ලංකා පාසල් රග්බි ක්ෂේත්‍රයේ රජුන්”ට රග්බි පිටියේදී තවත් පෙරලි කරන්නට කාලයට ඉඩ හරිමු!

>> තවත් විශේෂාංග ලිපි සඳහා පිවිසෙන්න <<