විරාත් කෝලිට කියා දුන් පාඩම ගැන ධර්මසේනගෙන් හෙළිදරව්වක්

8514
ධර්මසේන සහ කෝලි තරගයක් අතරතුර දී

විරාත් කෝලි සහ කුමාර් ධර්මසේන යනු ක්‍රිකට් විෂය පථයෙහි සැරිසරන්නන් වුවද කුලක දෙකක් නියෝජනය කරන්නෝ වෙති. කෝලි යනු ක්‍රීඩකයින්ගේ කුලකයට ඇතුළත් වන අතර ධර්මසේන යනු විනිසුරුකරණයට අයත් වන්නෙකි. කෙටියෙන්ම කිවහොත් කෝලිලා ක්‍රීඩා කරන විට විනිසුරුකරණයේ යෙදෙන්නේ ධර්මසේනලාය.

ක්‍රිකට් විනිසුරුවරයකු වීමට ප්‍රථම ධර්මසේන ද ක්‍රීඩකයෙකි. නිකන්ම නිකන් ක්‍රීඩකයකු නොව ලෝක කුසලාන දිනූ කණ්ඩායමක සාමාජිකයෙකි. එකිනෙකට වෙනස් කුලකවල සිට මොවුන් ක්‍රිකට් ක්‍රීඩාවේ සැරිසැරූව ද එකී කුලක ඡේදනය වන අවස්ථාවක් ද වෙත්. ඒ ක්‍රීඩාවෙන් ඉදිරියට ඒමේ දී ඔවුන් දක්වන ලද ‘උට්ඨාන වීර්යය’ හෙවත් නොපසුබට උත්සාහය පිළිබඳව වූ කුලකයයි. ලකුණු මැෂිමක් බවට පත්ව සිටින විරාත් කෝලි දිනෙන් දින ක්‍රිකට් ලොව වාර්තා තමන් සතු කරගනිමින් ලොව අංක එකේ පිතිකරුවා බවට පත්වද්දී ජාත්‍යන්තර ක්‍රිකට් විනිසුරුවන්ගේ ශ්‍රේණිගත කිරීමෙහි පළමු ස්ථානයට කුමාර් ධර්මසේන පැමිණ සිටින්නේ එකී කුලක ඡේදනයේ සිට මිස අන්තැනක සිට නොවේ.

ආසියානු කුසලාන ක්‍රිකට් තරගාවලියේ අතීතය

ආසියානු ක්‍රිකට් කවුන්සිලය සංවිධානය කරන ආසියානු කුසලාන ක්‍රිකට් තරගාවලිය මේ මස 15 වැනිදා සිට 28 වැනිදා දක්වා එක්සත් අරාබි එමීර් රාජ්‍යයේ දී පැවැත්වීමට නියමිත ය.

ගෙවී ගිය වසර 6 කට ආසන්න කාලයේ විනිසුරුවන් අතර ධර්මසේන සිටියේ පළමු ස්ථාන කිහිපයේය. කොටින්ම කිවහොත් හොඳින්ම පීඩනය හැසිරිය හැකි විනිසුරුවරයන් අතර ප්‍රමුඛයකු ලෙසිනි. එකී දක්ෂතාව ධර්මසේන සතුවීම නිසාම ඉන්දීය කණ්ඩායම තරග වදින සෑම තරගාවලියකම පාහේ විනිශ්චය කටයුතු කිරීම ධර්මසේනට භාරදීමට ජාත්‍යන්තර ක්‍රිකට් කවුන්සිලයද දක්වන්නේ වැඩි උනන්දුවකි.

ඉකුත් දා නිමාවට පත්වුණු එංගලන්ත – ඉන්දියා තරගාවලියේ ද විනිසුරුවරයකු ලෙස කටයුතු කළ ධර්මසේන එහි දී දැඩි අපහසු වූ තීන්දු කිහිපයක්ම ඉතා නිවැරදිව ලබා දුන්නේය. මේ පිළිබඳව හිටපු ඉන්දීය නායකයකු සහ වත්මන් විස්තර විචාරකයකු වන සව්රව් ගංගුලි පවා සඳහන් කර සිටියේ පැවති තත්ත්වය යටතේ ධර්මසේනයන් ලබා දුන් තීරණ විශිෂ්ට බවත්, එබැවින් ඔහු හොඳම ක්‍රිකට් විනිසුරු බවත්ය.

