ඕස්ට්‍රේලියාව කවදත් ජාත්‍යන්තර ක්‍රිකට් පිටියට ප්‍රබල ක්‍රීඩකයන් දායාද කළ රටක්. එම නිසාම ඕස්ට්‍රේලියානුවන් බොහෝ කලක් ක්‍රිකට් පිටියේ අංක 1 කණ්ඩායම ලෙස ලෝක ක්‍රිකට් පිටියේ ඔවුන්ගේ අණසක පතුරවා ගෙන සිටිනවා.
එලෙස ක්‍රිකට් ලොව රජකළ ඕස්ට්‍රේලියානු කණ්ඩායම සඳහා ප්‍රබල ක්‍රීඩකයන් දායාද කරන තැනක් ලෙස ඕස්ට්‍රේලියානු යොවුන් කණ්ඩායම හැඳින්වීමට පුළුවන්. දිගු කලෙක සිට ඕස්ට්‍රේලියානු ජාතික කණ්ඩායමට ප්‍රබල ක්‍රීඩකයන් බිහිකරන තැනක් බවට පත්ව ඇති ඕස්ට්‍රේලියානු යොවුන් කණ්ඩායම මේ දිනවල ශ්‍රී ලංකාවේ සංචාරය කරන්නේ තරග 3කින් සමන්විත එක්දින තරගාවලියකට සහ යොවුන් ටෙස්ට් තරගයකට සහභාගි වීමටයි.
ලෝක අනුශූරයින් මෙල්ල කරන ශ්‍රී ලංකා යොවුන් සංචිතය මෙන්න
ශ්‍රී ලංකා 19න් පහළ ක්‍රිකට් ….
එලෙස ඕස්ට්‍රේලියානු යොවුන් කණ්ඩායම සහ ශ්‍රී ලංකා යොවුන් කණ්ඩායම අතර පැවැත්වීමට නියමිත තරග 3කින් සමන්විත යොවුන් එක්දින තරගාවලිය ජනවාරි 3 වැනිදා (අද) පී සරා ඕවල් පිටියේ දී ආරම්භ වීමට නියමිතයි.
1984 වසරේ පැවති ඕස්ට්‍රේලියා – ශ්‍රී ලංකා මුල්ම යොවුන් එක්දින තරගාවලිය
1984 වසරේ දී අරවින්ද ද සිල්වාගේ නායකත්වය යටතේ මුල්වරට ඕස්ට්‍රේලියානු සංචාරයකට එක්වූ ශ්‍රී ලංකා යොවුන් කණ්ඩායම එහි දී එක්දින තරගාවලිය 2-1 ලෙස පරාජයට පත්විය. එම තරගාවලිය සඳහා එක්වූ ශ්‍රී ලංකා කණ්ඩායම පසුකලෙක ජාතික කණ්ඩායම නියෝජනය කළ අරවින්ද, ගුරුසිංහ, මහානාම, අනුරසිරි සහ මාලන් වොන්හාට් වැනි ක්‍රීඩකයන් ද, ඕස්ට්‍රේලියානු යොවුන් කණ්ඩායමට පසුකලෙක ඕස්ට්‍රේලියානු ජාතික කණ්ඩායම නියෝජනය කළ ප්‍රබලම ක්‍රීඩකයන් වූ මාක් ටේලර්,ස්ටීව් වෝ සහ මාක් වෝ ද ඇතුළත් විය.
1985 වසරේ දී ශ්‍රී ලංකාවේ සංචාරය කළ ඕස්ට්‍රේලියානු යොවුන් කණ්ඩායම
තරග දෙකකින් සමන්විත වූ මෙම තරගාවලිය 1-1 ලෙස අවසන් වූ අතර මේ සඳහා සහභාගි වූ ශ්‍රී ලංකා යොවුන් කණ්ඩායමට පසුකලෙක ජාතික කණ්ඩායම නියෝජනය කළ ගුරුසිංහ, මහානාම, හෂාන්, රොෂාන් ජුරන්පති, ගාමිණී වික්‍රමසිංහ සහ නිශාන්ත රණතුංග ඇතුළත් වූ අතර ඕස්ට්‍රේලියානු යොවුන් කණ්ඩායමට පසුකලෙක ඕස්ට්‍රේලියානු ජාතික කණ්ඩායම නියෝජනය කළ ටොම් මූඩි සහ පෝල් රයිෆල් ඇතුළත් විය.
