பாகிஸ்தான், இலங்கை மற்றும் பங்களாதேஷ் ஆகிய 19 வயதுக்குட்பட்ட மகளிர் அணிகள் பங்கேற்கும் டி20 முக்கோணத் தொடரின் போட்டி அட்டவணையை பாகிஸ்தான் கிரிக்கெட் சபை வெளியிட்டுள்ளது. இத்தொடர் பைசலாபாத்தில் உள்ள இக்பால் சர்வதேச கிரிக்கெட் மைதானத்தில் எதிர்வரும் ஒக்டோபர் 2 முதல் 16ஆம் திகதி வரை நடைபெறவுள்ளது.
‘டிரிபிள் ரவுண்ட்–ரொபின்‘ (Triple Round-Robin) முறையில் நடைபெறும் இத்தொடரில், புள்ளிப்பட்டியலில் முதல் இரண்டு இடங்களைப் பிடிக்கும் அணிகள் இறுதிப்போட்டியில் மோதும்.
இலங்கை 19 வயதுக்குட்பட்ட மகளிர் அணி எதிர்வரும் செப்டம்பர் 28 ஆம் திகதி பாகிஸ்தானுக்கு புறப்பட்டுச் செல்லவுள்ளதுடன், பங்களாதேஷ் 19 வயதுக்குட்பட்ட மகளிர் அணி அதற்கு அடுத்த நாள் பாகிஸ்தானுக்கு வருகை தரவுள்ளது.
இதனிடையே, போட்டியை நடத்தும் பாகிஸ்தான் 19 வயதுக்குட்பட்ட மகளிர் அணி செப்டம்பர் 16 முதல் 27ஆம் திகதி வரை பைசலாபாத்தில் பயிற்சி முகாமில் ஈடுபடும். அதனைத் தொடர்ந்து, மூன்று அணிகளும் செப்டம்பர் 29, 30 மற்றும் ஒக்டோபர் முதலாம் ஆகிய திகதிகளில் இக்பால் மைதானத்தில் பயிற்சியில் ஈடுபடும்.
இந்தத் தொடரில் இலங்கை அணி தனது முதல் போட்டியில் எதிர்வரும் ஒக்டோபர் 3 ஆம் திகதி பாகிஸ்தானை எதிர்கொள்ளவிருக்கும் அதேநேரம் ஒக்டோபர் 5 ஆம் திகதி பங்களாதே{டன் பலப்பரீட்சை நடத்தும்.
- பாகிஸ்தான் செல்லும் இலங்கை இளவயது ஆடவர் கிரிக்கெட் அணி
- 8ஆவது முறையாக மகளிர் ஆசியக் கிண்ண சம்பியனாக மகுடம் சூடியது இந்தியா
2025ஆம் ஆண்டு நவம்பர் மாதம், அதாவது சுமார் 17 ஆண்டுகளுக்குப் பிறகு தென்னாப்பிரிக்க ஆண்கள் அணி பாகிஸ்தானுக்கு எதிராக மூன்று ஒருநாள் போட்டிகளில் விளையாடியதன் மூலம் இக்பால் மைதானத்தில் சர்வதேச கிரிக்கெட் மீண்டும் தொடங்கியது. அதன் பிறகு, இந்த மைதானத்தில் நடைபெறும் முதல் மகளிர் சர்வதேச கிரிக்கெட் தொடர் இதுவாகும்.
ஆசிய கிரிக்கெட் பேரவையின் மகளிர் 19 வயதுக்குட்பட்ட ஆசியக் கிண்ணம் மற்றும் ஐசிசி மகளிர் 19 வயதுக்குட்பட்ட உலகக்; கிண்ணத் தொடர்கள் விரைவில் நடைபெறவுள்ள நிலையில், இளம் வீராங்கனைகளுக்கு அதிக வாய்ப்புகளை வழங்கும் நோக்கில் இத்தொடர் ‘டிரிபிள் ரவுண்ட்–ரொபின்‘ முறையில் நடத்த நடவடிக்கை எடுக்கப்பட்டுள்ளது. இதன் மூலம் இறுதிப்போட்டிக்கு முன்னதாக ஒவ்வொரு அணியும் தலா 6 டி20 போட்டிகளில் விளையாடும்.
போட்டி அட்டவணை:
- ஒக்டோபர் 2 – பாகிஸ்தான் vs பங்களாதேஷ்
- ஒக்டோபர் 3 – பாகிஸ்தான் vs இலங்கை
- ஒக்டோபர் 5 – இலங்கை vs பங்களாதேஷ்
- ஒக்டோபர் 6 – பாகிஸ்தான் vs பங்களாதேஷ்
- ஒக்டோபர் 8 – பங்களாதேஷ் vs இலங்கை
- ஒக்டோபர் 9 – பாகிஸ்தான் vs இலங்கை
- ஒக்டோபர் 11 – பாகிஸ்தான் vs பங்களாதேஷ்
- ஒக்டோபர் 12 – பாகிஸ்தான் vs இலங்கை
- ஒக்டோபர் 14 – இலங்கை vs பங்களாதேஷ்
- ஒக்டோபர் 16 – இறுதிப்போட்டி
>>மேலும் கிரிக்கெட் செய்திகளைப் படிக்க<<
