SABA கூடைப்பந்து தகுதிச் சுற்றுப் போட்டிகளை நடத்தும் இலங்கை

இலங்கை கூடைப்பந்து சம்மேளனத்தின் ஏற்பாட்டில் ‘FIBA U18’ ஆசியக் கிண்ணம் -சாபா தகுதிச்சுற்று 2026′ (FIBA U18 Asia Cup, SABA Qualifiers 2026) கூடைப்பந்து தொடர் இம்மாதம் 25 ஆம் திகதி முதல் 29 ஆம் திகதி வரை கொழும்பு சுகததாச உள்ளக விளையாட்டரங்கில் நடைபெறவுள்ளது.  

பிராந்தியத்தின் வளர்ந்து வரும் இளம் திறமையாளர்கள் கண்ட அளவிலான (continental) போட்டிக்கு தகுதி பெறுவதற்காக நடத்தப்படும் இத்தொடர், இலங்கை விளையாட்டு ரசிகர்களுக்கு விறுவிறுப்பான இளையோர் கூடைப்பந்து அனுபவத்தை வழங்கும் என எதிர்பார்க்கப்படுகிறது.   

அதுமாத்திரமின்றி, அமெரிக்க கலாச்சாரம் மற்றும் விளையாட்டுகளின் உலகளாவிய தாக்கத்தை கொண்டாடும் வகையிலும், அமெரிக்காவின் 250ஆவது ஆண்டு நிறைவை நினைவுகூரும் வகையிலும் முன்னெடுக்கப்படும் #Freedom250 முன்முயற்சியின் ஒரு பகுதியாக, இலங்கையிலுள்ள அமெரிக்க தூதரகம் இந்த SABA கூடைப்பந்து தகுதிச்சுற்று 2026 தொடருக்கு பெருமையுடன் அனுசரணை வழங்குகின்றமை மற்றுமொரு சிறப்பம்சமாகும்.    

‘FIBA U18 ஆசியக் கிண்ணம் 2026′ தொடருக்கான தெற்காசிய தகுதிச் சுற்றுப் போட்டியாக ஐந்து நாட்கள் விறுவிறுப்பாக நடைபெறவுள்ள இத்தொடரில் மொத்தம் 12 போட்டிகள் நடைபெறவுள்ளன. இதில் ஆடவர் பிரிவில் இலங்கை, இந்தியா, பங்காளதேஷ் மற்றும் மாலைத்தீவுகள் ஆகிய நான்கு நாடுகள் பங்கேற்கின்றன.

அதேபோல, மகளிர் பிரிவில் இலங்கை, இந்தியா மற்றும் மாலைத்தீவுகள் ஆகிய நாடுகள் சம்பியன் பட்டத்திற்காக போட்டியிடவுள்ளன. இதில் வெற்றி பெறும் அணி, எதிர்வரும் ஜூலை 13 முதல் 19 வரை தாய்லாந்தில் நடைபெறவுள்ள ‘FIBA U18 மகளிர்க்கான ஆசியக் கிண்ணம் 2026 – டிவிஷன் B’ (Division B) தொடரில் விளையாட தகுதி பெறும்.   

இதனிடையே, ‘FIBA U18 ஆசியக் கிண்ணம் 2026’ கூடைப்பந்து தொடர் எதிர்வரும் ஆகஸ்ட் 13 முதல் 23 வரை இந்தியாவின் அகமதாபாத் நகரில் நடைபெறவுள்ளது. இரண்டு ஆண்டுகளுக்கு ஒருமுறை நடைபெறும் ஆசியாவின் இந்த முதன்மையான இளையோர் கூடைப்பந்து தொடரை இந்தியா நடத்துவது இது மூன்றாவது முறையாகும்.

Photos – Press Conference – FIBA U18 Asia Cup, SABA Qualifiers 2026

இத்தொடரை நடத்துவதற்கான இலங்கையின் முயற்சிகளுக்கு பிரதான அனுசரணையாளராகவும், இலங்கை கூடைப்பந்து அணியின் அனுசரணையாளராகவும் மாஸ் ஹோல்டிங்ஸ் (MAS Holdings) நிறுவனம் இணைந்துள்ளது.   

அத்துடன், இப்போட்டித் தொடரின் உத்தியோகபூர்வ ஒளிபரப்பு மற்றும் தொலைத்தொடர்பு பங்காளராக டயலொக் டெலிவிஷன் (Dialog Television), டயலொக் ப்ளே செயலி (Dialog Play App) மற்றும் ThePapare.com ஆகியன இணைந்துள்ளன.   

இத்தொடருக்கு மேலும் வலுசேர்க்கும் வகையில் வில்சன் (Wilson), மன்ச்சி (Munchee), லெமனேட் (Lemonade), வாஜ் வெல்பிங் (Vaaj Wellbeing), வர்த்தக சேவை கூடைப்பந்து சம்மேளனம் (Mercantile Services Basketball Association), நெல் ஃபார்ம்ஸ் (Nel Farms) மற்றும் பெகாசஸ் ரீஃப் ஹோட்டல் (Pegasus Reef Hotel) ஆகிய நிறுவனங்கள் அனுசரணையாளர்களாக கைகோர்த்துள்ளன.  

இத்தொடரின் அனைத்து 12 போட்டிகளும் “ThePapare” ஊடாக டயலொக் டெலிவிஷனில் HD தரத்தில் நேரடி ஒளிபரப்பு செய்யப்படவுள்ளன. அதேவேளை, உள்ளூர் மற்றும் உலகளாவிய ரசிகர்கள் இதனை டயலொக் ப்ளே செயலி மற்றும் ThePapare.com ஊடாக நேரடி இணைய ஒளிபரப்பாகக் காணலாம். உலகெங்கிலும் உள்ள கூடைப்பந்து ரசிகர்களுக்கு உலகத்தரம் வாய்ந்த நேரடி ஒளிபரப்பு அனுபவத்தை வழங்கும் நோக்கில், ஒவ்வொரு போட்டிக்கும் அதிநவீன 8-கேமரா அமைப்பும் (8-camera setup) உடனடி மறுஒளிபரப்பு முறையும் (instant replay syste) பயன்படுத்தப்படவுள்ளன. 

>> மேலும் பல விளையாட்டு செய்திகளைப் படிக்க <<