දීර්ඝ කාලීනව ඉන්දීය කණ්ඩායමේ තරග විනිශ්චය කටයුතු සිදු කිරීමට යෑමේ ප්‍රතිඵලයක් ලෙසින් ඉන්දියානු කණ්ඩායම ධර්මසේනගේ ප්‍රියතම ක්‍රිකට් කණ්ඩායම බවට පත්වන්නේය. තමන් විනිසුරුවරයකු ලෙස කටයුතු කිරීමේ දී ක්‍රීඩා කරනු දැකීමට කැමති ක්‍රීඩකයකු බවට විරාත් කෝලි පත්වන්නේ ඒ හරහාය. ඒ බව කියන්නේ අප නොව ධර්මසේනය. දිගින් දිගටම ඉන්දීය කණ්ඩායමේ තරග හිමි වීම හරහා කෝලි පිළිබඳ කැමැත්ත ඔහු තුළ ඇතිවී තිබෙන බව ධර්මසේන කියයි. එය හරි අපූරු කතාවකි. ඔබ වෙත ගෙන එන මෙම විශේෂාංගයේ දී ලොව අංක 1 විනිසුරුගෙන් ලොව අංක 1 පිතිකරුවා ගැන විමසීමට අපි තීරණය කළේ එකී අපූර්වත්වය නිසාමය. ධර්මසේන මේ සාකච්ඡාවට මුල පිරුවේ ද ඒ පිළිබඳව වූ අදහස් දක්වමිනි.

“අපි ආසියාවේ ඉපදිච්ච අය. ඒත් ක්‍රිකට් අතින් ගත්තහම ආසියාවේ ක්‍රිකට් ක්‍රීඩා කරන රටවල් අතර ඉන්දියාව ප්‍රබලම තැනක ඉන්නවා. ඔවුන් ක්‍රීඩා කරන තරග නරඹන්න ගොඩක් ප්‍රේක්ෂකයන් එනවා. ටී. වී. එකෙනුත් බිලියන ගාණක් නරඹන ඒ තරග ගොඩක්ම ප්‍රෙෂර්. මමත් ඒ වගේ තරග අම්පයරින් කරන්න ගොඩක් කැමතියි. අයි. සී. සී. යත් ඒක දන්න නිසා ඒ තරගවලට ගොඩක් වෙලාවට මාවම දානවා” යැයි ධර්මසේන පවසයි. “විරාත් කෝලි කියන පුද්ගලයා ක්‍රීඩා කරනවා බලන්න ඇත්තටම මම කැමති වුනේ ඉන්දියාව ක්‍රීඩා කරන තරග විනිශ්චය කරන්න ගිහිල්ලා” යැයි කෝලිට කැමැත්තක් ඇතිවීමට හේතුවූ කාරණාව ගෙන හැර පෑවේය.

කෝලි යනු දැඩි අධිෂ්ඨානශීලී ක්‍රීඩකයෙකි. ක්‍රිකට් පිටිය තුළ දී ඔහු තරම් ප්‍රචණ්ඩත්වයක් දක්වන ක්‍රීඩකයකු නොමැති තරම්ය. ඔහු තරම් ජයග්‍රහණ ඉල්ලන නායකයකු නැති තරම්ය. ඒ ඔහුගේ හැටිය. ක්‍රිකට් ක්‍රීඩාවේ අත්පොත් කියැවු දවසේ සිටම ඔහු ප්‍රගුණ කළේ ජයග්‍රහණයම පමණි. ඔහුගේ ඒ ලීලාවට නිසි තැන දැන් ඔහුට ලැබී තිබේ.

