ඉන්දියාව සමඟ පැවති පළමු ටෙස්ට් ක්‍රිකට් තරගයේ අවසන් දිනයේ අවසන් කාර්තුව තුළ සිදු වූ නාට්‍යයක් වැනි සිදුවීම් පිළිබඳ ශ්‍රී ලංකා පිතිකරු නිරෝෂන් දික්වැල්ල ‘Cricbuzz’ වෙබ් අඩවිය වෙත අදහස් පල කර තිබේ. ඔහු පවසන්නේ එහි දී සිදු වූ ඇතැම් ක්‍රියා තරගයේ කාලය විනාශ කර දැමීම සඳහා චේතනාන්විතව සිදු කළ දේ බවයි.

හතුරුසිංහ ශ්‍රී ලංකාවේ පුහුණුකරු වීම තහවුරු වේ?

බංග්ලාදේශ ක්‍රිකට් පාලක මණ්ඩලයේ සභාපති නස්මුල් හසන් මහතා ඉකුත් දා (20) මාධ්‍ය හමුවේ අදහස් දක්වමින්, ඔවුන් …

අවසන් දිනයේ තේ පානයට සුළු කාලයකට පෙර ආරම්භ වූ ශ්‍රී ලංකා 4 වන ඉනිම අවසන් කර තරග 1-0ක වාසියක් හිමි කර ගැනීමට ඉන්දියාවට ඉතිරිව තිබුණේ පැය දෙකකට මදක් වැඩි කාලයකි. ශ්‍රී ලංකා පළමු කඩුලු 4 ලකුණු 2ක් තුල දවා ගත් ඔවුන් එම ජය මාවතට අවතීර්ණ වීමට සමත් වුවත් ඉදිරි පියවර තැබීමට ගත් උත්සාහයේ දී මග හරස් කර ගෙන සිටියේ නිරෝෂන් දික්වල්ලයි.

”මේ සිදුවීම් ආරම්භ වුනේ මම ස්ක්වෙයාර් ලෙග් කලාපයට ඉහළින් හයේ පහරක් එල්ල කිරීමත් සමඟයි. ඒ වෙලාවේ පා ඉන්න දෙසින් කඩුල්ල පසුපස පන්දු රකින්නන් 3 දෙනෙක් රඳවා තිබුණා. මම එය නයිජල් ලෝං විනිසුරුගේ අවධානයට යොමු කළා. එවිට ඔහු එය නිපන්දුවක් ලෙස සංඥා කළා. එවිට විරාත් කෝලි මගේ ළඟට ඇවිත් කිව්වා ඒක විනිසුරුගේ රාජකාරිය නිසා ඔබ කරදර වෙන්නේ නැතුව ඉන්න කියලා. එය තමයි සිදුවීම් වල ආරම්භය.”

දික්වැල්ල අනාවරණ කරන ලදි.

”ඒ වෙලාවේ මට හිතුණා මේක තමයි හොඳම අවස්ථාව තරගය නිමා වන කාලය ලඟා වන තෙක් කාලය අපතේ හරින්න කියලා. නමුත් කෝලි වහාම එය තේරුම් අරන් ආපසු යන්න හැරුණා. ඒ වෙලාවේ තමයි මොහොමඩ් ශාමි වැඩේට බැස්සේ. එක හරිම විහිළුවක් කියලයි මට හිතුණේ. මම හිතනවා අවසානයේ මම ඒ සටන ජය ගත්තා කියලා දික්වැල්ල වැඩිදුරටත් පැවසීය.

ඊට මද වෙලාවකට පසු ශාමි දික්වැල්ල අසලට පැමිණ වචන හුවමාරුවක් ආරම්භ කළේ ඔහු පන්දු යැවීමේ දිවීම ආරම්භ කරන විට දික්වැල්ල තමන් සූදානම් නොමැති බවට සංඥා කිරීමත් සමඟයි. ” ඔහු මගේ ළඟට ඇවිත් කිව්වා ‘ මේ බලන්න. මම මෙහෙ මිනිහෙක්. මම කොල්කටාවේ’ කියලා. එතකොට මම කිව්වා ‘ඉතින් මට මොකද’ කියලා.. හැබැයි ඒත් එක්කම වගේ මම කිව්වා ‘නමුත් ඔබ හොඳ වේගයකින් සහ ඉපිලීමක් සහිතව පන්දු යවනවා.” කියලත්. සමහර විට ඔහුට එකට සතුටු හිතෙන්න ඇති. ඒ වෙලාවේ ඔහු ආපහු හැරිලා පන්දු යවන්න ගියා.”

”මොහොමඩ් ශාමි එක් පන්දුවකින් පසු ඊළඟ පන්දුව යැවීමට ඉතා ඉක්මනින් තමන්ගේ සීමාව වෙත යන අවස්ථාවේ මම පන්දුවට පහර දීමට සූදානම් වීම සඳහා මට අවශ්‍ය තරම් කාලය වැය කිරීම ඉන්දියානුවන්ට ඇල්ලුවේ නැහැ. එහා අන්තයේ හිටපු නායකයා (චන්දිමාල්) මට උපදෙස් දෙමින් කිව්වේ මගේ සාමාන්‍ය තරග රටාවට අනුව ක්‍රීඩා කරන්න එතකොට ඔවුන් කලබලයට පත්වෙයි කියලා.”

24 හැවිරිදි දික්වැල්ල පවසයි.

