2019/20 ඩයලොග් අන්තර් සමාජ ලීග් රග්බි තරගාවලිය ආරම්භ වීම සඳහා තවත් ඇත්තේ දින දහයකටත් අඩු කාලයකි. පසුගිය වසරේ දී සිතූ තරම් පොලිස් කණ්ඩායම වාසනාවන්ත නොවුනත් ඔවුන් ප්‍රබල කණ්ඩායම් කිහිපයක්ම පරාජය කරා රැගෙන යන්නට සමත් විය. තරග පහක් පමණක් ජයගත්තත් අනෙක් කණ්ඩායම් වලට ඔවුන්ව පරාජය කිරීම පහසු වූයේ නැත.
1926 වසරේ දී ආරම්භ කරන ලද පොලිස් ක්‍රීඩා සමාජය ශ්‍රී ලංකාවේ පැරණිතම රග්බි ක්‍රීඩා සමාජ වලින් එකකි. 1967 වසරේ දී A කාණ්ඩයට සුදුසුකම් ලැබීමට සමත් වූ අතර එතැන් පටන් ප්‍රධාන ලීගයේ ක්‍රීඩා කරන සියලු කණ්ඩායම් වලට අභියෝගයක් වීමට ඔවුන් සමත් විය. ඉන් වසර 12කට පසු අන්තර් සමාජ තරග බිමේ කැපී පෙනුනු ඔවුන්ට, සිය පළමු අන්තර් සමාජ කිරුළ දිනා ගැනීමට හැකි විය.
හිටපු ක්‍රීඩක නිමල් ලෙව්කේගේ නායකත්වයෙන් 1979 වසරේ දී ඔවුන්ගේ පළමු ශූරතාවය හිමිකර ගැනීමට සමත් වූ අතර පසුව 1980 වසරේ දී අඛණ්ඩව දෙවන වරටත් ශූරතාවය දිනා ගත්තේ පොලිස් ක්‍රීඩා සමාජයේ ස්වර්ණමය කාල පරිච්ඡේදයක ආරම්භය සනිටුහන් කරමිනි. ඉන්පසු කාලයක් නිහඬව සිටි පොලිස් ක්‍රීඩා සමාජය නැවතත් තමන්ගේ ආගමනය සනිටුහන් කරමින් 1989 වසරේ දී අන්තර් සමාජ ක්‍රීඩා පිටිය දෙවනත් කරමින් අන්තර් ක්‍රීඩා සමාජ ශූරතා තුනම දිනාගෙන “ත්‍රිත්ව කිරුළු ශූරයින්” බවට පත්වීමට සමත් විය.
විජයග්‍රහණයකට සූදානම් වන යුද හමුදාව!
ඩයලොග් අන්තර් සමාජ ලීග් රග්බි තරගාවලියට සහභාගී වන ඕනෑම කණ්ඩායමක් ඕනෑම තත්ත්වයක් යටතේ පරාජය කිරීමට….
කෙසේවෙතත් පසුගිය වසර කිහිපය පොලිස් ක්‍රීඩා සමාජයට එතරම් සුබ වූයේ නැත. 2016 වසරේ දී සහ 2017 වසරේ දී ඉතිහාසයේ පළමු වතාවට වාර්තාගත ලෙස පල්ලම් බසින්නට ඔවුන්ට සිදුවූ අතර පසුගිය වසරේ දීද ඔවුන්ට සිදුවූයේ හත්වැනි ස්ථානයේ සිටිමින් තරගාවලිය අවසන් කිරීමට ය.
පසුගිය තරගවාරය දෙස හැරී බලන විට ඔවුන් සහභාගී වූ තරග 16න් ඔවුන් ජය ගත්තේ තරග 5ක් පමණක් වූ අතර තරග 2ක් ජය පරාජයෙන් තොරව අවසන් විය. ඔවුන් පරාජය වූ තරග ගණන නවයකි.
එළඹෙන තරගවාරයේ දී පොලිස් ක්‍රීඩා සමාජය වෙනුවෙන් “Prop” ස්ථානයේ ක්‍රීඩා කරන ළහිරු පවිත්‍ර ඔවුන්ගේ හොඳම අවියක් වන අතර ඔහු කණ්ඩායමේ ඉදිරිපෙළ ශක්තිමත් කරමින් ක්‍රීඩා කිරීමට සූදානමින් සිටියි.