විරාත් කෝලි

විරාත් කෝලි කියන නම ඇසූ සැණින් ශ්‍රී ලාංකිකයින්ට දැනෙන හැඟීම ‘නයාට අඳු කොළ’ මෙනි. ඒ වෙන කිසිවක් නිසා නොව කෝලිගේ පිත්ත නොසෑහෙන ලෙස ශ්‍රී ලංකා පන්දු යවන්නන්ව තලා පෙලා දමන නිසාය. එපමණක් නොව පන්දු රකින අවස්ථාවල දී පවා අපේ ක්‍රීඩකයින් සමග දාගන්නා ලෙඩ ද අපේ කට්ටිටියට කෝලිව ‘ඇලජික්’ වීමට ප්‍රධාන හේතුවකි. කෝලි යනු ක්‍රීඩා පිටිය තුළ දැඩි සටන්කාමියෙකි. පෙර කිව් පරිදි හොඳම දේ තමන්ට ලබා ගැනීමට ඔහු දක්වන්නේ අසීමිත උනන්දුවකි. ක්‍රීඩාව තුළ එසේ හැසිරුණ ද ධර්මසේන පවසනා පරිදි ක්‍රිකට් පිටියෙන් එපිට නම් කෝලි යනු සැබෑ මහත්මයකු බවයි.

“තරගාවලි අතරතුර කීප වතාවක්ම මට කෝලිව ඇසුරු කරන්න අවස්ථාව හම්බවෙලා තියෙනවා. ඕනෑම දෙයක් ඔහුත් එක්ක සුහදව කතා කරන්න පුළුවන්. මට හිතෙන විදියට විරාත් කෝලිට තියෙන දේවල් පුද්ගලයෙක් හැටියට මට හම්බ වුනා නම් කෝලි එළියෙදි හැසිරෙන විදියට මට ඒ වගේ ඉන්න බැරි වෙයි කියලා මම හිතනවා. විශේෂයෙන් දුප්පත් මිනිස්සුන්ට, ඒ කියන්නේ ක්‍රීඩාවට එන මිනිස්සුත් එක්ක කතා කරන විදිය, හැසිරෙන විදිය හරිම විශිෂ්ටයි. ඒ ගැන මං මගේ ඇස් දෙකෙන් දැකලා තියෙනවා. එතැන දී මම ඔහුව දකින්නේ ඉතා විශිෂ්ට පුද්ගලයකු විදියට. ක්‍රීඩාංගණය ඇතුළේ ඉන්න පුද්ගලයා නොවෙයි ඇත්තටම එළියට ආවහම. මනුස්සයෙක් විදිහට ඔහු ඉතාමත් හොඳ පුද්ගලයෙක් කියලයි මං හිතන්නේ” යැයි ක්‍රීඩකයකුට එහා ගිය කෝලිගේ මානුෂීය ක්‍රියාකාරකම් පිළිබඳව ධර්මසේන පවසයි.

ක්‍රිකට් ක්‍රීඩාවේ දී පමණක් නොව සමාජ ජීවිතය පිළිබඳව ද කෝලි තුළ ඇත්තේ අපමණ දැනුමක් බව ඔහුගේ යම් යම් ක්‍රියාකාරකම් හරහා පෙනී යයි. සුරූපි බොලිවුඩ් නිළි අනුෂ්කා ෂර්මා කෝලිගේ ආදරණීය බිරිඳයි. ඔවුන් දෙපළගේ විවාහයට මෙරට දිරිගන්වන්නකු ලෙසින් කටයුතු කරන ගයාන් සේනානායකට ආරාධනා කිරීම, බාහිර ලෝකය සමඟ කෝලි හොඳින්ම කටයුතු කරන බවට වූ කදිම උදාහරණයකි.

