இரண்டாவது வெற்றியுடன் LPL தொடரில் முன்னேறும் ஜப்னா கிங்ஸ்

தம்புள்ளை ரங்கிரி சர்வதேச மைதானத்தில் இன்று (22) நடைபெற்று முடிந்திருக்கும் லங்கா பிரீமியர் லீக் (LPL) தொடரின் 7ஆவது போட்டியில் கொழும்பு கேப்ஸ் அணியை 5 ஓட்டங்கள் வித்தியாசத்தில் வீழ்த்தி ஜப்னா கிங்ஸ் அணி தனது இரண்டாவது வெற்றியைப் பதிவு செய்துள்ளது.

>>பங்களாதேஷ் தொடருக்கான அவுஸ்திரேலிய டெஸ்ட் குழாம் அறிவிப்பு<<

தொடை உபாதை காரணமாக கொழும்பு கேப்ஸ் அணியின் தலைவர் குசல் மெண்டிஸ் இத்தொடரிலிருந்து விலகிய நிலையில், கமிந்து மெண்டிஸ் கொழும்பு கேப்ஸ் அணியின் புதிய தலைவராக பொறுப்பேற்றிருந்த இந்தப் போட்டியில் நாணய சுழற்சியில் வென்ற கொழும்பு கேப்ஸ் தரப்பானது முதலில் பந்துவீச்சைத் தெரிவு செய்தது.

அதன்படி முதலில் துடுப்பாட்டத்தினை ஜப்னா கிங்ஸ் அணிக்கு ஆரம்பத் துடுப்பாட்டவீரர்களான ஆரம்பத் துடுப்பாட்டவீரர்களான அவிஷ்க பெர்னாண்டோ (34) மற்றும் கமில் மிஷார (39) ஜோடி 65 ஓட்டங்களை இணைப்பாட்டமாகப் பெற்று சிறந்த தொடக்கம் அமைத்துக் கொடுத்தது.

பின்னர் மூன்றாம் இலக்கத்தில் ஆடிய சமிந்து விக்ரமசிங்க அதிரடியாக விளையாடி வெறும் 22 பந்துகளில் 4 பௌண்டரிகள் மற்றும் 2 சிக்ஸர்கள் அடங்கலாக 43 ஓட்டங்கள் விளாசி அணியின் ஓட்டங்களை உயர்த்தினார். இறுதியில் ஜப்னா கிங்ஸ் அணி நிர்ணயிக்கப்பட்ட 20 ஓவர்களில் 6 விக்கெட் இழப்பிற்கு 179 ஓட்டங்கள் சேர்த்தது.

>>ஆப்கான் ஒருநாள் தலைவர் பதவியை துறக்கும் ஹஷ்மத்துல்லா சஹிதி<<

கொழும்பு கேப்ஸ் பந்துவீச்சில் ஷாநவாஸ் தஹானி மற்றும் முஜீபுர் ரஹ்மான் ஆகியோர் தலா 2 விக்கெட்டுக்கள் வீதம் கைப்பற்றினர்.

பின்னர் 180 ஓட்டங்கள் என்கிற வெற்றி இலக்கை நோக்கி களமிறங்கிய கொழும்பு கேப்ஸ் அணி 52 ஓட்டங்களுக்கு 4 விக்கெட்டுக்களை இழந்து திணறியது.

எனினும் கமிந்து மெண்டிஸ் நிதானமாக விளையாடி 42 பந்துகளில் 58 ஓட்டங்கள் குவித்து அணியை மீட்கப் போராடினார். அவருக்குப் பின் களமிறங்கிய வனுஜ சஹனும் போராட்டம் காண்பித்தும் இறுதியில் ஜப்னா பந்துவீச்சாளர்களின் கட்டுக்கோப்பான செயற்பாட்டினால் கொழும்பு கேப்ஸ், 20 ஓவர்கள் நிறைவில் 9 விக்கெட்டுக்களை இழந்து 174 ஓட்டங்கள் பெற்று போட்டியில் தோல்வியினைத் தழுவியது.

கொழும்பு அணிக்காக இறுதிவரை போராடிய வனுஜ சஹன் ஆட்டமிழக்காது ஒரு சிக்ஸர் மற்றும் 6 பௌண்டரிகள் அடங்கலாக 34 ஓட்டங்கள் பெற்றார்.

ஜப்னா அணியின் பந்துவீச்சின் சார்பில் லிசாட் வில்லியம்ஸ் 3 விக்கெட்டுகளையும், டில்ஷான் மதுஷங்க மற்றும் ட்ரவின் மெதிவ் தலா 2 விக்கெட்டுகளையும் வீழ்த்தியும் தமது தரப்பு வெற்றியினை உறுதி செய்தனர். போட்டியின் ஆட்டநாயகனாக சமிந்து விக்ரமசிங்க தெரிவாகியிருந்தார்.

>>மேலும் கிரிக்கெட் செய்திகளைப் படிக்க<<