அவுஸ்திரேலிய கிரிக்கெட் அணி எதிர்வரும் மே மாதம் 30ஆம் திகதி ஆரம்பமாகவுள்ள மூன்று போட்டிகள் கொண்ட ஒருநாள் தொடரில் பங்கேற்பதற்காக பாகிஸ்தானுக்கு சுற்றுப்பயணம் மேற்கொள்ளவுள்ளது.
இந்தத் தொடருக்காக அவுஸ்திரேலிய அணி மே மாதம் 23ஆம் திகதி இஸ்லாமாபாத்தை சென்றடையவுள்ளது. முதலாவது ஒருநாள் போட்டி ராவல்பிண்டியிலும், இரண்டாவது மற்றும் மூன்றாவது போட்டிகள் ஜூன் 2 மற்றும் 4ஆம் திகதிகளில் லாகூர் கடாபி மைதானத்திலும் நடைபெறவுள்ளன.
அவுஸ்திரேலிய அணி இதற்கு முன்னர் இவ்வருடம் ஜனவரி மாதம் மூன்று போட்டிகள் கொண்ட T20i தொடருக்காக பாகிஸ்தானுக்கு சுற்றுப்பயணம் மேற்கொண்டிருந்தது. அத்துடன், 2025ஆம் ஆண்டு நடைபெற்ற சம்பியன்ஸ் கிண்ணத் தொடரின் லீக் சுற்றுப் போட்டிகளிலும் அவுஸ்திரேலியா பாகிஸ்தானில் விளையாடியிருந்தது. எனினும், அந்தத் தொடரில் அவுஸ்திரேலியா விளையாடிய மூன்று போட்டிகளில் இரண்டு போட்டிகள் மழை காரணமாக கைவிடப்பட்டமை குறிப்பிடத்தக்கது.
- மே.இ.தீவுகள் செல்லும் இலங்கை கிரிக்கெட் அணி; போட்டி அட்டவணை வெளியீடு
- ஆரோன் ஹார்டியின் சகலதுறை ஆட்டத்தால் சம்பியனாகியது பெஷாவர் சல்மி
இதனிடையே, தற்போது நடைபெற்று வரும் ஐபிஎல் தொடர் நிறைவடையும் காலப்பகுதியில் இந்த ஒருநாள் தொடர் ஆரம்பமாகவுள்ளதால், அவுஸ்திரேலிய அணியின் தலைவர் பட் கம்மின்ஸ் உள்ளிட்ட சிரேஷ்ட வீரர்களின் பங்கேற்பு குறித்து இன்னும் உறுதிப்படுத்தப்படவில்லை.
கடந்த ஒக்டோபர் மாதம் இந்தியாவில் நடைபெற்ற ஒருநாள் தொடருக்குப் பிறகு அவுஸ்திரேலியா விளையாடும் முதலாவது ஒருநாள் தொடர் இதுவாகும். பாகிஸ்தான் தொடரைத் தொடர்ந்து, ஜூன் 9ஆம் திகதி ஆரம்பமாகவுள்ள அனைத்து வகை கிரிக்கெட் போட்டிகளையும் கொண்ட தொடருக்காக அவுஸ்திரேலிய அணி பங்களாதேசஷிற்கு சுற்றுப்பயணம் மேற்கொள்ளவுள்ளமை குறிப்பிடத்தக்கது.
>>மேலும் கிரிக்கெட் செய்திகளைப் படிக்க<<