ගයාන් සේනානායක කෝලිගේ විවාහයට සහභාගි වෙමින්

ජාත්‍යන්තර ක්‍රිකට් පිටියේ පැමිණ සිටින මේ කෙටි කාලය තුළ කෝලිගේ පිත්තෙන් බිඳ වැටුණු වාර්තා එමටය. තවත් ඒවා බොහෝමයක් ඉදිරියේ දී බිඳ වැටෙනු ඇත. ඒ, ඒ තරමටම කෝලි ක්‍රීඩාවේ දක්ෂයකු බැවිනි. එතරම්ම දක්ෂයකුගෙන් ශ්‍රී ලංකාවට ගත හැකි ආදර්ශ බොහෝ බව ද ධර්මසේනගේ මතය වේ.

“මං හිතන විදියට එයා ක්‍රීඩා කරන්න ආවහම අනිත් දේ වලට වඩා ඒ ගැනම තමයි අවධානය තියෙන්නේ. මං කෝලිගෙන් ඒ වගේ දේවල් ගොඩක් දකිනවා. විශේෂයෙන්ම එයා පුහුණු කරන වෙලාවට ෆෝන් එකවත් අතේ තියාගෙන ඉන්නවා ගොඩක් වෙලාවට දකිනවා අඩුයි. ජිම් එකේ හිටියත්, දුවන්න ආවත් එහෙමයි. ඒ පුරුදු අපිට නෑ. මම වුනත් ගොඩක් වෙලාවට ජිම් එකට යනකොට ෆෝන් එක අරගෙනයි යන්නේ. ඒ කියන්නේ එයා දෙයකට අවධානය යොමු කළොත් ඒ දේ ගැනම ෆෝකස් එක තියාගෙන ඉන්නවා. ඒකම ඇති හැදෙන කෙනෙක්ට” යැයි ධර්මසේන අවධාරණය කරයි.

1988 වසරේ නොවැම්බර් මස 05 වැනි දින දිල්ලියේ දී මෙලොව එළිය දුටු කෝලි කුඩා කල සිටම දැඩි කැපවීමකින් යුතුව සිය පුහුණුවීම්වල නිරත වූවෙකි. ඔහුගේ පිත්තෙන් ශතකයක් ලැබූව ද, ද්විත්ව ශතකයක් ලැබූව ද, නැතහොත් ලකුණු නොලබා දැවී ගිය ද එදිනට කළ යුතු ශාරීරික යෝග්‍යතාවන් සහ පුහුණුවීම් එලෙසින්ම සිදු කරයි. ඔහුගේ දින දර්ශනයේ නිවාඩු දිනයක් නැත. කෝලි පවසන අන්දමට විවේක දිනය යනු වංචාකාරී දවසකි. මේ පිලිබඳව ට්විටර් වෙබ් අඩවියට ඔහුගේ වචනවලින්ම සටහනක් තබන කෝලි ‘Rest day is a cheat day, never stop working hard’ (විවේක දිනය යනු වංචාකාරී දිනයකි. කිසි සේත් වැඩ කිරීම නතර නොකරන්න) යනුවෙනි.

“මං හිතන්නේ ඒ වගේ ට්‍රේන් කරන මනුස්සයෙක් මම කවදාවත් දැකලා නෑ. මාර විදියට ට්‍රේන් කරනවා. එයා බිලීව් (විශ්වාස) කරන්නේ එයාවම විතරයි. තරගාවලි අතරතුර දී මම දැකලා තියෙනවා, ජිම් කරන්න ගියත්, දුවන්න ගියත් එයා ඒවා හරියටම කරන බව. ඒ වගේම කෑම ගැනත් එයා හරිම පරිස්සමින් තමයි කටයුතු කරන්නේ. ක්‍රීඩාවට ඒ දෙකම හරිම වැදගත් කියන එක එයා හොඳට දන්නවා” යැයි ක්‍රීඩාව වෙනුවෙන් වූ කෝලිගේ කැපවීම පිළිබඳව ධර්මසේන අදහස් දක්වයි.

