சுற்றுலா இலங்கை – பாகிஸ்தான் அணிகள் இடையிலான இரண்டாவது டெஸ்ட் போட்டியின் மூன்றாம் நாள் ஆட்டநிறைவில் இலங்கை அணியானது இன்னிங்ஸ் தோல்வியை தவிர்த்த போதும், தொடர்ந்தும் தோல்வியின் விளிம்பில் காணப்படுகின்றது.
ராவல்பிண்டியில் நடைபெறும் இந்த டெஸ்ட் போட்டியின் இரண்டாம் நாள் ஆட்டம் நேற்று (18) நிறைவுக்கு வரும் போது, இரண்டாம் இன்னிங்ஸ் துடுப்பாட்டத்தினை ஆரம்பித்திருந்த இலங்கை வீரர்கள் 74 ஓட்டங்களுக்கு 3 விக்கெட்டுக்களை இழந்து காணப்பட்டது. களத்தில் பசிந்து சூரியபண்டார 18 ஓட்டங்களுடனும், தனன்ஞய டி சில்வா 24 ஓட்டங்களுடனும் நின்றனர்.
இலங்கை அணிக்கு இன்னிங்ஸ் தோல்வியினைத் தவிர்க்க மேலதிகமாக 153 ஓட்டங்கள் தேவைப்பட்டிருக்க இலங்கை அணி இன்றைய நாளுக்கான போட்டியில் தமது இரண்டாம் இன்னிங்ஸ் துடுப்பாட்டத்தினை தொடர்ந்தது.
போட்டி ஆரம்பித்து சிறிது நேரத்தில் தனஞ்சய டி சில்வா இலங்கை அணியின் முதல் விக்கெட்டாக 37 ஓட்டங்களுடன் ஆட்டமிழந்தார். ஆனால் பசிந்து சூரியபண்டார அணித்தலைவர் குசல் மெண்டிஸ் உடன் இணைந்து மூன்றாம் நாளின் மதிய போசணம் வரை அணியினைக் கொண்டு சென்றார். பசிந்துவின் விக்கெட் அவர் 38 ஓட்டங்கள் பெற்றிருந்த போது ரசாவுல்லாவின் பந்துவீச்சில் பறிபோனது.
அதன் பின்னர் இலங்கை அணியின் ஆறாம் விக்கெட்டுக்காக இணைந்த சொனால் தினுஷ, குசல் மெண்டிஸ் இருவரும் அரைச்சதங்களை பூர்த்தி செய்தனர். இந்த அரைச்சதங்களால் பாகிஸ்தானை விட பின்தங்கியிருந்த ஓட்டங்களை கடந்த இலங்கை அணியானது, பின்வரிசையில் களமிறங்கிய மிலான் ரத்நாயக்கவின் துடுப்பாட்டப் பங்களிப்போடு மூன்றாம் நாள் ஆட்டநிறைவில் 309 ஓட்டங்களுக்கு 9 விக்கெட்டுக்களை இழந்து காணப்படுகின்றது.
இலங்கை அணியின் துடுப்பாட்டத்தில் குசல் மெண்டிஸ் 53 ஓட்டங்களையும், சொனால் தினுஷ 54 ஓட்டங்களையும் எடுத்திருந்தனர். தற்போது இலங்கை அணிக்கு நம்பிக்கை வழங்கும் மிலான் ரத்நாயக்க 60 ஓட்டங்களுடன் களத்தில் உள்ளார். இலங்கை அணி பாகிஸ்தானை விட தற்போது 82 ஓட்டங்களால் முன்னிலை அடைந்துள்ளது.
பாகிஸ்தான் பந்துவீச்சில் ஆமேர் ஜமால் 3 விக்கெட்டுக்களையும், மொஹமட் அப்பாஸ் மற்றும் ரசாவுல்லா ஆகிய இருவரும் தலா ஒரு விக்கெட் வீதமும் கைப்பற்றியிருந்தனர்.