இலங்கை கிரிக்கெட் சபை எதிர்வரும் 2035 வரை எந்தவொரு முக்கிய ஐசிசி ஆடவர் கிரிக்கெட் தொடரையும் நடத்த முடியாது எனக் வெளிவந்த அண்மைய ஊடகச் செய்திகள் தொடர்பில், இலங்கை கிரிக்கெட் சபை (SLC) தங்களுடைய நிலைப்பாட்டை தெளிவுபடுத்தியுள்ளது.
ஐசிசியின் 2024 முதல் 2031 வரையிலான காலப்பகுதியில் நடைபெறவுள்ள தொடர்களை நடத்தும் நாடுகளின் ஒதுக்கீடுகளை கடந்த 2021 நவம்பர் 16ஆம் திகதி அறிவித்திருந்தது. அதற்கமைய, அந்த ஒதுக்கீடுகளின் ஒரு பகுதியாக 2026 ஐசிசி ஆடவர் T20 உலகக் கிண்ணத்தை இந்தியாவுடன் இணைந்து இலங்கை வெற்றிகரமாக நடத்தியிருந்தது.
>>பாகிஸ்தான் தொடர் ஆதிக்கம், இன்னிங்ஸ் தோல்வி ஆபத்தில் இலங்கை<<
இதே அறிவிப்பில், 2029ஆம் ஆண்டு ஐசிசி ஆடவர் சம்பியன்ஸ் கிண்ணத்தை நடத்தும் நாடாக இந்தியாவும், 2031 ஐசிசி ஆடவர் கிரிக்கெட் உலகக் கிண்ணத்தை இந்தியா மற்றும் பங்களாதேஷ் ஆகிய நாடுகள் இணைந்து நடத்தும் எனவும் குறிப்பிட்டிருந்தது.
எனவே, இந்த ஒதுக்கீடுகள் 2021ஆம் ஆண்டிலேயே அறிவிக்கப்பட்டவை என்பதுடன், பாலியில் அண்மையில் நடைபெற்ற ஐசிசி சந்திப்பின் மூலம் புதிதாக மேற்கொள்ளப்பட்ட ஒதுக்கீடுகள் அல்ல.
அத்துடன், இம்மாதம்15ஆம் திகதி ஐசிசியின் அண்மைய அறிவிப்பு, 2035 வரையிலான தொடர் அட்டவணையையும் போட்டிக் காலப்பகுதிகளையும் உறுதிப்படுத்துகிறது. எனினும், 2032 முதல் 2035 வரை நடைபெறவுள்ள ஆடவர் தொடர்களை நடத்தும் நாடுகள் இன்னும் உறுதிசெய்யப்படவில்லை.
அதன்படி, 2035 வரை ஐசிசி ஆடவர் கிரிக்கெட் தொடர்களை நடத்தும் வாய்ப்பிலிருந்து இலங்கை நீக்கப்பட்டுள்ளதாக வெளியிடப்பட்டுவரும் அண்மைய அறிவிப்புகளில் எந்த வகையிலும் உண்மையில்லை. திகதிகள் அறிவிக்கப்பட்டுள்ள நிலையில், நாடுகளின் ஒதுக்கீடுகளும் முடிவடைந்துள்ளது என்ற செய்தியில் எந்தவித உண்மையும் இல்லை.
ஐசிசியின் மூலமாக வெளியிடப்பட்ட அறிவிப்புகளை சரியாகப் பிரதிபலிக்கும் வகையில் செய்திகளைத் திருத்துமாறும், பொதுமக்கள் மற்றும் ஏனைய தரப்பினரிடையே தவறான எண்ணத்தை ஏற்படுவதைத் தவிர்க்குமாறும் SLC கேட்டுக்கொண்டுள்ளமை குறிப்பிடத்தக்கது.






















