சூரியவன்ஷி மற்றும் பந்துவீச்சளார்களின் அபார பிரகாசிப்புகளின் உதவியுடன் இலங்கை A அணியை வீழ்த்தி முத்தரப்பு ஒருநாள் தொடரை இந்திய A அணி வெற்றிக்கொண்டது.
தம்புள்ள ரங்கிரி சர்வதேச கிரிக்கெட் மைதானத்தில் நடைபெற்ற இறுதிப்போட்டியில் இந்திய அணி 66 ஓட்டங்கள் வித்தியாசத்தில் வெற்றியை தமதாக்கியது.
>>இலங்கை வளர்ந்து வரும் அணிக்காக துடுப்பாட்டத்தில் அசத்திய ஷாருஜன்<<
நாணய சுழற்சியில் வெற்றிபெற்ற இலங்கை அணி முதலில் துடுப்பெடுத்தாடும் வாய்ப்பை இந்திய அணிக்கு வழங்க, அதன்படி ஆடிய இந்திய A அணி 50 ஓவர்கள் நிறைவில் 9 விக்கெட்டுகளை இழந்து 377 ஓட்டங்களை பெற்றது.
ஆரம்ப வீரராக களமிறங்கிய இளம் வைபவ் சூர்யவன்ஷி அதிரடியான ஆட்டத்தை வெளிப்படுத்தினார். இவர் வெறும் 11 பந்துகளில் அரைச்சதம் கடந்ததுடன், 29 பந்துகளில் 94 ஓட்டங்களை விளாசி ஆட்டமிழந்தார். இவர் துரதிஷ்டவசமாக சதமடிக்க தவறியதுடன், 29 பந்துகளில் வேகமாக லிஸ்ட் ஏ கிரிக்கெட்டில் சதமடித்த அவுஸ்திரேலியாவின் ஜெக் பிரேஸர் மெக்கின் சாதனையையும் தவறவிட்டார்.
முதல் விக்கெட்டுக்காக சூர்யவன்ஷி மற்றும் பிரியான்ஷ் ஆர்யா (39) ஆகியோர் முதல் விக்கெட்டுக்காக 8.5 ஓவர்கள் நிறைவில் 132 ஓட்டங்களை குவித்தனர். எனினும் இவர்களின் ஆட்டமிழப்பின் பின்னர் இலங்கை அணி ஓட்ட வேகத்தை கட்டுப்படுத்தியது.
இதற்கு அடுத்தப்படியாக திலக் வர்மா 67 ஓட்டங்கள், ருதுராஜ் கைக்வாட் 40 ஓட்டங்கள், குமார் குஷாக்ரா 36 ஓட்டங்கள் என பெற, இறுதியாக அனுகுல் ரோய் 15 பந்துகளில் 39 ஓட்டங்களை விளாசினார். பந்துவீச்சில் வனுஜ சஹான், ரவிந்து பெர்னாண்டோ மற்றும் குகதாஸ் மாதுளன் ஆகியோர் தலா 2 விக்கெட்டுகளை வீழ்த்தினர்.
பின்னர் பாரிய இலக்கினை நோக்கி களமிறங்கிய இலங்கை அணிக்கு நிரோஷன் டிக்வெல்ல மற்றும் அவிஷ்க பெர்னாண்டோ ஆகியோர் ஏமாற்றம் கொடுத்தனர். தொடர் முழுவதும் பிரகாசித்த இவர்களின் ஆட்டமிழப்பு அணிக்கு ஏமாற்றத்தை கொடுத்தது.
தொடர்ந்து களமிறங்கிய வீரர்கள் சீறான இடைவெளிகளில் விக்கெட்டுகளை விட்டுக்கொடுத்தனர். இதில் சதீர சமரவிக்ரம 52 ஓட்டங்களையும், சஹான் ஆராச்சிகே 38 ஓட்டங்களை பெற்றுக்கொடுத்த போதும், இவர்களின் ஆட்டமிழப்பு அணியின் வெற்றியை கடினமாக்கியது.
>>அவிஷ்கவின் சதத்தின் உதவியுடன் இறுதிப்போட்டியில் இலங்கை A அணி<<
அதேநேரம் மிகப்பெரிய ஓட்ட இடைவெளியில் இலங்கை அணி தோல்வியடையக்கூடிய வாய்ப்பும் காணப்பட்டது. இறுதியாக வனுஜ சஹான் மற்றும் விஜயகாந்த் வியாஸ்காந்த் ஆகியோர் மிகச்சிறந்த இணைப்பாட்டமொன்றை பகிர்ந்தனர்.
இவர்கள் இருவரும் ஏழாவது விக்கெட்டுக்காக 77 ஓட்டங்களை பெற, வியாஸ்காந்த் 39 ஓட்டங்களோடும், வனுஜ சஹான் 62 ஓட்டங்களுடன் ஆட்டமிழக்க, இலங்கை அணி 47.1 ஓவர்கள் நிறைவில் 311 ஓட்டங்களை பெற்று 66 ஓட்டங்களால் தோல்வியடைந்தது.
இந்திய அணியின் பந்துவீச்சை பொருத்தவரை யஷ் தாகூர் மற்றும் விப்ராஜ் நீகம் ஆகியோர் தலா 3 விக்கெட்டுகளை வீழ்த்தியிருந்தமை குறிப்பிடத்தக்கது.
சுருக்கம்
இந்தியா A அணி – 377/9 (50), வைபவ் சூர்யவன்ஷி 94, திலக் வர்மா 67, வனுஜ சஹான் 2/39
இலங்கை A அணி – 311 (47.1), வனுஜ சஹான் 62, சதீர சமரவிக்ரம 52, யஷ் தாகூர் 3/45, விப்ராஜ் நீகம் 3/60
முடிவு – இந்திய A அணி 66 ஓட்டங்கள் வித்தியாசத்தில் வெற்றி
>>மேலும் கிரிக்கெட் செய்திகளைப் படிக்க<<
