ஐசிசி மகளிர் T20 உலகக்கிண்ணத் தொடரில் அயர்லாந்து அணிக்கு எதிரான போட்டியில் வெற்றிபெற்ற இலங்கை மகளிர் அணி தங்களுடைய இரண்டாவது வெற்றியை பதிவுசெய்தது.
அயர்லாந்து மகளிர் அணி நிர்ணயித்திருந்த 131 என்ற வெற்றியிலக்கை சமரி அதபத்துவின் அபார சதத்தின் உதவியுடன் 15.3 ஓவர்கள் நிறைவில் அடைந்து இலகுவான வெற்றியை பெற்றுக்கொண்டது.
>>மே.இ.தீவுகளுடன் இலங்கை மகளிர் அணிக்கு தோல்வி
போட்டியின் நாணய சுழற்சியில் வெற்றிபெற்ற இலங்கை மகளிர் அணி முதலில் துடுப்பெடுத்தாடும் வாய்ப்பை அயர்லாந்து அணிக்கு வழங்கியது. அதன்படி ஆடிய அயர்லாந்து அணிக்காக கெபி லிவிஸ் 50 பந்துகளில் 59 ஓட்டங்களை பெற, 5 விக்கெட்டுகளை இழந்து 130 ஓட்டங்களை பெற்றுக்கொண்டது.
பந்துவீச்சில் நிலக்ஷி டி சில்வா 12 ஓட்டங்களுக்கு ஒரு விக்கெட்டினை வீழ்த்தியதுடன், மிதாலி அயோத்யா மற்றும் சமரி அதபத்து ஆகியோரும் தலா ஒரு விக்கெட்டினை வீழ்த்தினார்.
பதிலுக்கு துடுப்பெடுத்தாடிய இலங்கை மகளிர் அணியை பொருத்தவரை தனியாளாக சதமடித்த சமரி அதபத்து இலகுவான வெற்றியை பெற்றுக்கொடுத்தார்.
சமரி அதபத்து ஐசிசி மகளிர் T20 உலகக்கிண்ணத்தில் தன்னுடைய முதல் சதத்தை பதிவுசெய்ததுடன், 61 பந்துகளில் 2 சிக்ஸர்கள் மற்றும் 17 பௌண்டரிகள் அடங்கலாக 106 ஓட்டங்களை பெற்றார். இந்த பிரகாசிப்பின் உதவியுடன் 15.3 ஓவர்கள் நிறைவில் ஒரு விக்கெட்டினை மாத்திரம் இழந்து வெற்றியிலக்கை இலங்கை அணி அடைந்தது.
இலங்கை அணி இந்த வெற்றியுடன் 4 புள்ளிகளை பெற்று புள்ளிப்பட்டியலில், நான்காமிடத்தை பிடித்துள்ளதுடன், அடுத்தப் போட்டியில் ஸ்கொட்லாந்து அணியை எதிர்வரும் 26 ஆம் திகதி எதிர்கொள்ளவுள்ளமை குறிப்பிடத்தக்கது.
>>மேலும் கிரிக்கெட் செய்திகளைப் படிக்க<
