2026ஆம் ஆண்டு கிரிக்கெட் பருவக்காலத்தில் இலங்கை, நியூசிலாந்து மற்றும் பாகிஸ்தான் ஆகிய அணிகளுக்கு எதிராக மேற்கிந்தியத் தீவுகள் ஆடவர் கிரிக்கெட் அணி தனது சொந்த மண்ணில் விளையாடவுள்ளது. இதில் இலங்கை மற்றும் பாகிஸ்தான் அணிகளுக்கு எதிரான டெஸ்ட் தொடர்களில் அந்த அணி விளையாடும் என்று மேற்கிந்தியத் தீவுகள் கிரிக்கெட் சபை அறிவித்துள்ளது.
இலங்கைக்கு எதிரான வெள்ளைப்பந்து (ஒருநாள் மற்றும் டி20) போட்டிகள் ஜூன் 3 முதல் 14 வரை ஜமைக்காவின் கிங்ஸ்டனில் உள்ள சபீனா பார்க் மைதானத்தில் நடைபெறவுள்ளன. இதனைத் தொடர்ந்து ஜூன் 25 மற்றும் ஜூலை 3 ஆகிய திகதிகளில் ஆரம்பமாகவுள்ள டெஸ்ட் போட்டிகள், ஆன்டிகுவாவில் உள்ள சர் விவியன் ரிச்சர்ட்ஸ் மைதானத்தில் நடைபெறவுள்ளன.
அதேநேரம், நியூசிலாந்து அணியின் வருகையானது 5 ஒருநாள் போட்டிகளை மட்டுமே கொண்டதாக அமையும். இவை ஜூலை 11 முதல் 21 வரை கயானாவின் தேசிய மைதானம் (முதல் 3 போட்டிகள்) மற்றும் பார்படோஸின் கென்சிங்டன் ஓவல் மைதானம் (கடைசி 2 போட்டிகள்) ஆகியவற்றில் நடைபெறவுள்ளன.
அதன் பின்னர், பாகிஸ்தான் அணி இரண்டு டெஸ்ட் போட்டிகளில் விளையாடுவதற்காக கரீபியன் தீவுகளுக்கு வருகை தரவுள்ளது. ஜூலை 25 முதல் 29 வரையும், ஆகஸ்ட் 2 முதல் 6 வரையும் நடைபெறவுள்ள இப்போட்டிகள் இரண்டும் டிரினிடாட் மற்றும் டொபாகோவில் உள்ள இரு வேறு மைதானங்களில் நடத்தப்படவுள்ளன. முதலாவது டெஸ்ட் போட்டி பிரையன் லாரா கிரிக்கெட் அகடமியில் நடைபெறவுள்ளதுடன், இது அந்த மைதானத்தின் முதலாவது வரலாற்றுச் சிறப்புமிக்க டெஸ்ட் போட்டியாக அமையவுள்ளது. இரண்டாவது போட்டி குவீன்ஸ் பார்க் ஓவல் மைதானத்தில் நடைபெறும்.
இலங்கை மற்றும் பாகிஸ்தான் அணிகளுக்கு எதிரான இந்த டெஸ்ட் போட்டிகள் ஐசிசி உலக டெஸ்ட் சம்பியன்ஷிப் தொடரின் ஒரு பகுதியாகும். தற்போதைய 2025-27 உலக டெஸ்ட் சம்பியன்ஷிப் சுற்றில், விளையாடிய 8 போட்டிகளில் 7 தோல்விகளுடன் மேற்கிந்தியத் தீவுகள் அணி புள்ளிப்பட்டியலில் கடைசி (ஒன்பதாவது) இடத்தில் உள்ளமை குறிப்பிடத்தக்கது.
- மே.இ. தீவுகள் தொடருக்கான இலங்கை கிரிக்கெட் குழாம்கள் வெளியீடு
- புதிய தெரிவுக் குழுவினைப் பெறும் இலங்கை கிரிக்கெட்
- இலங்கை வரும் இந்திய 19 வயதுக்குட்பட்டோர் கிரிக்கெட் அணி
இதனிடையே, நியூசிலாந்துக்கு எதிரான 5 ஒருநாள் போட்டிகளையும் கயானாவில் நடைபெறவிருந்தது. எனினும், ‘ஏற்பாட்டுச் சிக்கல்கள்’ காரணமாக இத்திட்டத்தில் மாற்றம் செய்யப்பட்டுள்ளது.