එසේම පසුගිය වසරේ දී පොලිස් කණ්ඩායම නියෝජනය කළ ෆීජී ජාතික 22 හැවිරිදි ඉමෝසි වුණිවෝසා ඉදිරි තරග වාරය සඳහා නැවත වරක් පොලිස් කණ්ඩායම සමඟින් එක්වනු ඇත. දක්ෂ ක්‍රීඩකයෙකු වන ඉමෝසි වුණිවෝසා පොලිස් ක්‍රීඩා සමාජයේ ජයග්‍රහණ වෙනුවෙන් විශාල සේවයක් පසුගිය වර ඉටු කළේය. ඔහුගේ පාද චලනය සහ පන්දු හුවමාරු කිරීමේ හැකියාව නිසාම මෙවරත් පොලිස් ක්‍රීඩා සමාජය ශක්තිමත් කිරීමට වුණිවෝසා සූදානමින් සිටියි.
2017 වර්ෂයේ දී සාන්ත ජෝසප් විද්‍යාලය වෙනුවෙන් දක්ෂතා පෙන්වූ සචිත් සිල්වා මේ වනවිට පොලිස් ක්‍රීඩා සමාජයේ ප්‍රධාන තුරුම්පුවක් වී අවසන් ය. පසුගිය තරග වාරයේ දී පොලිස් ක්‍රීඩා සමාජය වෙනුවෙන් වැඩිම ලකුණු ලාභියා වූ සචිත්, මෙවරත් තමන්ගේ දස්කම් එළිදැක්වීමට මාන බලමින් සිටිනු නොඅනුමානය.
එසේම කණ්ඩායමේ පුහුණුකාරීත්වය ගැන බලන විට ශ්‍රී ලංකාවේ හිටපු සත්සාමාජික විශේෂඥ ක්‍රීඩකයෙකු සේම පොලිස් ක්‍රීඩා සමාජය වෙනුවෙන් පසුගිය තරගවාරයේ දී සහය පුහුණුකරු වශයෙන් විශාල සේවයක් ඉටුකළ අසංක රුද්‍රිගු, එළඹෙන තරගවාරයේ දී පොලිස් ක්‍රීඩා සමාජයේ ප්‍රධාන පුහුණුකරු වශයෙන් කටයුතු කිරීමට සූදානමින් සිටියි. පොලිස් ක්‍රීඩා සමාජයේ රිද්මය නැවත වරක් එක්රැස් කරමින් පසුගිය තරග වාරයේ දී ඔවුන්ගේ දස්කම් ඉහළ නැංවීමට විශාල පරිශ්‍රමයක් යෙදූ අසංක රුද්‍රිගු, එළඹෙන තරගවාරය වෙනුවෙන් ද මහත් සූදානමින් සිටිනු නොඅනුමානය.
අත්දැකීම් බහුල CR & FC කණ්ඩායම ආධිපත්‍ය පතුරවන්නට සූදානමින්!
ශ්‍රී ලංකා ජාතික රග්බි කණ්ඩායමේ නායක ඔමල්ක ගුණරත්නගේ නායකත්වය යටතේ CR & FC කණ්ඩායම මේ වනවිට…..
පොලිස් ක්‍රීඩා සමාජය සිය පළමු තරගය සඳහා CR&FC කණ්ඩායම සමඟින් නොවැම්බර් 30 වනදා CR&FC ක්‍රීඩා පිටියේ දී තරග වදිනු ඇත. පොලිස් ක්‍රීඩා සමාජයට මෙවර තරගාවලියේ වෙනසක් සිදු කිරීමට හැකි වෙයි ද? 2019/20 ඩයලොග් ලීග් රග්බි තරගාවලියේ සියලු තොරතුරු හා සජීවී විකාශය සඳහා රැඳී සිටින්න, ක්‍රීඩාවේ ප්‍රමුඛයා ThePapare.com සමඟම.
>> තවත් රග්බි පුවත් සඳහා පිවිසෙන්න – රග්බි පිටුවට <<