2001 වසරේ ඕස්ට්‍රේලියාවේ සංචාරය කල ශ්‍රී ලංකා යොවුන් කණ්ඩායම
2001 වසරේ දී තිළිණ කණ්ඩම්බිගේ නායකත්වය යටතේ මුතුමුදලිගේ පුෂ්පකුමාර, කෞෂාල් ලොකුආරච්චි සහ දිල්රුවන් පෙරේරා වැනි ක්‍රීඩකයන් සමඟ ඕස්ට්‍රේලියාවේ සංචාරය කළ ශ්‍රී ලංකා යොවුන් කණ්ඩායම තරග 4කින් යුත් එක්දින තරගාවලිය සමකර ගත්තේ පසුකලෙක ඕස්ට්‍රේලියාව නියෝජනය කළ මිචෙල් ජොන්සන් සහ නේතන් හවුරිට්ස් වැනි ක්‍රීඩකයන් ඇතුළත් වූ ඕස්ට්‍රේලියානු යොවුන් කණ්ඩායම සමඟය.
2009 වසරේ දී ඕස්ට්‍රේලියාවේ දී යොවුන් එක්දින තරගාවලියක් ජයග්‍රහණය කළ ශ්‍රී ලංකා යොවුන් කණ්ඩායම
2009 වසරේ චතුර පීරිස්ගේ නායකත්වය යටතේ ඕස්ට්‍රේලියාව බලා ගිය ශ්‍රී ලංකා යොවුන් කණ්ඩායමට භානුක රාජපක්ෂ, කිත්රුවන් විතානගේ, ධනුෂ්ක ගුණතිලක සහ උදාර ජයසුන්දර වැනි ක්‍රීඩකයන් ඇතුළත් වන විට ඕස්ට්‍රේලියානු පිල නික් මැඩින්සන්, පීටර් හැන්ඩ්ස්කොම්බ්, ෂෝන් ඇබට් සහ ඇඩම් සැම්පා වැනි ක්‍රීඩකයන් ඇතුළත් විය. එහි දී තරගාවලිය 3-2 ලෙස ශ්‍රී ලංකා යොවුන් කණ්ඩායම ජය ගැනීමට විශාලම හේතුව වූයේ භානුක රාජපක්ෂ පිත්තෙන් දැක්වූ සුපිරි දස්කම්ය.
2010 වසරෙන් පසුව පැවති යොවුන් එක්දින තරගවල දී ශ්‍රී ලංකා යොවුන් පිල ඉදිරියෙන්
2013/14 තරගාවලිය 3-0කින් ජය ගත් ශ්‍රීලංකා යොවුන් පිල
2014 වසරේ මුල භාගයේ දී ශ්‍රී ලංකාවේ සංචාරය කළ ඕස්ට්‍රේලියානු යොවුන් කණ්ඩායම සමඟ පැවති තරග 3කින් සමන්විත වූ යොවුන් එක්දින තරගාවලිය කුසල් මෙන්ඩිස්ගේ නායකත්වය යටතේ ක්‍රීඩා කළ ශ්‍රී ලංකා යොවුන් කණ්ඩායම 3-0ක් ලෙසින් ජයග්‍රහණය කළේය.
එහි දී ශ්‍රී ලංකාව වෙනුවෙන් පළමු තරගයේ දී නායක කුසල් මෙන්ඩිස් ලැබූ ලකුණු 103ත්, දෙවන සහ තෙවැනි තරගවල දී පිළිවෙළින් ප්‍රියමාල් පෙරේරා ලැබූ ලකුණු 58 සහ තිලක්ෂ සුමනසිරි ලැබූ ලකුණු 50 ශ්‍රී ලංකාවේ ජයග්‍රහණයට හේතු වූ ඉනිම් බවට පත්විය.
ඊට අමතරව පන්දුවෙන් දස්කම් දැක්වූ අනුක් ප්‍රනාන්දු කඩුලු 7ක් ද, තුන් ඉරියව්වෙන් දස්කම් දැක්වූ හර්ෂ රාජපක්ෂ ලකුණු 112ක් සහ කඩුලු 6ක් ලබා ගත්තේ.
කුසල් මෙන්ඩිස්
2014/15 තරගාවලියත් ශ්‍රී ලංකා යොවුන් පිල 3-1 ලෙස ජය ගනී
2014 වසරේ අග භාගයේ දී නැවතත් ශ්‍රී ලංකාවට පැමිණි ඕස්ට්‍රේලියානු යොවුන් කණ්ඩායම එහි දී ශ්‍රී ලංකා යොවුන් කණ්ඩායම සමඟ තරග 6කින් සමන්විත එක්දින තරගාවලියකට සහභාගි විය.