இது குறித்து மேற்கிந்தியத் தீவுகள் கிரிக்கெட் சபையின் பிரதம நிறைவேற்று அதிகாரி கிறிஸ் டெஹ்ரிங் விடுத்துள்ள அறிக்கையில், “5 ஒருநாள் போட்டிகளை நடத்துவதில் உள்ள ஏற்பாட்டுச் சிக்கல்கள் குறித்து கயானா கூட்டுறவுக் குடியரசு அரசாங்கத்துடன் மேற்கிந்தியத் தீவுகள் கிரிக்கெட் சபை பேச்சுவார்த்தை நடத்தியது. அதனைத் தொடர்ந்து, போட்டிகளையும் அதற்கான செயல்பாட்டுச் செலவுகளையும் இரு நாடுகளுக்கும் இடையே பகிர்ந்து கொள்ளும் ஒரு கூட்டு ஏற்பாட்டை கயானா மற்றும் பார்படாஸ் அரசாங்கங்கள் முன்மொழிந்தன.” என்று குறிப்பிட்டுள்ளார்.
மேலும், ‘நியூசிலாந்து கிரிக்கெட் சபையுடன் கலந்தாலோசித்த பிறகு, வீரர்கள், ரசிகர்கள் மற்றும் ஒட்டுமொத்த கரீபியன் சமூகத்திற்கும் ஒரு மறக்கமுடியாத மற்றும் வெற்றிகரமான தொடரை வழங்குவதற்கான எங்கள் அர்ப்பணிப்பின் ஒரு பகுதியாக, இந்த ஏற்பாட்டிற்கு மேற்கிந்தியத் தீவுகள் கிரிக்கெட் சபை ஒப்புதல் அளித்துள்ளது’ என்றும் அவர் தெரிவித்துள்ளார்.
போட்டி அட்டவணை
இலங்கை தொடர்:
ஜூன் 3: 1வது ஒருநாள் போட்டி – சபீனா பார்க், ஜமைக்கா
ஜூன் 6: 2வது ஒருநாள் போட்டி – சபீனா பார்க், ஜமைக்கா
ஜூன் 9: 3வது ஒருநாள் போட்டி – சபீனா பார்க், ஜமைக்கா
ஜூன் 11: 1வது டி20 போட்zடி – சபீனா பார்க், ஜமைக்கா
ஜூன் 13: 2வது டி20 போட்டி – சபீனா பார்க், ஜமைக்கா
ஜூன் 14: 3வது டி20 போட்டி – சபீனா பார்க், ஜமைக்கா
ஜூன் 25-29: 1வது டெஸ்ட் போட்டி – சர் விவியன் ரிச்சர்ட்ஸ் மைதானம், ஆன்டிகுவா ரூ பார்புடா
ஜூலை 3-7: 2வது டெஸ்ட் போட்டி – சர் விவியன் ரிச்சர்ட்ஸ் மைதானம், ஆன்டிகுவா ரூ பார்புடா
நியூசிலாந்துதொடர்:
ஜூலை 11: 1வது ஒருநாள் போட்டி – கயானா தேசிய மைதானம், கயானா
ஜூலை 13: 2வது ஒருநாள் போட்டி – கயானா தேசிய மைதானம், கயானா
ஜூலை 16: 3வது ஒருநாள் போட்டி – கயானா தேசிய மைதானம், கயானா
ஜூலை 19: 4வது ஒருநாள் போட்டி – கென்சிங்டன் ஓவல், பார்படாஸ்
ஜூலை 21: 5வது ஒருநாள் போட்டி – கென்சிங்டன் ஓவல், பார்படாஸ்
பாகிஸ்தான்தொடர்:
ஜூலை 25-29: 1வது டெஸ்ட் போட்டி – பிரையன் லாரா கிரிக்கெட் அகாடமி, டிரினிடாட் மற்றும் டொபேகோ
ஆகஸ்ட் 2-6: 2வது டெஸ்ட் போட்டி – குவீன்ஸ் பார்க் ஓவல், டிரினிடாட் மற்றும் டொபேகோ
>>மேலும் கிரிக்கெட் செய்திகளைப் படிக்க<<
