அவுஸ்திரேலியாவில் நடைபெற்ற 19 வயதுக்குட்பட்ட மகளிர் முக்கோண T20I கிரிக்கெட் தொடரின் 6ஆவது மற்றும் கடைசிப் போட்டியில், அவுஸ்திரேலிய அணியை 3 ஓட்டங்கள் வித்தியாசத்தில் வீழ்த்தி இலங்கை அணி த்ரில் வெற்றி பெற்றுள்ளது.
இந்த வெற்றியின் மூலம் இலங்கை 19 வயதுக்குட்பட்ட மகளிர் அணி, இத்தொடரை முழுமையாக கைப்பற்றி அசத்தியுள்ளது.
பிறிஸ்பேனில் உள்ள இயன் ஹீலி ஓவல் மைதானத்தில இன்று (18) நடைபெற்ற இப்போட்டியில் முதலில் துடுப்பெடுத்தாடிய இலங்கை அணி 19.4 ஓவர்களில் அனைத்து விக்கெட்டுகளையும் இழந்து 99 ஓட்டங்களை மாத்திரமே பெற்றது.
துடுப்பாட்டத்தில் பொறுப்பான ஆட்டத்தை வெளிப்படுத்திய லிமன்சா திலகரட்ன 43 பந்துகளில் 35 ஓட்டங்களையும், அதிரடியாக விளையாடிய ப்ரமுதி மெத்சரா 13 பந்துகளில் 21 ஓட்டங்களையும் பெற்று அணிக்கு வலுசேர்த்தனர்.
அவுஸ்திரேலிய அணி சார்பில் பந்துவீச்சில் ஐரா ஏரி 19 ஓட்டங்களுக்கு 3 விக்கெட்டுகளையும், அரோரா மவ்ரோஸ் 15 ஓட்டங்களுக்கு 2 விக்கெட்டுகளையும் வீழ்த்தினர்.
- இங்கிலாந்து U19 மகளிர் அணியை சுழலில் வீழ்த்திய இலங்கை
- அசேனியின் 5 விக்கெட் குவியல் வீண்: ஆஸியிடம் போராடித் தோற்றது இலங்கை U19 மகளிர் அணி
100 ஓட்டங்கள் என்ற எட்டக்கூடிய இலக்குடன் பதிலுக்குத் துடுப்பெடுத்தாடிய அவுஸ்திரேலிய 19 வயதுக்குட்பட்ட மகளிர் அணி, இலங்கை வீராங்கனைகளின் துல்லியமான பந்துவீச்சை எதிர்கொள்ள முடியாமல் 19.5 ஓவர்களில் 96 ஓட்டங்களுக்குச் சுருண்டது. அவுஸ்திரேலிய அணி சார்பில் அலீசா டெர்மோடி அதிகபட்சமாக 25 ஓட்டங்களைப் பெற்றார்.
இலங்கை அணியின் பந்துவீச்சில் அணித்தலைவி சமோதி ப்ரபோதா 22 ஓட்டங்களுக்கு 3 விக்கெட்டுகளையும், சஷினி கிம்ஹானி 13 ஓட்டங்களுக்கு 2 விக்கெட்டுகளையும் வீழ்த்தி வெற்றியை உறுதி செய்தனர்.
இப்போட்டியின் ஆட்டநாயகியாக லிமன்சா திலகரட்ன தெரிவானார்.
போட்டியின் சுருக்கம்
இலங்கை U19 மகளிர் அணி: 99 (19.4 ஓவர்கள்) லிமன்சா திலகரட்ன 35, ப்ரமுதி மெத்சரா 21, ஐரா ஏரி 3/19, அரோரா மவ்ரோஸ் 2/15
அவுஸ்திரேலிய U19 மகளிர் அணி: 96 (19.5 ஓவர்கள்) அலீசா டெர்மோடி 25, சமோதி ப்ரபோதா 3/22, சஷினி கிம்ஹானி 2/13
முடிவு: இலங்கை 19 வயதுக்குட்பட்ட மகளிர் அணி 3 ஓட்டங்களால் வெற்றி
>>மேலும் கிரிக்கெட் செய்திகளைப் படிக்க<<