ටෙස්ට් තරගයක් අතරතුර

කෝලි තුළ වූ තමන් පිළිබඳව වූ හසළ විශ්වාසය පිළිබඳව ධර්මසේනගේ අදහස් දැක්වීම 100%ක්ම සත්‍ය බව එංගලන්තය සමඟ නොටිංහැම්හි පැවති තෙවැනි ටෙස්ට් තරගය දෙස අවධානය යොමු කිරීමේ දී පැහැදිලිවම දැක ගත හැකි විය. එම තරගයට ඉන්දීය පිල පිවිසෙන්නේ පළමු තරග 2 ම පරාජයට පත්ව තිබිය දී ය. තරගාවලියේ පළමු තරග 2 පරාජයට පත්ව තිබිය දී හිස එසවීම යනු ඉතාම අපහසු කරුණකි. එහෙත් පළමු ඉනිමේ දී ලකුණු 97ක් ලබන කෝලි දෙවැනි ඉනිමේ දී ලකුණු 103ක් රැස් කරමින් ඉන්දියානු පිල ලකුණු 203ක ජයක් කරා රැගෙන යන්නේ පිතිකරුවන්ගේ වගකීම තනිවම තම උරමත තබාගෙනය.

තරග 5කින් සමන්විත එම තරගාවලියෙන් 4-1ක් වශයෙන් ඉන්දියාව පරාජයට පත් වුවද තරගාවලියේ වැඩිම ලකුණු ලද පිතිකරුවා බවට පත්වීමට කෝලි සමත් විය. හෙතෙම තරග 5ක දී රැස් කරන ලද ලකුණු සංඛ්‍යාව 593කි. එම තරගාවලියේ දෙරටේම පිතිකරුවන් අතරින් ශතක දෙකක් වාර්තා කිරීමට සමත්වූ එකම පිතිකරුවා වන්නේ ද කෝලිය. ඉනිමක ලකුණු ලබා ගැනීමේ සාමාන්‍ය 59.3ක අගයක් ගනු ලබන කෝලිගේ පිත්තෙන් වාර්තා වූ අර්ධ ශතක 3කි. එය දෙරටේම පිතිකරුවකු වාර්තා කරන ලද වැඩිම අර්ධ ශතකය සංඛ්‍යාව ලෙසින් ද සටහන් විය.

ක්‍රිකට් ක්‍රීඩාවේ දෙවියන් ලෙස ඉන්දීය ප්‍රේක්ෂකන් හඳුන්වනු ලබන්නේ ලෝක පූජිත පිතිකරු සචින් ටෙන්ඩුල්කාර්වය. ටෙස්ට් මෙන්ම එක්දින තරගවල මෙතෙක් වැඩිම ලකුණු සහ වැඩිම ශත සංඛ්‍යාවක් රැස්කළ පිතිකරුවා ලෙසට ටෙන්ඩුල්කාර් පත්වීම නිසා එරට ප්‍රේක්ෂකයින් ඔහුට ඒ නම්බු නාමය පිරිනමා තිබේ. එහෙත් ජාත්‍යන්තර ක්‍රිකට් ක්‍රීඩාවට පය ගසා ගෙවී ගිය වසර 10ක කාලය තුළ පිතිකරුවෙකු ලෙස දක්වා ඇති දක්ෂතා පිළිබඳව සලකා බැලීමේ දී මේ සියලු වාර්තාවල අයිතිය වැඩි කලක් නොගොස් මෙම හැඩකාර දකුණත් පිතිකරුවා සතුකර ගන්නවා නොඅනුමානය.

ක්‍රීඩාව තුළින් ලබා තිබෙන අද්විතීය ජනප්‍රියත්වය නිසා සෙසු ක්‍රීඩකයින්ට මෙන් නිදහසක් කෝලිට නොමැත. ඔහුගේ දිවි ගෙවන රටාව බෙහෙවින් වෙනස්ය. ඔහුට පාරක යෑමට නොහැකිය. රාත්‍රි ආහාරයක් සඳහා නිවෙසින් පිටතට යෑම හෝ නවාතැන් ගෙන සිටින හෝටල් කාමරයෙන් එළියට යෑම යනු යුද්ධයකට හා සමාන මෙහෙයුමකි. එනිසාම කෝලි තරු පහේ හෝටල් කාමර සලකන්නේ ‘රාජකීය සිර ගෙවල්” විදියටය.

