ஐசிசி மகளிர் வளர்ந்து வரும் நாடுகள் கிரிக்கெட் தொடரில் வரவேற்பு நாடான ஐக்கிய அரபு இராச்சியம் அணியை 5 விக்கெட்டுகளால் வெற்றிகொண்ட இலங்கை மகளிர் அணி, இத் தொடரில் 4ஆவது நேரடி வெற்றியை ஈட்டியது.
இந்த வெற்றியுடன் இலங்கை குழு ஏ முதலிடத்தைப் பிடித்து சுப்பர் சிக்ஸ் சுற்றுக்கு தகுதி பெற்றது.
விஷ்மி குணரட்ன குவித்த அரைச் சதம், கவிஷா தில்ஹாரி, நிமாஷா மீப்பகே ஆகியோரின் துல்லியமான பந்துவீச்சுகள் என்பன இலங்கையின் வெற்றியில் பிரதான பங்காற்றின
ஐக்கிய அரபு இராச்சியத்தின் அஜ்மானில் நேற்று (16) நடைபெற்ற இப் போட்டியில் முதலில் துடுப்பெடுத்தாடிய ஐக்கிய அரபு இராச்சியம் அணி, நிர்ணயிக்கப்பட்ட 20 ஓவர்களில் 8 விக்கெட்டுகளை இழந்து 106 ஓட்டங்களைப் பெற்றது.
அந்த அணியின் சார்பில் ஈஷா ஒசா 41 பந்துகளில் 42 ஓட்டங்களையும், தீர்த்தா சதீஷ் 47 பந்துகளில் 40 ஓட்டங்களையும் பெற்றுக்கொடுத்தனர்.
பந்துவீச்சில் இலங்கை அணி சார்பில் கவிஷா தில்ஹாரி 4 ஓவர்களில் 22 ஓட்டங்களுக்கு 3 விக்கெட்டுகளையும், நிமாஷா மீப்பகே 4 ஓவர்களில் 20 ஓட்டங்களுக்கு 2 விக்கெட்டுகளையும் கைப்பற்றினர்.
தொடர்ந்து 107 ஓட்டங்கள் என்ற வெற்றி இலக்கை நோக்கித் துடுப்பெடுத்தாடிய இலங்கை மகளிர் அணி, 15 ஓவர்களிலேயே 5 விக்கெட்டுகளை இழந்து 107 ஓட்டங்களைப் பெற்று வெற்றியைத் தழுவியது.
- அயர்லாந்து அணிக்கு எதிராக இலங்கைக்கு மகளிருக்கு வெற்றி ஆரம்பம்
- ஸ்கொட்லாந்தை வீழ்த்தி 2ஆது வெற்றியை பதிவு செய்தது இலங்கை மகளிர் அணி
- விஷ்மியின் அதிரடியில் இலங்கை மகளிருக்கு மூன்றாவது வெற்றி
இலங்கை அணியின் துடுப்பாட்டத்தில் விஷ்மி குணரட்ன 45 பந்துகளில் ஆட்டமிழக்காமல் 63 ஓட்டங்களைக் குவித்தார். இந்தத் தொடரில் அவர் குவித்த 3ஆவது அரைச் சதம் இதுவாகும். மறுபுறத்தில் கௌஷினி நுத்யாங்கனா 25 பந்துகளில் 25 ஓட்டங்களையும் குவித்தார்.
ஐக்கிய அரபு இராச்சியம் அணி தரப்பில் பந்துவீச்சில் ஈஷா ஒசா மற்றும் ஹீனா ஹோட்சந்தனி ஆகியோர் தலா ஒவ்வொரு விக்கெட்டைக் கைப்பற்றினர்.
போட்டியின் நாயகியாக கவிஷா தில்ஹாரி தெரிவு செய்யப்பட்டார்.
இத்தொடரின் லீக் போட்டிகள் நாளை (18) நிறைவடையவுள்ள நிலையில், எதிர்வரும் 20ஆம் திகதி முதல் சுப்பர் சிக்ஸ் சுற்றுப் போட்டிகள் ஆரம்பமாகவுள்ளன.
போட்டியின் சுருக்கம்
ஐக்கிய அரபு இராச்சியம் மகளிர் அணி – 106/8 (20) ஈஷா ஓசா 42, தீர்த்த சதீஷ் 40, கவிஷா தில்ஹாரி 3/22, நிமாஷா மீப்பகே 2/20
இலங்கை மகளிர் அணி – 107/5 (15) விஷ்மி குணரட்ன 63*, கௌஷினி நுத்யங்கனா 25
முடிவு – இலங்கை அணி 5 விக்கெட் வித்தியாசத்தில் வெற்றி பெற்றது






















