ஈட்டி எறிதலில் புது சரித்திரம் படைத்தார் ருமேஷ் தரங்க

தனது தடகள வாழ்க்கையின் அதிசிறந்த ஈட்டி எறிதலைப் பதிவு செய்த ருமேஷ் தரங்க, ரோமில் உள்ள ஒலிம்பிக் விளையாட்டரங்கில் இன்று (06) நடைபெற்ற டயமண்ட் லீக் தடகளப் போட்டியில் 92.62 மீட்டர் தூரத்திற்கு ஈட்டியை எறிந்து புதிய போட்டி சாதனையைப் படைத்துள்ளார்.

ஈட்டி எறிதல் விளையாட்டில் 89.37 மீற்றர் என்ற இலங்கை சாதனைக்கு சொந்தக்காரரான ருமேஷ் தரங்க, கிரெனடாவின் ஆண்டர்சன் பீட்டர்ஸ் (83.91 மீற்றர்) மற்றும் அமெரிக்காவின் கேர்டிஸ் தம்ப்சன் (83.89 மீற்றர்) ஆகியோரைத் தோற்கடித்து இப்போட்டியில் முதலிடத்தைப் பெற்றுக்கொண்டார். இப்போட்டியில் இரண்டாம் இடத்தைப் பெற்ற கிரெனடாவின் ஆண்டர்சன் பீட்டர்ஸ் இருமுறை உலக சம்பியன் பட்டம் வென்றவர் என்பதும், கேர்டிஸ் தம்ப்சன் உலக தடகள சம்பியன்ஷிப் போட்டியில் வெண்கலப் பதக்கம் வென்றவர் என்பதும் குறிப்பிடத்தக்கது.

இதனிடையே, ருமேஷ் தரங்கவின் இந்த 92.62 மீற்றர் சாதனையானது, 2024 ஒலிம்பிக் விளையாட்டு விழாவிற்குப் பின்னர் ஈட்டி எறிதல் போட்டியில் பதிவு செய்யப்பட்ட மிகச்சிறந்த திறமையாக பதிவாகியது. அதுமாத்திரமின்றி, உலகின் முன்னணி தடகள வீரர்கள் பங்கேற்ற இத்தொடரில், ருமேஷ் வெளிப்படுத்திய இந்தத் திறமையானது புதிய போட்டி சாதனையாக அமைந்ததுடன், முழு உலகிலும் இந்த வருடத்திற்கான ஈட்டி எறிதலில் அதிகூடிய தூரமாகவும் (World Leading) பதிவாகியுள்ளது.

• ஈட்டி எறிதலில் உலக சாதனையாளர்களை வீழ்த்தி இலங்கையின் ருமேஷ் தரங்க முதலிடம்
• இலங்கை சாதனையை முறியடித்து உலக மெய்வல்லுனர் சம்பியன்ஷிப்பிற்கு ருமேஷ் தகுதி
• டோக்கியோவில் வரலாறு படைத்த ருமேஷ் தரங்க

ருமேஷ் தரங்க தனது இறுதிப் போட்டியை 84.49 மீற்றர் தூரத்துடன் ஆரம்பித்தார். போட்டியின் இரண்டு மற்றும் மூன்றாம் இடங்களை வென்ற கிரெனடாவின் பீட்டர்ஸ் ஆண்டர்சன் (83.91 மீற்றர்), அமெரிக்காவின் கேர்டிஸ் தம்ப்சன் (83.89 மீற்றர்) ஆகிய இருவரினதும் அனைத்து முயற்சிகளையும் முறியடிப்பதற்கு ருமேஷ் தரங்கவின் முதலாவது முயற்சியே போதுமானதாக இருந்தபோதிலும், ருமேஷ் தரங்க தனது அடுத்தடுத்த முயற்சிகளையும் உத்வேகத்துடன் தொடர்ந்தார்.

இதில் ருமேஷின் இரண்டாவது முயற்சி 90 மீற்றரைக் கடந்ததுடன், அவரது 92.62 மீற்றர் தூரப் பதிவின் மூலம் இதற்கு முன்னர் 90.34 மீற்றராகக் காணப்பட்ட கோல்டன் லீக் போட்டி சாதனை முறியடிக்கப்பட்டது. இந்த முந்தைய சாதனை 20 வருடங்களுக்கு முன்னர் (2006 இல்) நோர்வேயின் ஆண்ட்ரியாஸ் தோகில்ட்சனால் (Andreas Thorkildsen) நிலைநாட்டப்பட்டிருந்தமை விசேட அம்சமாகும்.

இந்த அசாத்திய திறமையின் மூலம், உலக அளவில் ஈட்டி எறிதல் வரலாற்றின் மிகச்சிறந்த பதிவுகளில் 8 ஆவது இடத்திற்கு முன்னேறியுள்ள ருமேஷ் தரங்க, ஆசிய அளவிலான ஈட்டி எறிதல் தரவரிசையில் இரண்டாவது சிறந்த இடத்தையும் தன்வசப்படுத்தியுள்ளார்.

உலகையே வியப்பில் ஆழ்த்திய ருமேஷ் தரங்கவின் 92.62 மீற்றர் ஈட்டி எறிதல் சாதனை குறித்த ஒரு சுருக்கமான பார்வை:

* ஈட்டி எறிதலில் 92 மீட்டர் தூரத்தைக் கடந்து சாதனை படைத்த உலகின் மிக இளைய வயது வீரர் என்ற பெருமையை ருமேஷ் தரங்க பெற்றுள்ளார்.

* டயமண்ட் லீக் தடகளப் போட்டி ஒன்றில், தனக்கு அடுத்தபடியாக வந்த வீரரை விட 8.71 மீற்றர் என்ற பாரிய இடைவெளியில் முதலிடம் பிடித்து சாதனை படைத்துள்ளார்.

* 21ஆம் நூற்றாண்டில் பிறந்து, ஈட்டி எறிதலில் 92 மீற்றர் தூரத்தை எட்டிய முதல் சர்வதேச வீரர் ருமேஷ் தரங்க ஆவார்.

* ஈட்டி எறிதல் வரலாற்றில், உலக அளவில் பதிவான மிகச்சிறந்த 8ஆவது தூரத்தைப் பதிவு செய்த வீரராக இவர் உருவெடுத்துள்ளார்.

* கடந்த நான்கு ஆண்டுகளில் சர்வதேச அரங்கில் 92 மீற்றருக்கும் அதிகமான தூரத்திற்கு ஈட்டியை எறிந்த இரண்டாவது வீரர் என்ற பெருமையையும் இவர் பெற்றுள்ளார்.

* மேலும், எதிர்வரும் ஜூன் 9ஆம் திகதி வெளியாகவுள்ள உலகத் தரவரிசையில், ஒலிம்பிக் மற்றும் உலக சம்பியன்களான நீரஜ் சோப்ரா மற்றும் கேஷோர்ன் வால்கோட் ஆகிய இருவரையும் பின்னுக்குத் தள்ளி, உலகத் தரவரிசையில் 3ஆம் இடத்தைப் பிடிக்க ருமேஷ் தகுதி பெற்றுள்ளார்.

>>மேலும் பல மெய்வல்லுனர் செய்திகளைப் படிக்க<<