දික්වැල්ල තරගයේ දිශානතියට අනුකූලව හැසිරුණු ආකාරය පැරණි විශිෂ්ට ක්‍රීඩකයන්ගේ පැසසුමට ද ලක් වුන අතර නායක චන්දිමාල් පා ඉන්න පසුපස ප්‍රදේශයේ පන්දු රකින්නන් තිදෙනෙක් රඳවා සිටි බව තේරුම් ගැනීමට තරම් තීක්ෂණ අවධානයකින් සිටීම පිළිබඳ දික්වැල්ලට පැසසුම් පිරිනමන ලදි.

”මම පිතිකරණයේ යෙදෙන විට මෙන්ම පන්දු රැකීමේ යෙදී සිටින විටත් කිසිවෙකුට මා යටත් කර ගැනීමට ඉඩ නොදී සිටීම තමයි මගේ අරමුණ. මට අවශ්‍ය තරගයේ පාලනය මා වෙත ගැනීමයි. ලෝකයේ සිටින විශිෂ්ටතම පිතිකරුවෙකු වන විරාත් කෝලි වුනත් තම ආකල්ප පිටිය තුල රඳවා ගන්නේ එලෙසිනුයි. එකයි මෙහෙම දෙයක් සිද්ධ වුනේ”

දික්වැල්ල පවසයි.

කෙසේ වෙතත් මේ වන විට ද, අවස්ථා කිහිපයක දී තරග තීරකවරුන්ගේ අවධානයට සහ අවවාදවලට ලක්ව සිටින දික්වැල්ලට ඕස්ට්‍රේලියාවට එරෙහි පන්දු වාර 20 තරගයක් ද අහිමි වුනේ තරග තහනමක් හේතුවෙනුයි. තවත් එක් අකුසලතා ලකුණක් මගින් දික්වැල්ලට තරග 4ක තහනමකට මුහුණ දීමට සිදුවන තත්ත්වයක් ද මතුව තිබේ.

”එය මගේ මනසේ සෑම විටම තිබෙනවා.” දික්වැල්ල පැවසුවේ ඔහුගේ සුපුරුදු කපටි සිනාවත් සමඟයි. ”මම කල්කටා නුවර දී සීමා ඉර පැන්නේ නැහැ.”

”මම පිටිය මැද දී ඇතිවෙන මෙවන් ගැටුම්වලට කැමතියි. මම නිතරම තරගය තුල රැඳෙන්නටත් ප්‍රතිවාදීන් අපේ පාලනයට නතු කර ගන්නටත් උත්සාහ කරනවා. මම කඩුලු රකින අවස්ථාවේ දී වුනත් මම උත්සාහ කරනවා පීඩනය ප්‍රතිවාදීන් වෙත යොමු කරන්න. කාලය අපතේ යවන්නත් එය හොඳ ක්‍රමයක්. මම හිතනවා කල්කටා තරගයේ දී ඉන්දියානුවන්ට පන්දුවාර දෙකක් තුනක් අහිමි වුනා කියලා.”

”මම කිසි විටක පසු පසට යන්න හිතන්නේ නැහැ. ඇත්තම ගැටුමක දී වුනත් ඔබ යමෙකුගේ ප්‍රහාරයට ලක් වෙද්දී ඔබ අඩියක් පස්සට තිබ්බොත් සටන පරාජය වීමට තිබෙන ඉඩ කඩ වැඩියි. ඒ වගේම තරගයක දී වුනත් ප්‍රතිවාදීන් මට පහර දෙනවා නම් මමත් පෙරලා පහර දෙනවා.”

තරගයේ සිදු වූ සියලු අවුල් වියවුල් අතරතුර දික්වැල්ල ශාමිගේ පන්දුවට එල්ල කළ ස්කූප් පහර අමතක වීමට ද ඉඩ තිබේ. ”මම එවැනි පොතේ නැති පහරවල්වලින් විශාල ආශ්වාදයක් ලබනවා. ඩිල්-ස්කූප් පහර, තර්ඩ් මෑන් කලාපයට ඉහළින් පන්දුව යොමු කිරීම, පැඩ්ල් ස්වීප් පහර වගේම පිතිකරණ ඉරියව්ව වෙනස් කරමින් එල්ල කරන පහරවල පවා මම පුහුණුවීම්වල දී උත්සාහ කරනවා. මම දැනගෙන හිටියා පා ඉන්න පසුපස පන්දු රකින්නන් තිදෙනා ස්ථානගත කර තිබූ ආකාරය වගේම එය නීති විරෝධී බවත්. මම හිතුවේ ඔහු මට බවුන්සර් පන්දුවක් එවන්න හදනවා කියලයි. එහෙම වුනා නම් මගේ පහර කඩුලු රකින්නාගේ හිසට ඉහළින් ෆයින් ලෙග් කලාපය වෙතට එල්ල වෙන්න තිබුණා.”

”පළමු ටෙස්ට් තරගයේ දී ඔවුන් භාවිත කළ වේග පන්දු යවන්නන් තිදෙනාම විශිෂ්ට ඝනයේ ක්‍රීඩකයන්. ඔවුන්ගෙන් බේරී සිටීමට වඩා මම හිතුවේ ‘ආරක්ෂා වන හොඳම ක්‍රමය පහර දීමයි’ යන මූලධර්මය භාවිත කිරීම හොඳ බවයි. එම තණ තීරුව වේග පන්දු යවන්නට පාරාදීසයක්, ඊට අමතරව වැස්ස සහ තණ තීරුව ආවරණය කර තිබීම නිසාත් එහි පන්දුවට පහර දීම ඉතා අසීරු වුනා.”

දික්වැල්ල අවසන් වශයෙන් පැවසීය.

 >> තවත් ක්‍රිකට් පුවත් සඳහා පිවිසෙන්න <<