இரண்டாவது பாதியில் போட்டியை சமப்படுத்திய ரெட் ஸ்டார்

கொழும்பு சுகததாஸ அரங்கில் நேற்று (12) நடைபெற்ற கொழும்பு எப்.சி மற்றும் ரெட் ஸ்டார் அணிகளுக்கு இடையிலான போட்டி 2 – 2 என சமனிலையில் முடிவடைந்தது.

விறுவிறுப்பாக நடைபெற்ற இந்தப் போட்டியில் 17ஆவது நிமிடத்தில் பெனால்டி கட்டத்துக்கு அருகிலிருந்து கிடைத்த பிரீ கிக் வாய்ப்பை பயன்படுத்தி கொழும்பு எப்.சி அணி முதல் கோலை பெற்றது.

>>இலங்கை U15 கால்பந்து அணியில் இணைய இளம் வீரர்களுக்கு வாய்ப்பு!<<

நம்பர் மொஹமட் ஷாகில் அடித்த பந்து ரெட் ஸ்டார் அணியின் பின்கள வீரர்கள் மீது பட்டு கோல் காப்பாளர் அருகில் செல்ல, இப்ரஹீம் லெம்பே ஹெடர் செய்து முதல் கோலை பெற்றுக்கொடுத்தார்.

இதனையடுத்து 23ஆவது நிமிடத்தில் ரெட் ஸ்டார் அணியின் மொஹமட் பர்ஹாத் பெனால்டி கட்டத்தின் இடதுபக்க மூளையிலிருந்து அடித்த பந்து கோல் கம்பத்தில் மேல் பட்டு வெளியேற, பர்ஹாத்தின் அற்புதமான முயற்சி ஒன்று வீணாகியது. அத்துடன் இதனையடுத்து கிடைத்த சில வாய்ப்புகளையும் ரெட் ஸ்டார் அணி தவறவிட்டது.

பின்னர் ஆட்டத்தின் 34ஆவது நிமிடத்தில் ரெட் ஸ்டார் அணியின் கோல் காப்பாளர் வீசிய பந்தினை பெனால்டி கட்டத்துக்கு அருகில் இலாவகமாக தடுத்த மொஹமட் அப்துல்லாஹ் அங்கிருந்து வேகமாக கோல் கம்பத்துக்குள் பந்தை உதைத்து அணியின் முன்னிலையை 2 – 0 என மாற்றினார்.  இதன்படி முதல் பாதி 2 – 0 என நிறைவடைந்தது.

முதல் பாதி – கொழும்பு எப்.சி 2 – 0 ரெட் ஸ்டார் எப்.சி

இரண்டாவது பாதியிலும் இரண்டு அணிகளும் கோல் முயற்சிகளை மேற்கொண்டன. இதில் ரெட் ஸ்டார் அணியின் மொஹமட் பர்ஹாத் மீண்டும் பெனால்டி எல்லையின் வெளியிலிருந்து அடித்த பந்தினை கொழும்பு எப்.சி அணியின் கோல் காப்பாளர் சிறப்பாக தடுத்திருந்தார்.

தொடர்ந்து 71ஆவது நிமிடத்தில் பொனால்டி கட்டத்துக்கு வெளியிலிருந்து பர்ஹாத் கொடுத்த பந்தினை பீட்டர் சில்வனஸ் கோலுக்குள் அடிக்க, கம்பத்தில் பட்டு பந்து கோல் எல்லைக்குள் சென்றது. இதன்மூலம் தங்களுடைய முதல் கோலை ரெட் ஸ்டார் அணி பெற்றது.

இதனையடுத்து சில நிமிடங்களில் பெனால்டி கட்டத்துக்குள் வைத்து கொழும்பு எப்.சி அணியின் அபீல் மொஹமட்டின் கையில் பந்துபட, ரெட் ஸ்டார் அணிக்கு பெனால்டி வாய்ப்பு வழங்கப்பட்டது. இந்த வாய்ப்பினை அசாண்டே ஜெரோம் கோலாக மாற்ற, ரெட் ஸ்டார் அணி போட்டியை 2 – 2 என சமப்படுத்தியது.

>>கொழும்பு எப்.சியை வீழ்த்தி எட்டாவது வெற்றியை பெற்ற அப்கண்ட்ரி லயன்ஸ்<<

மீண்டும் போட்டியின் வெற்றிக்கான கோல் முயற்சிகளை இரண்டு அணிகளும் மேற்கொண்டிருந்தன. இதன்போது 80ஆவது நிமிடத்தில் கொழும்பு எப்.சி அணியின் சலன பிரமந்த இரண்டாவது மஞ்சள் அட்டை பெற்றதால், சிவப்பு அட்டை வழங்கி களத்திலிருந்து வெளியேற்றப்பட்டார். இவர், முறையற்ற விதத்தில் ரெட் ஸ்டார் அணியின் வீரரை மத்தியக்களத்தில் வீழ்த்தியதன் காரணமாக இந்த மஞ்சள் அட்டையை பெற்றிருந்தார்.

தொடர்ந்து இரண்டு அணிகளும் மேலதிக நேரத்தில் கோல்களை பெற்றுக்கொள்ளாத காரணத்தால் போட்டி 2 – 2 என சமனிலையில் முடிவடைந்தது.

முழுநேரம் – கொழும்பு எப்.சி 2 –  2 ரெட் ஸ்டார் எப்.சி

கோல் பெற்றவர்கள் – இப்ரஹீம் லெம்பே 23’ (கொழும்பு எப்.சி), மொஹமட் அப்துல்லாஹ் 34’ (கொழும்பு எப்.சி), பீட்டர் சில்வனஸ் 71 (ரெட் ஸ்டார்), அசாண்டே ஜெரோம் 76’ (ரெட் ஸ்டார்)

>> மேலும் கால்பந்து செய்திகளுக்கு <<