එහි දී චාමික කරුණාරත්නගේ නායකත්වය යටතේ ක්‍රීඩා කළ ශ්‍රී ලංකා යොවුන් කණ්ඩායම අවසානයේ දී තරගාවලිය ජයග්‍රහණය කළේ 3-1ක් ලෙසිනි. වර්ෂාවෙන් බාධා එල්ල වීම නිසා මුල් තරග දෙකම විසඳුමක් නොමැතිව අවසන් වූ මෙම තරගාවලියේ දී ශ්‍රී ලංකාව වෙනුවෙන් කැපී පෙනෙන ඉනිමක් ක්‍රීඩා කළ අවිශ්ක ප්‍රනාන්දු 4 වැනි තරගයේ දී පන්දු 103කින් ලකුණු 127ක් ලබා ගන්නා විට අවසන් එක්දින තරගයේ දී පිළිවෙළින් ලකුණු 86ක් සහ 83ක් ලැබූ කවීන් බණ්ඩාර සහ අකීල් ඉන්හැම් ද ශ්‍රී ලංකා ජයග්‍රහණයට දායක විය.
පිතිකරුවන් එසේ පිත්තෙන් දස්කම් දක්වන විට තරගාවලිය පුරාවටම කඩුලු 10ක් ලබා ගත් නායක චාමික කරුණාරත්න සහ දමිත සිල්වා පන්දුවෙන් කැපී පෙනෙන දස්කම් දැක්වීය.
අවිශ්ක ප්‍රනාන්දු
2017 වසරේ දී ඕස්ට්‍රේලියානු බිමේ පැවති යොවුන් එක්දින තරගාවලියෙන් ශ්‍රී ලංකාව 4-1 ක පරාජයක්
2017 වසරේ දී කමිදු මෙන්ඩිස්ගේ නායකත්වය යටතේ ඕස්ට්‍රේලියානු සංචාරයකට එක්වූ ශ්‍රී ලංකා යොවුන් කණ්ඩායම තරගාවලිය 4-1ක් ලෙස පරාජය වීමට බලපෑ ප්‍රබලම හේතුව වූයේ ශ්‍රී ලංකා යොවුන් පිතිකරුවන් පිතිකරණයේ දී දැක්වූ දුර්වලතාවයයි.
තරගාවලිය පුරාවටම ශ්‍රී ලංකා පිතිකරුවන් ලබාගත් අර්ධ ශතක දෙකම ජෙහාන් ඩැනියෙල්ගේ පිත්තෙන් වාර්තා වන විට තරග 4ක දී කඩුලු 12ක් දවා ගත් ලොයිඩ් පෝප් සහ තරග 3ක දී කඩුලු 8ක් දවා ගත් එවන්ස් සෙසු පිතිකරුවන්ට පිත්තෙන් සාර්ථක වීමට අවස්ථාවක් ලබා දුන්නේ නැත.
ශ්‍රී ලංකා පිතිකරුවන් එසේ පිත්තෙන් අසාර්ථක වන විට ඕස්ට්‍රේලියානු යොවුන් කණ්ඩායම වෙනුවෙන් පරම් උප්පාල් පළමු තරගයේ දී ලකුණු 111ක් සහ ජැක් එඩ්වඩ්ස් 3 වැනි තරගයේ දී ලකුණු 95ක් ලබා ගත්තේය.
ශ්‍රී ලංකාවේ දී ඕස්ට්‍රේලියානු යොවුන් කණ්ඩායම හමුවේ යොවුන් එක්දින තරගාවලියක් පරාජය වී නැති ශ්‍රී ලංකා යොවුන් කණ්ඩායම
1985 වසරේ සිට මේ දක්වා කණ්ඩායම් දෙකක අතර ශ්‍රී ලංකාවේ දී පවත්වා ඇති යොවුන් එක්දින තරගාවලි 3ම ශ්‍රී ලංකාව ජයග්‍රහණය කර ඇති අතර එහි දී පවත්වා ඇති එක්දින තරග 11න් ශ්‍රී ලංකාව පරාජය වී ඇත්තේ තරග දෙකක් පමණි.
එම නිසාම මෙවර තරගාවලිය ද ශ්‍රී ලංකා කණ්ඩායමට ජයග්‍රහණය කිරීමට විශාල අවස්ථාවක් ඇති අතර එය එසේ සිදුවුවහොත් ඕස්ට්‍රේලියානු යොවුන් කණ්ඩායම හමුවේ මව්බිමේ දී අපරාජිත වාර්තාව රැක ගැනීමට හැකි වනු ඇත.
කවරයේ ඡායාරූපය – 2009 වසරේ දී ඕස්ට්‍රේලියානු යොවුන් කණ්ඩායම 3-2ක් ලෙස ඕස්ට්‍රේලියාවේ දී පරාජය කළ ශ්‍රී ලංකා කණ්ඩායම
ශ්‍රී ලංකා – ඕස්ට්‍රේලියා යොවුන් තරගාවලියේ ඡායාරූප, වීඩියෝ සහ තරග වාර්තා ඇතුළු තවත් බොහෝ දෑ සඳහා රැඳී සිටින්න ක්‍රීඩාවේ ප්‍රමුඛයා ThePapare.com සමඟින්.
>> තවත් ක්‍රිකට් පුවත් සඳහා පිවිසෙන්න <<