කෝලි මුණ ගැසුණු අවස්ථාවන්හිදී කතා කිරීමට කැමතිම මොනවා දැයි පිළිබඳව ධර්මසේනගෙන් කරන ලද ප්‍රශ්නය කිරීමේ දී, “ගොඩක් වෙලාවට ක්‍රිකට් ගැන නම් කතා කරනවා අඩුයි. හැබැයි කෝලි හරි ආසයි ප්ලෙයින් කන්ඩිෂන් (තරගවලට අදාළ නිර්නායකයන්) ක්‍රිකට් ලෝ (ක්‍රිකට් නීතිය) එක ගැන දැනගන්න. මාත් එක්ක කතා කරන හැම වෙලාවෙම වගේ එයා අහන්නේ, තාක්ෂණය කොහොමද හරියටම උපයෝගී කරගන්නේ කියන එක වගේ දේවල්. ඒ වගේ දේවල් ගැන දැනුම ලබා ගන්න එයා හරි ආසයි. එතන දී එයාට දැන ගන්න ඕන වෙලා තියෙන්නේ නායකයකු විදියට කොයි වෙලාවට ද ඒ ටෙක්නොලොජි එක පාවිච්චි කරන්න ඕන කියන එක ගැන හරියටම දැනගන්න. ඒ වගේම විනිසුරු තීරණ අභියෝගයට ලක් කරන්නේ කොහොමද වගේ දේවලුත් මගෙන් අහගන්නවා. මම දන්න දේවල් ටික කියලා දෙනවා. ඒ වෙලවාටත් ඔහු හැසිරෙන්නේ ඇත්තටම දීර්ඝ කාලයක් මිත්‍රයෝ වගේ ඇසුරු කරපු විදියටයි” යැයි ධර්මසේන පවසයි.

ක්‍රීඩාවෙන් ඉදිරියට පැමිණීමට දැක්වූ කැපවීම නිසාම කුමාර් ධර්මසේනව හැඳින්වූයේ ‘උනන්දුවා” යන අන්වර්ථ නාමයෙනි. කොළඹ නාලන්ද විදුහලෙන් ක්‍රිකට් ක්‍රීඩාව හදාරා දකුණු අප්‍රිකාවට එරෙහිව 1994 වසරේ දී ජාත්‍යන්තර වරම් දිනා ගත්තේ ශ්‍රී ලංකාව වෙනුවෙන් ටෙස්ට් වරම් ලද 59 වැනි ක්‍රීඩකයා ලෙසිනි. තම කණ්ඩායම වැටී සිටි බොහෝමයක් අවස්ථාවන්හිදී පන්දුවෙන් බැරි නම් පිත්තෙන්ද, ඒ දෙකෙන්ම නොවේ නම් දක්ෂ පන්දු රකින්නකු ලෙසින් ශ්‍රී ලංකාව ජයග්‍රහණය කරා රැගෙන ගිය අයුරු තවමත් අපේ මතකයන් අතර වේ. ඔහු කවදාවත් සටන ලේසියෙන් අත්හැරියකු නොවේ.

රූපය 1කෝලි සිය ආරක්ෂකයින් සහ බිරිඳ සමග

එක්දින පිටියේ පළමු වරට ලකුණු නොලබා දැවී යෑමට පෙර වැඩිම ඉනිම සංඛ්‍යාවක් ක්‍රීඩා කර ඇති ක්‍රීඩකයාගේ ලෝක වාර්තාවට ද හිමිකම් කියන්නේ ධර්මසේනය. 2009 වසරේ ජාත්‍යන්තර තරග විනිශ්චයට පැමිණෙන ධර්මසේන ශ්‍රී ලංකාව වෙනුවෙන් එවැනි හපන්කමක් කළ ළාබාලතමයා ලෙසින් ද ඉතිහාසයට එක්වී තිබේ. විනිසුරු දිවියේ දී ද ඔහුගේ නම සෙසු විනිසුරුවන්ට වඩා සුවිශේෂී වෙයි. ඒ මන්දයත් 2015 ලෝක කුසලාන තරගාවලියේ අවසන් මහ තරගයේ විනිසුරුවරයකු ලෙස කටයුතු කිරීමත් සමඟ ලෝක කුසලාන අවසන් මහ තරගයක ක්‍රීඩා කළ සහ විනිශ්චය කළ ප්‍රථම පුද්ගලයා බවට පත්වීම ද ධර්මසේන වාසනාවන්ත වී තිබේ.

වසර 12කට ආසන්න කාලයක් තිස්සේ ටෙස්ට් තරග 31ක දී කඩුලු 69ක් ද, එක්දින තරග 141ක දී කඩුලු 138ක් ද බිඳ හෙළා තිබේ. අවශ්‍ය විටෙක පිතිකරුවකු වශයෙන් ද විශාල සේවයක් කර ඇති ධර්මසේනගේ ටෙස්ට් අංශයේ සාමාන්‍ය 19.72ක් ද, එක්දින අංශයේ සාමාන්‍ය 22.62 ද සටහන් වේ. ධර්මසේනගේ එක්දින තරගවල සාමාන්‍ය, මෑතක දී ශ්‍රී ලංකාව මෙහෙයවීමට වරම් ලද පිතිකරුවකු යැයි සම්මත වන චාමර කපුගෙදරගේ ලකුණු ලබා ගැනීමේ සාමාන්‍යයට (21.09) වඩා වැඩි අගයක් ගැනීම විශේෂත්වයකි.

SLC T20 කතාන්දරය

ශ්‍රී ලංකා ක්‍රිකට් සංවිධානය කළ SLC T20 ක්‍රිකට් තරගාවලිය නිමා වූයේ බහුතරයක් වූ දකුණේ ක්‍රීඩකයන්ගෙන් සැදුම්ලත් “කොළඹ” කණ්ඩායම ජයග්‍රහණය කරමිනි.

අප මේ කතාව අවසන් කිරීම වෙනුවෙන් අවසන් වශයෙන් ලොව අංක 1 ක්‍රිකට් විනිසුරුවරයාගෙන් ප්‍රශ්නයක් ඇසීය. ඒ ඔබ කෝලිගේ රසිකයකු බවට පත්ව තිබෙන්නේ, කුමාර් ධර්මසේන නම් වූ චරිතය ඔබ විරාත් කෝලිගේ තුළින් එහෙමත් නැත්නම් ඔහුගේ ක්‍රියාකාරකම් හරහා දනි නිසා ද? යන්නය. විනිසුරුකරණයෙන් ජාත්‍යන්තරයේ ශ්‍රී ලංකා නාමය රැන්දවූ අප කථා නායකයා, “මං හිතනවා මමත් පුළුවන් වෙලාවට ඔහු වගේ කරනවා ඇති කියලා. හැබැයි කෝලි තරමටම කරන්න තරම් නම් හැකියාවක් නෑ. මම මාත් එක්ක කෝලිව සංසන්දනය කළොත් මම ඔහුට අගය කරන්නේ මට කරන්න බැරි දේවලුත් ඔහු කරන නිසාය. ක්‍රීඩාව වෙනුවෙන් ඔහු කරන කැප කිරීම් මගේ මේ ඇස් දෙකෙන්ම දැකලා තියෙනවා. විශේෂයෙන්ම ඔහු හැසිරෙන විදිය, කතා කරන විදිය පවා විශිෂ්ටයි. ඒකයි මම කළිනුත් කිව්වේ එයාගේ තැනට මම ගිහිල්ලා හිටියා නම් මම වුනත් ඔහු කරන විදියට කරන එකක් නැහැ කියලා” යැයි සිනහමුසු මුහුණින් පැවැසීය.

>> තවත් විශේෂාංග ලිපි සඳහා පිවිසෙන්න <<